【又係中國】一蚊雞單車

單車

 

大家都話,踩單車做交通工具,環保又方便。

而中國大陸,踩單車曾經係排名第一嘅交通工具,七十年代,可能99%嘅大陸人係以單車代步,北京、上海、廣州等大城市,滿街單車,蔚為奇觀。
最近卅年,單車係落伍、窮人恩物。

時代嘅變化難以想象,大型城市如北京、上海、廣州、深圳等等,以地鐵為主嘅公共交通已大致完成。今年,繼「打車APP」熱潮後,單車再次成話題,因為,依家大城市出現咗一蚊租單車!

上海人買單車幾百蚊到幾千蚊都有,但係同買車一樣,買架單車要搵地方擺,出去要鎖車,麻煩。單車又極易被偷,好唔抵。

咁尼,我就撞到呢個Mobike,瑩光橙色轆軨,座椅上「用車一元」,用手機掃上面嘅QR Code,個鎖就會打開,計時開始,到咗或者唔想踩,放在街邊,鎖好有「啲啲」兩聲,手機APP就從儲值扣錢,拍拍籮柚就走得。租車好鬼方便!

架車有GPS,佢個App可以睇到附近有無車,手機預約十五分鐘內取車,有時在辦公室想出去食野,掃一掃,有車就BOOK車,過幾分鐘就出發。
試過由人民廣場踩去徐家匯,中途竟落起雨嚟,見到個地鐵站口,就丟低架Mobike,搭地鐵。

呢個單車嘅玩法真係極之方便,兩三公里內的路程,以前會搭的士或者CALL白牌,依家會搵單車踩。此單車正好做地鐵駁腳,一蚊真係平、靚、正。
呢個租單車MODEL,真係大陸先做得到咁大規模,由於歷史原因,大陸大部份馬路一直都仲有一條行車線留俾單車同電單車,街角一般都會劃定幾格泊單車。香港呢,單車係運動、遊戲,唔係交通工具,政府要迫你搭小巴大巴同地鐵,踩單車上馬路好易俾啲貨車跑車撞死無命賠。

當然,呢架MOBIKE又唔係無敵嘅。佢好扎實,用料應該好好,咁咪重囉,我踩半個鐘一個鐘都OK,有啲女仔就話踩十五分鐘會腳軟。另外,架單車無餸籃,攞住野真係唔知點踩。想踩車之前要準備,一係就兩手揈揈,一係就揹定個袋。

大陸好多文章講呢個Business Model,講呢間「單車舖」,仲有佢嘅對手ofo。聽講佢地同啲風險投資基金籌咗億億聲嘅資金大搞。讀者有興趣自己查,我上面講下用家感受架咋,唔係賣廣告。

嗱,喺大陸呢,有競爭就有進步,競爭爆起上嚟,係會億億聲咁補貼消費者嚟搶市場架,小民無得食大茶飯,但遇著呢類行業大戰,攞補貼著數之類就唔好客氣嘞。早兩年,大陸人人搭的士好似唔使錢咁,係,真係幾蚊搭的士,就係靠兩大網約車APP為搶生意狂用現金補貼司機同乘客,消費者同工人算係SO咗幾年架。依家其中一家用收購對手嚟統一天下,無咗補貼不止,仲為在司機同乘客之間賺差價。好現實,競爭就客SO,壟斷呢,就要謀暴利架,諗下一每程車收一個幾毫,個APP已經整好,個Server就係咁行,老細就坐喺度收錢。(實際係網約車APP嘅白牌打殘咗的士公司嘅既得利益,啲的士公司邊個開架?忍咗你地幾年,你地有俾補貼先放過你,依家你要錢,一於講多啲政策呀、安全呀、保護本地人就業呀嚟對付佢。呢個故仔,大家可以上大陸啲網睇。)

唔知幾時單車APP會同政治、網約車一樣,一家玩晒呢?

理得佢咁長遠咩?依家一蚊雞租車,踩得一日咪一日囉。

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 146213
Date: 2016-11-18 16:40:01
Generated at: 2021-12-09 05:23:42
Permalink: https://www.vjmedia.com.hk/articles/2016/11/18/146213/【又係中國】一蚊雞單車