九西文化區當然要擁抱多元文化,包括強國文化

 

 

林鄭係北京返黎,煞有介事話自己無見過中央官員,但係就欣然宣布會係香港既九西文化區(SORRY係西九至岩)起一個故宮。身為中國香港人,見到日本札幌機場大雪,嚴辭指責小日本,當然感到無上既光榮,應該第一個舉手贊成。

首先,西九文化區一定要擁抱多元文化,強國文化必然係其中之一,當中既複製,造假,意大利皮袋,法國時裝,全部都可以幾可亂真。我真係熱切期待一個故宮+藏品既完美複製,到時想去故宮睇展品,都唔係感受到當地既空氣污染食塵。中小學旅行又可以趁機去埋,國民教育一番,樂也融融。林鄭就算唔選特首,官到無求膽自大到一個地步,都仲要憂國憂民到最後一刻,大家如果咁都唔欣賞,就實在係太強人所難。

其實講番轉頭,我細細個就已經聽過深圳有所謂世界之窗,裡面應有盡有,又有巴黎鐵塔,凱旋門之類,依家香港有一個故宮,有咩問題??正是「中港經文加速融合」既真實體現,遲D只要本地老左愛國叫好叫座,隨時起埋萬里長城,移殖埋西湖,甚至係四川一帶既名山大川,處處險境,亦都將係不成問題,香港既土地問題,就可以即時透過填海造地解決。

林鄭以大熊貓左比喻,認為今次既文化盛事,同樣亦都唔需要任何公眾諮詢,我亦都係十分咁贊成。大熊貓黎左香港,仲要成日因為唔能夠成功及時行房而被傳媒評頭品足,俾四川既鄉親父老恥笑,成為香港市民茶餘飯後既話題。依家起一個故宮,都唔好講入面建築邊個承包等等既利益輸送,到時五年一大修,十年又突然東座西座齊齊因千年一遇颱風而倒塌,又可以係唔需要通過立法會既情況下,再次起過。

香港未來既經濟發展,亦都得以繼續上升。林鄭不愧為香港第一能吏。暗暗以呢一個政策,展視俾中央睇佢既治港藍圖。大家實在唔應該再對佢,口誅筆伐囉。我係鬍鬚的話,就會覺得繼續出BLOG口水戰無咩用囉。LOL

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 148905
Date: 2016-12-27 13:25:45
Generated at: 2021-09-23 05:45:55
Permalink: https://www.vjmedia.com.hk/articles/2016/12/27/148905/九西文化區當然要擁抱多元文化,包括強國文化