【俄羅斯駐土耳其大使被殺】第三次世界大戰?無咁易

 

俄羅斯駐土耳其大使被殺,我見到網上一片第三次世界大戰開打之聲,似乎原因就係因為果陣大家讀西史都知,一戰既其中一個原因就係當時一九一四年既SARAJEVO事件,即係Franz Ferdinand 大公遇刺身亡。

有咁樣既聯想,實在係無可厚非。我亦都唔會懷疑,呢單野可能會影響成個土耳其以致世界既政治局勢,但係咁快就跳到去世界大戰,我覺得太過冒進,而且對於我黎講係欠缺說服力,簡單黎講我係唔BUY。首先當時係一戰時期,各國捲入戰事既其中一個背景係你同我又簽左聯盟,佢同佢又話大家一定要共同進退,所以刺殺一案之後,奧匈帝國出最後通諜,然後其他國家就硬著頭皮迫住一齊「共存亡」。問題係,依家如果三戰開打,邊個同邊個打先?

土耳其局勢固然極為複雜,但係普京暫時既處理都係歸類為恐怖事件(當然有史學家一直話恐怖襲擊浪接浪就已經係第三次世界大戰),會加強對付,如果係咁,大家都係繼續暗地裡抽水,係並不足以構成大型戰事既可能。而同時奧巴馬政府同俄羅斯既角力,亦會隨住特朗普上場之後明顯改變。如果一如分析所料特朗普係親俄拒中既立場,俄美關係並唔一定會係呢次歷史事件關係中惡化。

如果將依家既世界版圖當成古時三國,都未嘗不可。美俄中都各自擁有一定既實力,但係你問我主觀判斷,中國一定唔想打仗,因為佢裡面既經濟情況係有排搞,所以今年中央經濟會議,繼續講埋晒D咩持續社會經濟深度改革類物,明顯金融市場仍然有排佢頭痕,一個唔該自己貨幣都保唔住?點打?打條毛咩?返屋企啦。睇番普京,呢個人唔係話唔敢打,而係佢城府太深,佢會慢慢睇下特朗普真傻定假癲先,再諗點尋求佢自己最大利益。

返番去經濟層面,依家廿一世紀,資訊較為流通,而且世界貿易未倒退到去二三十年代果陣咁差,除非保護主義去到一個新頂點,先可以作別論。世界大戰既成本已經極為昂貴,不爭事實黎,除非真係有如金正恩既狂人除左口炮之外真係發動核戰意圖毀滅世界,我暫時仍然覺得第三次世界大戰既機率好低。打經濟戰、貨幣戰或者網路戰,不戰而屈人之兵,似乎就更加合乎成本效益。暫時睇唔到資金流向避險,金價同石油亦無太大反應。

我明白好多人都會想打仗既。道理同係特朗普同希拉莉之間,揀殞石撞地球一樣。但唔係就咁倒模就算囉。咁樣同坊間有D分析師大玩貼圖派無分別喎。不過又咁講,世界末日都年年有人講。完。

 

利申:純吹水,正業非GLOBAL STRATEGIST。

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 148277
Date: 2016-12-20 13:09:32
Generated at: 2021-10-28 03:16:30
Permalink: https://www.vjmedia.com.hk/articles/2016/12/20/148277/【俄羅斯駐土耳其大使被殺】第三次世界大戰?無