宅男的公仔機攻防戰——兩爪惡魔(上篇)

 

「傻佬,原來呢度有大隻既Melody!早知我地就唔夾住啦!」女孩子見到鐘意既野的確好「興奮」,所以唔難解釋到點解一間房入面有好多隻唔同造型既公仔(同一卡通人物),精品擺設等等…….

基本上大型少少既公仔/擺設十居其九都放入兩爪機入面(兩爪機係現今最多既機種,亦係難度比較高既一種。TAITO同SEGA出品既比較多,而SEGA既機叫做UFO Catcher),而兩爪機同三爪機既分別除左係爭一個爪之外(雖然係廢話,但難度相對地大幅增加),控制方法都唔同哂。

 

筆者先大概講下控制方法有咩有唔同,之後再講技巧上既野。兩爪機有分兩種控制方式,一種係「一次性控制」ー 即係只有一次禁制控制既機會,過左龍基本上就可以乖乖地入錢再黎過(除非你既幸運值超高),另一種就係用Joystick控制夾既位,而爪可以360度旋轉,方便各位玩家(表面上易玩左,實際上當然唔係啦,只係賺錢既手段)。同三爪機一樣,完全唔較既機根本可以1Take過帶走你想要既野,不過大前提你都要有番少少基本技巧先做得到。

而兩爪機落爪既時候先係會兩邊開爪(開爪幅度固定,開爪幅度就係爪既彎位突出處,視乎機種而定),之後再落爪,到達最低點既時候(爪掂到機台/下層公仔就判定為最低點)收爪。好多時玩兩爪機點解成日夾唔到呢?其實就係因為大家唔夠了解個爪同埋利用唔到爪既特性去夾落去,所以點解好多時大家都夾唔到而白交學費。

 

今時今日玩夾公仔機都唔係單純地「夾公仔」咁簡單 ,而係變成左一場同商人鬥智鬥力既戰爭,大家不妨諗下咩情況商人先係最賺錢?

可能大家會覺得就係「夾唔到玩唔掂既玩家」(相信大家遇到唔少),但問題係夾幾下走左去邊有肉食,兩三下credit邊圍到皮?最多係將遇到高手所蝕既拉番匀,而未算係最賺錢既目標玩家,而最賺錢既Timing就係個目標物(公仔/Figure/獎品)就黎夾到既時候。試諗下,當你幾經辛苦又出血(荷包)又出汗將個目標物帶到洞口附近差唔多到既時候,作為一個正常人既心態都唔會放棄不停入credit預求將目標帶走,但好多時候都不得要領,導致越入越多。

商人表示:「我最期待既畫面出現了!!」到底係咩畫面呢?等我大概講下啦。

 

1)有意無意地將目標物夾到去死位/令目標物「碌」番轉頭;碌番轉頭仲有得救,入多幾個credit調整番去近洞口位置。(有可能越搞越走位,越搞越衰,賠了夫人又折兵)註1**

但如果去到d死位就只好禮貌地/口甜舌滑地(Your face you fate,真係睇人,btw用個小朋友去做餌係最Work既)叫個妹妹幫你擺番好位啦,再唔係就乖乖收手啦。註2**

 

2)有d位你以為得但實情係唔得; 當你天真地以為一步登天搞得掂之際,唔同花式既Mistake就會令你不停入credit。記住好重要既一點:「個夾唔得就唔得,無力就無力,唔好諗住同一位夾10次佢會奇蹟地俾你夾到!」註3**唔得就轉方法再黎過 ,除非死位,如果唔係無可能無變化。

 

3)心急落錯夾,夾空氣等等大頭蝦情況; 夾空氣只可以怪自己心急/大意,小事黎(有邊個未試過?)。而落錯夾就可大可小,或者有機會錯有錯著既(部機多目標物既情況下有機會,但好少),或者出現番第一點既情況。

 

4)緊張犯錯;玩親呢d機總會有人圍觀,不乏拍緊拖既男女,仲有靚女,筆者我自己當然瀨過野啦(好多女仔圍住既感覺真係有d緊張)!想夾到目標而得到歡呼聲當然要冷靜落黎夾啦。

 

「Yeah!多謝你隻大大隻Melody!」

喺佢抱住隻公仔開心既時候,再望一望自己銀包發現得番1張紅衫魚,然後再望到個西裝友展現出我先係勝利者既笑容,我就好清楚知道,我又輸左。

事後筆者睇番先知道隻公仔零售價係12x蚊,而我就用左20credits即係160蚊先夾到,咁你話年中賺幾多?

 

下一次就會以圖文並茂逐個方法講,敬請期待!

 

註1:碌既原因係因為目標物/機台設計問題。(圖1)

 

註2:死位定義好難有個明確既定義,但不外乎以下幾種情況:

1)個目標物去到d個夾完全去唔到既位(包括旁邊既邊位),就算你有一邊夾可以掂到個目標但個爪根本無力郁到佢 。
2)目標物攝實左機台既邊位/柱位(圖2)

 

郁到就唔係叫死位啦。

 

註3:都係果句,無力就無力,郁唔到就郁唔到,無論你入幾百credit都一樣。即係等同你張提款卡無錢就無錢,禁唔到就禁唔到,無論你禁幾多次一樣都係無錢!有既話我知,借黎俾我禁下。

 

Ps. 配圖兩爪機你見到個夾係唔對稱位置,即係做過手腳,難度又提升唔少。

Ps2. 圖1同圖2我係用上網夾公仔機既cap圖講解…

Ps3.冒險樂園既公仔機同NAMCO一樣做過手腳

 

作者:陽光宅男

陽光宅男
人如其名,只係一個有陽光氣息既宅男,鐘意打機9up講笑話但懶到出汁,保證大家完全估我唔到。FB PAGE 陽光宅男Ken

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 147987
Date: 2016-12-17 05:52:21
Generated at: 2020-11-29 09:26:21
Permalink: https://www.vjmedia.com.hk/articles/2016/12/17/147987/宅男的公仔機攻防戰-兩爪惡魔(上篇)