一過左八歲,男仔既一生就已經玩完。

男童 女

 

我話俾大家聽,其實無一個男仔可以逃離八歲的大限。一過左八歲,男仔既一生就已經玩完。

有科學統計指出,一個男仔係八歲,仲未發育,毛都未生,亦未變聲,係可以有機會因為面試而加入維也納兒童合唱團的。但係當佢一踏入青春期變左老牛咁既聲,SORRY佢已經GG了。而且好有可能,佢既皮膚亦都開始變粗,毛孔放大,而且會生暗瘡,隨時因為荷爾蒙分泌失調,而搞到自己塊面變左火山炕洞,變得唔再可愛了,唔可以再痴埋D姐姐到扭計了。

八歲係男孩子仲可以肆無忌憚做大爺既年紀。佢可以目中無人咁自己玩佢既手機睇低能卡通片,無人能夠阻止,亦都無人能夠恥笑。而唔玩手機,佢係個地鐵度拎架消防車出黎碌碌貢,亦都唔會有人拍佢片放上FB到鬧鬧鬧係廢青,相反可能仲會話小朋友活潑聰明真係好可愛添。

八歲既男仔,最多只需要煩下功課,唔需要擔起頭家,唔需要諗OT,唔需要擔心男性能力向下,亦都無必要去偷情。八歲既男仔,無憂無慮,甚至可以大大聲係屋企抱怨,點解自己早餐隻雞蛋唔係太陽蛋,而哭鬧一餐。佢地先係人生既贏家,根本上完全無得輸。而係依家咁開放既社會,八歲都可以去拍拖,甚至海誓山盟的,轟轟烈烈既愛情,不嬲都不受年齡環境影響。

我係呢度奉勸已經過左八歲既男士們。你地往後果八十幾九十年,都只係會係痛苦中渡過架唶。認命吧。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 146665
Date: 2016-11-25 17:58:32
Generated at: 2021-10-28 03:58:27
Permalink: https://www.vjmedia.com.hk/articles/2016/11/25/146665/一過左八歲,男仔既一生就已經玩完。