盤菜瑩子奧樂蜜C 被熱血公民「大軍」★☆☆☆☆皇天擊殺的戰略反思

廣告觀點 / 最新文章綜覽

 

唔知大家有冇聽過,一個二次大戰時期美軍嘅小故事。

話說,美軍注意到返航轟炸機上面嘅損傷,就由海軍分析中心做統計,搵出咩部位嘅子彈窿最多。咁就可以加強嗰啲部位嘅裝甲,令更多戰機可以返到基地。

統計完咗、研究做咗、結果有咗,正打算加裝甲嘅時候,一位匈牙利籍猶太數學家懷德·亞伯拉罕(Wald Ábrahám,匈牙利人先姓後名)就提醒美軍,應該要反其道而行,原本最少子彈窿嘅部位要加強,多損傷嘅位置就冇所謂。結果,更多美軍轟炸機可以返到基地,救返唔少美國軍人嘅性命。

點解呢?原來懷德係咁睇嘅:返到嚟嘅飛機,即係捱得住嘅飛機,個研究根本就冇考慮到返唔到嚟嘅飛機。有啲部位子彈窿多,係因為即使嗰度中彈,都唔會即時造成致命損傷,頂多一段時返基地慢慢整都得。冇顯示中彈嘅部位可能本身就係弱點,只要中一彈就足以擊落架飛機;所以懷德就建議中彈少嘅位置先要好好保護。

 

同理,呢兩日有班人,無啦啦去奧樂蜜C個專頁度,大量留言話代言人盤菜瑩子「唔得」,令佢哋唔會買云云。先唔論佢哋其實有冇買(利申先我未買過,因為一向唔好呢類飲品;廣告都係睇過一兩次,因為屋企冇電視),到底佢哋嘅一星洗板行動同宣稱罷買行動,係打中窿多嘅位,定係窿少嘅位呢?

首先,奧樂蜜C係賣嘢飲嘅,咁如果支嘢唔好賣,佢就死梗。咁問題嚟嘞,到底呢個搞咗成日幾兩日,到2016年12月12號晚12點,都唔夠兩百人參與嘅「唱衰瑩子大行動」,會對奧樂蜜C嘅銷路造成咩影響呢?作為一間跨國企業,少二百條友買佢嘢飲,而且呢兩百條友亦唔係咩有知名度嘅人,又唔係明確指出飲奧樂蜜C對人體有害,只係針對個代言人,會唔會影響到佢生意呢?何況入面仲有假人喺度呢?

奧樂蜜C嘅管理員又唔係唔睇comment架喎。佢哋嘅專頁管理員,會同留言嘅網民答嘴,甚至乎如果有人話買唔到,佢仲即刻查下個人聲稱嘅地區有邊間鋪有貨。相比之下,呢啲就真係一個兩個人,少過兩百人喎,佢又咁重視。咁係因為,有人問佢啲嘢飲邊度有得賣喎,真係客喎,你唔答一個、唔答兩個,就以後都唔使答架喇。啲客覺得你唔志在,做咩要買你啫?你支嘢平咩?

咁睇,呢兩百個一星評語,本身唔知會唔會買嚟飲,之後都未必會買嚟飲,又唔係針對產品品質,反而只係針對個代言人;同時個代言人又真係令佢哋支嘢好賣咗,吸咗二百人嘅幾十倍以致幾百倍幾千倍嘅客人返嚟。雖然近乎二百個一星評語,多過晒二至五星評語嘅總和;評語個位係畀人打咗二百個窿架喇,但係架飛機仲係飛得好定喎,咁點解要郁個代言人先?對盤菜瑩子嘅生意又有咩影響呢?

 

將呢件事比做二戰打飛機啲子彈好似抬舉咗佢哋。不過我睇好佢哋呀──因為終有一日代言人合約係會完約架嘛。

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 147681
Date: 2016-12-12 23:31:55
Generated at: 2021-06-24 21:11:12
Permalink: https://www.vjmedia.com.hk/articles/2016/12/12/147681/盤菜瑩子奧樂蜜c-被熱血公民「大軍」★☆☆☆☆皇