“YO” 已經成為同大學生的價值劃成等號

(photo via cc Flickr user Francisco Osorio)

(photo via cc Flickr user Francisco Osorio)

 

大學係社會既縮影,只有兩種人係會成功同埋受歡迎,第一種係善於社交既人,大學叫做YO,只要你夠YO,你係大學入面夠多朋友,咁你既價值就可以確立,好似明星咁樣人人都識你,住hall又識,自己個學系又識。第二種人就係交際力普普通通或者係唔主動交際,但佢地係叻到好出名,唔使在意人地既眼光,因為佢地唔志在不停去識朋友,只會專心佢地想做既野,最後佢地當然係會成功,否則都會出名,就係出名毒同埋怪。不可否認既係有人成又勁同時又玩得,但呢篇放既重點係聚焦大學生已經用yo唔yo去衡量一個人既價值,呢樣係唔係一種好事?

無可否認良好既社交能力可以令你既道路更加平坦,但yo呢樣野應唔應該成為大學生價值既全部呢?有時候我地會唔會因為過份去強迫自己變yo而失去左自己呢?

因為yo,你要戴著一副善於交際既面具,有時什至會影響到人。為左人地要尊重你,覺得你識好多朋友好威,所以你無時無刻都要好活潑,好主動去識朋友。電話既群組不成咁響,明明係無聊野,或者係完左topic既野,你都會費神去諗點回,點樣帶起新話題,令到自己經常要對著手機覆whatsapp。見到朋友係facebook到打野,你又要係下面留言,每個朋友不論熟定唔熟,你都會留言,等佢可以記得你,如果我同你真係朋友既,根本唔使咁做,咩都自然就得,但你偏偏個個都要諗點回,等佢知道你既存在,其實咁樣做,有時候真係好攰。

上堂果時,你都要不停同人地搵話題傾,有時候明明人地想安靜下既,你就挑起話題,人地答你,大家笑既就無所謂,我仲要好多謝你咁識帶氣氛。不過人地唔應你果時,唔該你唔好話你人地毒,你有冇諗過人地唔係唔想傾計,只係可能唔想同你傾計?

因為yo,你搞到自己無時間讀書。我幾時都反對d朋友仔話讀書係最重要,不過入得大學既,如果你搵唔到興趣,又冇特別既能力,咁你都係乖乖地做下樣讀書啦,畢竟點都要畢業既。最慘既係你掛住出去玩,唔單止害到自己,仲會害到人地。大學分組點都會有d唔做野既freerider,人人都買佢怕,但係佢地最後點都會有組,因為佢地識朋友真係好叻,成日都好yo,yo到唔讀書,掛住玩,所以冇人想同佢地一組,但同時佢都會有一班朋友仔,捱下義氣同佢地一組,不過少不免一定會係背後比人話架啦。

如果因為要yo,要識朋友,而搞到自己唔識得安安靜靜溫書,做功課既話,咁樣真係岩咩?大學生連溫書都要放上網,呢個情況就好似打工仔番工果時自拍自己部電腦話自己要番工做野啦一樣。你本份黎架老細,使唔使咩都要同人地分享啊?ps我都有錯既,你分享係正常既,係我呢個垃圾冇啦啦按入去睇姐,對唔住我出番去先。

點都好,yo可以係一種性格,可以係一種天性,有人會因為識朋友而開心,正如有人好專心讀書一樣,呢樣係唔可以改變,同時都冇錯。錯既係一班為左識朋友而識朋友,為左yo而yo,但明明自己唔係呢種性格既人,咁樣做法,辛苦既係你自己,仲有你身邊既朋友,唔知幾時你會因為自己既失控,而冇啦啦對身邊的朋友冷淡,反而會搞到人地唔開心。

做人更加唔應該因為人地唔yo而取笑人地,話人地摺,摺唔係一種錯,而係一種性格。摺友冇錯,因為呢種係天性,我地冇害人,冇影響人,冇上堂嘈住哂,點解有班人仲要因為摺而笑人地?就係因為大學唔yo就唔可以立足?

摺友都唔使傷心,更加唔好傷心,你地唔使在意人地既眼光,你身邊既朋友夠就得,正正因為你朋友唔多,你先可以一心一意支持佢地同埋對佢地好。你更加唔使怕對邊個好而怕得失邊個。

「喂!你組爸係邊個啊?唔好提啦,都冇人識佢既。」

「呢條友好摺架喎,都唔知佢係到做咩,古古怪怪!」

「嘩,佢好yo架,上hall莊架喎!」

Yo雖然唔會有人講到出口話係好威好勁,但唔知幾時開始,yo就成為一個為人讚揚既性格。有時候做人唔一定要為yo而yo既,更加唔好因為人地唔yo而睇唔起人,yo唔應該係你第一個判斷同學既形容詞。

 

作者:筆知所謂

閱讀後覺得好,請多多讚好及分享~:)

其他熱門文章

  • 【遊戲介紹】彈幕生存遊戲新作 《Rogue: Genesia》吸血鬼倖存者挑者戰掘起 by 五木
    之前推出嘅彈幕生存遊戲《吸血鬼倖存者》(Vampire Survivors)雖然無華麗嘅畫面,但係有趣兼充滿魔 […]…
  • 李怡先生,謝謝你 by 馬黑白
    自小媽媽便說,有空時要多聽李怡先生在香港電台的《一分鐘閱讀》,因為每日講一本書,每日說一道理,絕不簡單 。近年,媽媽因病離世。在媽媽人生中的最後數月,床頭總放著他的《閱讀人生一百篇》,她入住過幾間醫院,此書也是隨身攜帶。當時我會讀書給她聽,…
  • 專訪「政見唔同就分手」Heather Yeung:「我係香港人囉!」 by 清君
    我就對「政見唔同就分手」的Heather更有印象和好感,於是膽粗粗邀請她做訪問,當時由於見到雲海的「東張西望inbox」post,我滔滔不絕的解釋澄清自己不是騙子,她也知道雲海那個post,於是莞爾,笑了。然後相約於北區某咖啡店等,可是作為…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • Zopiclone——傳說中的安眠藥「白瓜子」 by 小小藥罐子
    Zopiclone,可以讓人入睡大約6至8個小時,所以,一般建議連續入睡至少8個小時,避免出現「宿醉(Hangover)」的機會。所謂「宿醉」,簡單說,透過安眠藥入睡後,如果睡眠的時間不夠長的話,醒來後,仍然可能會覺得睡意未散,頭昏腦脹,影…
  • 中咗Covid,我終於可以休息 by 小盛女
    平時好少人打電話嚟,但係同事開始知道我中咗之後就一日收幾個電話,關心嘅說話當然有,但重點都係公事…
歡迎讚好我們的facebook page,免費資訊源源送上。

文章資訊

ID: 146658
Date: 2016-11-25 19:09:45
Generated at: 2022-10-06 23:53:04
Permalink: https://www.vjmedia.com.hk/articles/2016/11/25/146658/yo-已經成為同大學生的價值劃成等號