點解要大學生答問題就好似受刑咁樣?

(photo via cc Flickr user Francisco Osorio)

(photo via cc Flickr user Francisco Osorio)

 

點解大學生咁唔中意係課堂上面答問題?呢個問題一直困擾左我四年,雖然我都係一個唔中意答問題既大學生,但我依然搵唔到答案。學生係唔係唔識答?唔係!因為老師指到明叫佢答果時,佢就唔多唔少都答到出黎。每當老師問問題,成個課室就會頓時安靜,每個學生心入面都係到祈禱千奇唔好抽中自己。但只要老師一開始講到明答問題就會有分加果時,學生就會不停答問題,但唔係次次都有效果下先死。

呢個時候,我地就要諗下點解老師咁想學生答問題,其實都主要分為兩種,第一種就係老師想確定學生係有專心聽書,唔會坐左係到但做自己野,唔係個個老師都可以容忍到。另一種就係老師怕自己講書太悶,或者講完都未夠時間落堂,所以想問下問題等時間過得快D。

呢種突擊性問問題就係學生最怕既問題。有時候上堂既內容唔一定個個岩聽,可能因為老師講野太悶,照住個ppt讀,所以你唔想聽。可能聽日要交功課,你一定要死掂佢,所以你冇時間聽。可能老師講太多,我地一味好似既填鴨咁係咁填,所以你冇時間思考。係咁既情況之下答問題,係完全唔會有信心,冇信心自然唔會想答,呢個都十分之正常,所以老師就算話加分都好,都唔係個個會去試。

另一種就係同學報告果時,老師講到明只要你答佢地問題或者係問問題就會加分。呢種情況之下大部份學生都會瘋狂問問題同埋答問題,一黎佢地有三、四十分鐘去諗問題,二黎就係佢地唔怕會醜,因為大家都知道自己係為分數,所以唔少人既問題根本係冇深度冇營養,但係老師往往都好少指正學生,可能係怕學生自尊心受損掛。筆者讀左咁耐,只係見過有一個研究生不點名咁批評學生既問題質素,但學生都係意見接受,態度照舊,為問而問,為分數而問。

香港教育係唔係由細到大都唔會教導學生答問題,所以當佢地入大學果時,就會唔習慣答問題呢?幼稚園果時學生好中意答問題,小學果時學生都間唔中舉手答問題,但到中學同大學果時,學生已經好少主動去答問題。我地香港既教育到底出現左咩野問題?人人都話大個左會有批判性思考,但點解連最簡單既答問題都做唔到?我地冇知識咩?唔係喎,大學生點會冇知識?但偏偏就係連問題都唔想答。

唔想答同埋唔想問,係唔係代表學生已經識哂,或者係覺得問題太淺,內容太易,根本冇答既必要?可能係,但諗深一層,唔識諗問題,唔去諗問題,唔去用唔角度去答同諗問題,會唔會就係香港社會入面,人文社會學科一直積弱既原因?因為我地只係識得背背同埋背。由細到大背孫中山係國父,但有冇人會去挑戰佢國父既地位!我地係完全接受教科書,定係會用唔同既方法去睇呢件事?筆者唔知、筆者都唔識,因為筆者都係一隻填鴨。

某種程度上學生問問題同答問題都會被人怕誤會愛出風頭,扮哂野。但事實上佢地係冇錯,一問一答,何錯之有?錯既係笑佢地既人。問心果句,讀者有冇覺得同學成日問問題或者答問題係搏表現?我唔否認有人其實真係搏出風頭,但同時有學生真係唔識,或者係想肯定自己冇理解錯老師既內容先會答問題。我地唔答都算,點可以仲要私底下笑佢地?諗番起自己既所作所為,都真係慚愧。

今時今日既大學老師已經要做到用物質同埋分數去求學生問問題,咁樣仲係唔係一個健全既教育制度?去到最後,可能學生同埋老師理想既課堂,都係老師由頭講到尾,學生一係抄筆記,一係唔聽書,一係走堂,大家唔好有交流,費事問左冇人答,老師個心難受,學生又怕被人抽中答問題,個心仲難受。

香港學生點解大個左就唔中意答問題,問問題呢?如果各位讀者有答案既話,不妨留言話比我知,雖然係冇分加,冇禮物送,但當係可憐下我呢個final year既迷途小羔羊,話我知你地心目中既答案。

 

作者:筆知所謂

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 146194
Date: 2016-11-18 05:31:36
Generated at: 2021-12-09 06:05:31
Permalink: https://www.vjmedia.com.hk/articles/2016/11/18/146194/點解要大學生答問題就好似受刑咁樣?