如果我仲係留在教育界浮沉,我會唔會都變成偷拍狂?

(photo via cc Flickr user See-ming Lee)

(photo via cc Flickr user See-ming Lee)

 

三十幾歲、小學IT、偷拍女副校,呢三樣嘢,我唔知有無因果關係,唔知邊個係因邊個係果,可能只係巧合,可能有共因。

古語有云,男人最緊要兩樣嘢,錢銀同女人,丫唔係,係事業同愛情。

人去到某個階段,就會諗番自己有D 咩無D 咩。

我都曾經係一個中學教師,同學校高層唔夾,唔洗做,呢個雖然令人唔忿氣,但職場之中好正常。我性格都係桀驁不馴,就算教得好,都無可能在保守既教育界之中生存。

人生好多野返唔到轉頭,好彩既係,我今日既生活都尚算OK,唔洗後悔咁話「早知就乖乖地教書算啦」,反而我係諗,以我既性格同埋際遇,如果我當初真係選擇屈住咁偷生,我今日會以一個咩人既身份繼續生存。

既然要想當年,咁當年我係點?其實我諗好多同我差唔多年紀,八十年代出生,OO年代出身又教書,都係面對無常額無長約既生態,呢個現象延續至今,要數就係當年八九民運之後既移民潮個陣入職既人,到我地入職,佢地就係四十幾歲,佢地入去做,係坐直升機咁升職,一定長約,無論教到點都係不動如山左十幾年。題外話,都係嗰句,我已經無意JUDGE 呢樣嘢好唔好,因為另一個行業既生態唔關我事,我作為一個男人,香港有個咁既教育界,我只係知道我絕對唔會生仔。

在絕對人治的教育界,首先大家唔好以為有咩客觀準則評核一個教師,因為講教得好唔好,都係由另一個人去判斷你,而負責論斷你的人本身都唔需要教得好,咁乜係好,真係玄過唐僧。

咁當年,我就係好唔聽話,高層話要俾功課,我就覺得唔俾功課佢地都學得好考得好,點解要俾;高層話要愛國,我就真係去講彭德懷講新疆兵團講六四播城市論壇,愛過龍。係囉總之就係唔聽話,唔聽話咪教得兩年就要走~

乜係聽話?當時既情景,聽話就係,我壓抑自己既想法,令自己做一D 我自己都唔信既嘢,我既選擇好簡單,如果我自己都表裡不一言行不一,我有咩資格教學生任何德育?講樹人?笑撚死人咩?

聽話就係壓抑,壓抑帶來D 咩?我諗每一個人都好清楚:一有機會就想逃避,想釋放,想破壞,想發洩,想放縱。軍隊係最荒唐的。

我見到今日單新聞,我係自省。做人點都好,千祈唔好搞到咁。唔係話乜嘢,有性慾咪去溝女,呢行撈唔起咪去第二行,唔靚仔咪執下個look,退一百萬步,份工唔decent,月頭出糧咪叫雞囉,三十幾歲人唔好搞到咁,真係唔好咁。

當年我選擇做番自己。咁當然,做番自己係有後果的,無教書之後既日子,朋友都應該知我係點過,唔熟既好難三言兩語講曬,之後有機會可以寫下,今日我可以輕輕鬆鬆咁坐係部單車機反思過去,可以有閒情幻想自己如果聽話會點,已經證明左我做既決定無令我死。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 147343
Date: 2016-12-07 18:03:22
Generated at: 2020-02-25 09:16:45
Permalink: https://www.vjmedia.com.hk/articles/2016/12/07/147343/如果我仲係留在教育界浮沉,我會唔會都變成偷拍