你上過青城山未?

最新文章綜覽 / 走遍天涯

 

 

你知道青城山喺邊嗎?你有冇上過去?

青城山離成都唔遠,好近都江堰。古語有云:青城天下幽。此言本非虛。不過如同好多名山大川一樣,只要有人,幾幽靜雅緻嘅地方都會變成江湖。

青城山依家設有山門一處。其實到咗山門,都已經上咗一段山路,此山門其實係查飛之所。無論如何,初入山門後,果然有幽靜之感,與門外石砌廣場喧嘩截然不同。

如今之青城,除以道教名山為招徠,又以自然好空氣作賣點。入其山門,古木參天,蔚然而深秀,山徑亦屬易行,最宜都市人避市半日。但係,沿徑玩賞冇耐,就有異味傳來:原來係當地之民入山吞雲吐霧。偏偏路徑只容二三人過,煙民上山者又不絕而嚟。最後只有死死地氣跟住行,唯望去到山上宮觀煙民自絕啦。

山行一刻鐘,徑盡處係渡頭一處,原來已係月沉湖畔。湖面唔算闊,但青山中平白得一潭綠水,亦覺可愛──如果佢冇起到條機動嘅嘩啦嘩啦喺度就係。

要繼續上青城山,就一定要去到湖對岸。渡頭坐艇過去自是一法,不過機電器械聲,加以排隊煙民味,甚掃雅興。唔想坐艇,本又有沿湖小徑一條,但就告示當年地震之後徑已失修,若要經小徑繞湖,後果自負。講到咁,都係局你坐艇啫:因為收你五蚊一位嘛。因為同行仍有旅伴,唯有坐啦。

渡湖之後,以為繼續係登山小路,卻見大樓一幢橫立在前。原來係青城山嘅纜車站,三十蚊一程又局你上。不免從俗而上,站內人山人海,上到山上亦係人山人海──原來山門之後一點幽靜,係因為人人都棄幽不顧,上山尋觀。

山上有上清宮,留有蔣中正、于右任題額,於中共治下,石額尚存亦甚難得。只係觀內一處,早又闢作旅館,供宮觀取利。隨便走一圈,人山人海,隨行友人已覺無聊亦無可觀。略略打卡自拍就話要走。其實即使唔妥老蔣,都有于右任睇吖……

落山之後,其實都覺此次行程索然無味,無足道者。不過一睇,「景區地圖」,原來只要唔坐嘩啦嘩啦唔坐纜車,青城前山係宮觀亭台處處;既然人流由俗物引走,徒步登山,必得其幽。

故曰惜哉青城:亂徵外物,引嚟一眾俗人,上山不食山間精氣,而係自攜雲霧,污染山林;貪快登山,棄其林中清雅;即抵山上,上山人如喧囂過市、守山者取利為務。常人上山,影相打卡沽其名;慕名而來者,則難得其勝,失望而回。如此青城,一至便足;山主雖云後山更勝,但前山之壞已成,後山果有藏珍,亦唔撚想睇囉。

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 147786
Date: 2016-12-14 12:42:36
Generated at: 2021-06-24 20:13:56
Permalink: https://www.vjmedia.com.hk/articles/2016/12/14/147786/你上過青城山未?