大家知唔知現時咩職業最常搵私家偵探查伴侶有冇出軌?

 

Long D嘅愛情,比起一般情侶更加難維繫。
但點先算係Long D?要有時差先算?台灣香港算唔算?荃灣柴灣又算唔算呢?

女朋友豆姐答我:「我哋都Long D緊吖~~」
「我哋每個星期都見,半粒鐘車程…Long乜鬼啊?」

原來喺女朋友心目中,即使兩人相隔唔夠五分鐘路程,只要見唔到面都算係Long D…

兩人分隔兩地,好容易會有缺乏安全感而導致猜忌嘅情況。
就好似我女朋友豆姐咁,佢相信我唔會同其他女仔出街。但係都要問我喺邊,我問佢咁做有咩意思,佢話:

「我知你唔會呃我㗎,但唔知點解,聽到你親口講一次,我就會安心好多。」

為咗令佢安心,有時我試食啲新餐廳,都會影張相畀佢,再加一句。
「呢間幾好食,下次一齊試吖~」
簡單一句說話,女朋友就會安心,亦唔會問長問短。
因為佢知道,就算我出去食飯,仲記得有個女朋友…

最近, 我一位朋友佢叫阿永,佢亦遇到同樣嘅煩惱。
大家知唔知現時咩職業最常搵私家偵探查伴侶有冇出軌?
富商老婆?醫生?老師?
通通都唔係,原來係…空姐。

佢同拍咗五年拖嘅女朋友鬧大交,仲嘈到要分手。
我點都估唔到,阿永同女朋友會搞到要分手咁嚴重,因為佢平時經常都喺面書放閃光彈,又成日同女朋友去旅行,聽佢講過仲安排緊結婚添。

一見面,我即刻問阿永發生咗咩事,原來佢發現女朋友搵偵探查佢,覺得好無私隱,亦完全唔尊重佢,所以鬧咗一場大交。

「乜你殺咗人咩?做乜要搵偵探查你…」
「佢驚我喺香港偷食啊!!」

阿永遞咗張卡片畀我睇,上面寫住『當妳飛咗,佢做緊乜?』
聽佢講,早排都覺得怪怪哋,發現面書同E-MAIL都畀人登入過,返工放工又有人跟蹤佢。阿永係一個普通人,點諗得到自己無啦啦畀人跟蹤?!

阿永仲話,事後發現,原來佢所有網上帳號密碼,都係女朋友主動交畀偵探。不過佢最嬲嘅就係,女朋友竟然搵個空姐朋友開個新面書帳號,扮喺網上識到阿永,仲主動約佢出街,想睇佢會唔會趁女朋友唔喺度就偷食。

以我認識嘅阿永,係一個絕種好男兒。佢聽網上面好多人都講,做空姐好容易會同機師、空少、甚至外國乘客做出出軌行為。所以十分之鍚佢女朋友,對佢亦都好信任,覺得問長問短,係一種不信任嘅行為,所以女朋友飛去邊,去做咗啲乜,阿永從來唔過問…

但估唔到,有次女朋友返到屋企,阿永就喺佢行李箱入面搵到呢張卡片。

阿永一問之下,佢女朋友就講晒所有嘢出嚟,佢話好多已經結咗婚嘅空姐同事,都有請偵探check住喺香港老公,仲聽見有幾單個案,個老公真係會趁老婆飛咗,就走去搵第二個女仔返屋企過夜。

人嘅擔憂會演變成一種病態,愈係唔放心,就愈想查出真相。所以阿永女朋友,唔單止請私家偵探,仲搵自己個朋友去試探阿永。

阿永問我,仲應唔應該同女朋友喺返埋一齊…?

其實,阿永同佢女朋友之間最大問題,就係溝通不良。
女朋友嘅安全感係永遠無法滿足。
唯一可以做嘅,唔係迴避佢,嫌佢麻煩。
而係設法咁拯救佢嚴重缺失嘅安全感。
現今通訊科技咁方便,其實只要「主動」send個whatsapp,或者嚟個Facetime!
就算簡單一句hi bye,女朋友都會安心晒。

 

 

關於作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。