【長住先會發現】德國醫療是咁的

 

(photo via cc Flickr user Eric Wahlforss)

 

1) 原來眼部發炎引致嘅重影你可以令你發現,去咗一間醫院之後護士可以同你講「我呢間醫院搞你唔掂呀你自己爬去遠少少嗰間醫院啦」(而講緊我隻眼係會四級樓梯睇到八級嘅時候嘅事)最後令你比人送入腦科——因為佢地擔心我個腦有事,所以訓咗五日醫院,發現德國晚餐係對餐餐食熱嘢香港人一件好痛苦嘅事,但同時發現德國就算公立醫院都環境好好,公立都可以只係兩個人一間房~同埋唔會你未病好就趕你出街。雖然環境好,但最後係原本要stay多日等report我都堅持早一日返屋企,因為住醫院搞到我好抑鬱——個個都有好多朋友嚟探但我自己係得我flatmate嚟,人生。

 

2) 對於唔少病症嘅德文名認識多咗(唔少部位嘅發炎我都識點叫)因為就快乜炎都發過哂,而你會對唔少病症長咗知識,同埋我係喺德國先第一次試拔罐:o(

 

3)傷風感冒:基本上唔洗睇醫生嘅——除非你要病假紙。因為入到去你就快咳死嗰刻,佢都係叫你飲多啲薑茶訓返十日八日就得架啦-雖然對要快手搞掂病痛嘅人係痛苦,但其實呢招係work嘅,所以返到香港病咗,醫生多數都唔睇,如果要chur嘢先食下幸福傷風素舒緩一下啲病徵

 

4)獸醫:喺德國都有獸醫(所以對德國唔好咁多ff)——一入到間房度同佢講病咗四日想問下點醫好佢,佢會第一句問你「你要幾多日假紙呀小姐?」。之後原本都唔打算比藥我,係我開口話我喉嚨好痛之後佢先照下,先發現係扁桃線炎,先比下啲抗生素我 (我知抗生素唔係隨便食架,但係我個額頭已經寫住我係病,起碼都應該主動幫我照下個喉嚨呀喂)

 

5)睇醫生:有咩事都唔好星期五同周末病,因為無咩醫生會開門。解決方法係,一係你去公立排急症等返三四個鐘,一係你就自己喺屋企典多兩日等星期一醫生開返門-星期一開門仲要約架,唔好以為星期一就有得睇。:o( 當然,如果怕打電話,呢度啲醫生有唔少可以做online booking,(例如係,你可以上呢個網book: https://www.jameda.de/  )

但係如果你星期五病,走上去個system度book星期一睇,多數醫生/個system本身都會彈你個application :o(

 

6)醫療保險:超級重要嘅事——特別喺歐洲。嚟讀書嘅如果唔買係會喺大學做唔到註冊。有朋友上次嚟咗肚瀉瀉到脫水,旅遊保險要佢墊住先,吊咗兩包鹽水訓咗兩個幾鐘收咗佢百幾歐~如果有保險嘅就唔洗咁貴,上次我訓咗五日醫院只係比咗50歐(同時都有吊咗好多包鹽水)

 

7)醫療市場:公立醫院/肯睇有公營醫療保嘅診所都唔少。一方面好就好在唔會搞到好似香港咁,醫生做哂私營搵錢;但另一方面都代表住你有少少錢都唔可以即刻解決問題,無得好似喺香港咁,urgent要醫生好就去睇私立診所/醫院都唔會話超貴,但係呢度真係可以唔洗諗有呢個option~

 

8)事前避孕藥:喺呢度亦都係好common,而如果你有經痛相關問題,佢都係開避孕藥比你調經。姑勿論如果喺中醫角度佢對身體有幾差(所以中藥朋友唔好彈出嚟罵我住我知架啦唔好皇天擊殺我),可能就係因為咁common,呢度唔會好似喺香港咁,你一食避孕藥你就會有歧視目光先-都係藥嚟姐仲咩咁望住我,我都係唔想再經痛姐。例外,唔同香港,呢度買事前避孕藥係要醫生處方,醫生會mon住你嘅情況,唔會隨便買到。至於事後緊急避孕藥係唔洗處方,直接喺藥房買

 

9)醫藥分家:喺藥房先會買到藥,醫生只係處方。其實都好嘅,有時唔知個醫生up乜都可以問下藥房其實隻藥點用。

 

10)讀醫:呢件事喺度亦都唔係話你高分就做到。喺度要讀醫,除咗要成績好,仲要你入學試,因為高分嘅人實在太多-同埋高中公開考試高分唔代表你會係一個好醫生。所以啲人都會take year break嚟prep;如果唔夠人高分嘅就讀一啲同醫療相關行業嘅訓練,例如係做救護員,讀哂佢都可以為你喺醫科入學試加分(source:而家讀緊救護員培訓又想考入醫科嘅室友)

 

突然咁多嘢想寫,因為第一而家係星期六,而我又病咗星期一等醫生開門啦你老味;第二係其實有好多看似係常識嘅嘢(例如話傷風感冒基本上唔洗睇醫生),但係我係嚟到呢度之後先知~

 

利申我呢啲觀察係病人角度出發,我讀純藝術架,所以如果感冒到完全唔尋常但又唔去睇醫生有咩事我唔會負責架

 

作者:Cmw Boni

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 148060
Date: 2016-12-17 17:14:44
Generated at: 2021-12-09 05:27:42
Permalink: https://www.vjmedia.com.hk/articles/2016/12/17/148060/【長住先會發現】德國醫療是咁的