《TIGER×DRAGON!》(龍與虎):愛情與友情之間

 

有時到臨近聖誕既夜晚,都會不其然諗番起將近十年前既神番《龍X虎》(!!)。

我之前有寫過《四月》,大讚入面角色塑造,感情描寫,極其出色。但若論友情愛情中間既選擇取捨同矛盾重重,其動人之處,《龍與虎》絕對係一等一,佢心理表達手法之細膩,對白既鋪陳,亦都同樣去到顛峰境界。

人既感情,係好奧妙既一樣野。以為自己掌握得到,控制好好,甚至認為自己一如以往鍾意得一個人,不管對方是否心有所屬,都可以繼續落去。但到某些因素變左,有D人既底牌揭露左,唔同左,到某一刻,先發現原來自己既真心,絕非一成不變。

所有一直鋪陳令自己心底裡取信既所謂真象,都一樣會係果剎那,吹彈得破,土崩瓦解。一切都已經醒悟果陣,但係果個人,可能已離自己好遠好遠。能唔能夠及時把握機會,定係同最愛就此失諸交臂,講自己有無爭取之餘,最後亦講求命數與運造。

其實故事入面,人物亦唔算多,只有兩個男主角,兩個女主角,本身唔算複雜,但係隨住劇本推演,竟然層層遞進,變成剪不斷,理還亂既複雜關係,連觀眾身處局外,都接近茫無頭緒。故事一直圍繞校園,例如上堂,搞學園祭,去旅行,根本講唔上情情塔塔,你甚至見唔到到一條清晰到好似TVB咁既多角關係線。

一切像霧像花,心照不宣,自己推敲。正因為咁,睇落絕非婆婆媽媽,反而有一種異樣既清新同埋共鳴。其實愛情,往往就係不知不覺間滋長,邊會係所有人都只係終日追追逐逐,唔駛上堂返工咁超現實?多線主線暗線互相扭埋不斷發展,推至高潮,就係該劇最成功之處。

講番聖誕果幕,女主角去完聖誕派對,仍然堅持推走一直照顧佢既男主角,唔駛陪佢,仲要笑晒咁鼓勵佢向另一位女主角表白。但到得番自己一個人,先發現果種孤獨,同埋自己對男主角既思念,已經超出自己所能承受,化作眼淚不能控制咁奪眶而出。原來某人已經係生命中搶佔左最重要既位置。女主角急到連外套同鞋都唔著,就撲出大廈,係街上邊大叫男主角既名,一邊四周張望,但都無人理佢,自己最後只能一個人係黑暗既街頭放聲大哭。

女主角果下獨白,真係會聽到起晒雞皮,眼淺少少,都隨時出事。查實,《龍與虎》既經典場面,其實實在太多(例如課室迫供、雪山獨白之類),單憑一篇短文,不能盡錄。如果大家聖誕無咩做,不論你有無睇過,又有無人陪你過,都值得拎番出黎番煲。強烈推介。

 

(會唔會有好多人無睇過,唔岩年代。SOSAD)

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 148653
Date: 2016-12-24 05:20:34
Generated at: 2021-10-28 02:24:23
Permalink: https://www.vjmedia.com.hk/articles/2016/12/24/148653/《tigerxdragon!》(龍與虎):愛情與友情之間