公司聖誕PARTY,抽過咩獎令你最ODD?

(photo via cc Flickr user frankieleon)

 

聖誕節,辦公室既繁文縟節可以好多。識玩既一早請定假寧願俾貴D去外遊,於是咩大餐派對野全部避晒。有時,大家都明,你要俾HR揼心口科水搞場大SHOW,但係往往都唔會得到咩預期既效果,尤其是當中有一環節最ON9既,叫聖誕禮物大抽獎。

禮物大抽獎係其中一樣完全違反經濟學邏輯,但係仍然存在於世去害人既一個過程。首先,你要俾出一舊錢,然後你往往可能收番遠低於原來科水既禮物。第二,果舊野由於係實物,所以即使你抽到比較貴重既產品,但如果係唔岩你用的話,果樣都係形同廢物。而又建基於多數如果你想換既都唔方係咩好野,所以往往亦都無人會肯同你進行交易,換句話說,呢個表面睇起黎人人開心既玩意兒,其實只係好少人歡喜,大部份人愁。

當然,當中都好睇D搞手係咪真係識做既。有好多時如果都以CASH COUPON之類,雖然都有損失,但係受創就比較輕微(連卡佛果D其實都好仆街)。我見過有最ODD既情況,包括男士抽到名費既化妝品套裝啦(個司儀仲話:可以送俾女朋友!但其實果名同事係無女朋友的,人生);有根本未有自己屋企既人抽到吸塵機啦;甚至有岩岩失婚既女同事抽到黃金海岸兩日一夜酒店套票的,結果搞到部份人黑都面晒,咁又係何必呢。

其實解決辦法既問題唔係無既。最好就係科水的話,老細要夾到有咁大份得咁大份,而細既只係EXPONENTIAL咁夾果少少。然後,最好係抽完獎,即刻係出面設一個貼現窗櫃位,可以重新將實物折現番現金。不過現實係,要叫老細俾多D錢,老細肯,班擦鞋仔都唔會肯啦。至於又要其他人去做多D野,咁Q煩,你睇下有無人會理你?MERRY CHRISTMAS啦老友!預祝各位今年唔係抽到午餐肉先!

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 147958
Date: 2016-12-16 13:51:18
Generated at: 2021-12-09 18:27:26
Permalink: https://www.vjmedia.com.hk/articles/2016/12/16/147958/公司聖誕party,抽過咩獎令你最odd?