「正義戰士,魔動王地隱俠,請你現身啦~」

 

細個我第一套接觸既機械人動畫,可能就係《魔動王》。

超鍾意睇,雖然我果陣可能都唔係太有心裝栽,對成個故仔又唔係真係太有印象,但我好記得個召喚機械人畫面,真係好好好經典。主角要首先拎個有大衛之星既魔動硬幣出黎,好型咁樣轉佢幾下先,之後先放入之魔動槍到發射。然後個地面就會出現一個相同圖案既魔法陣,隻機械人先會現身。係呢個時候,當然少不了一個極其熱血既背景音樂,然後主角仲要唔知係邊度拎塊滑板出黎,以高速滑向機械人,再係半空翻騰,換埋套戰衣,入去機械人入面,一氣呵成。

之所以提起魔動王係因為今日有新聞話動畫監督井內秀治走左,終年六十六歲。其實除左魔動王,係香港到今時今日都仍然係人人講得出「機會黎喇飛雲」既《魔神英雄傳》,一樣有佢手筆。至於我地果陣仲有大量既動畫係閃電傳真機入面播,其中有一套又係極高知名度,《媽媽是小學四年級生》,我相信我地個年代亦有唔少人有印象。果陣仲好興搵歌手唱粵語版主題曲,係湯寶如既《寶貝甜心》。其實講下都已經可能超過廿年……

我地去到呢個年紀,都無可避免要同身邊既人或者事,逐一講再見。有D野當然可以珍而重之,但係有D野你無論點樣去追,都注定會係你身邊溜走。雖然大家可能都對井內秀治個名好陌生,無咩CONNECTION,但再妨再諗番起《魔動王》主角既配音,係邊個?其實就係配大雄既娟姐盧素娟。

屈指一數,大大話話,娟姐已經離開左我地十年啦。唔知佢同保全叔依家係世界既另一邊,點呢?諗起個心都有D乸住乸住。。。

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 148331
Date: 2016-12-21 00:27:29
Generated at: 2021-10-21 06:29:56
Permalink: https://www.vjmedia.com.hk/articles/2016/12/21/148331/「正義戰士,魔動王地隱俠,請你現身啦~」