如果每月OT 過百個鐘要自殺,香港都死好多人

 

睇到新聞所講日本過勞自殺女仔單CASE,一個月加班過百小時,相信好多香港既打工一族第一個感覺,可能除左係慘無人道之外,仲會有另一個諗法,相信就可能係:

過百小時一個月既OT,其實都唔係好多渣嘛。。。

單新聞一出,好多人都即刻係FB叫我保重身體。的確,如果計一個工作日超時工作五個鐘至少,單計二十二個工作天就已經超過一百小時,都仲未計譬如星期六日,或者岩岩聖誕節紅字踩足全日果堆,就算當八個鐘都好襟計。於是,你可能就會諗,車,其實我咪仲慘,我都未跳樓自殺啦,點解要咁樣浪費左自己大好既一生。。。

但得罪都要講句,如果你有咁既諗法,SORRY,你已經進入左鬥慘模式,一進入左鬥慘模式,你就萬劫不復。即係話就算你依家唔係好似上面管理層咁仆街無人性,到你有機會上左去,你都會好容易變成另外一隻魔鬼,因為到時你身為老海鮮,必然又會同下面講,我果陣時都係咁捱,一樣無事,點解你依家就要喊苦喊忽,要生要死?

我地應該反省下,由幾時開始,社會會有咁既一個意識形態,令到我地跌入左一個一定要捱到成為最慘烈既一個,先會成為英雄既一個錯覺。呢種文化,日本有,香港亦都唔會少。其實每個人可以承受既壓力都唔同。有D人可能不斷狂做都唔會病,唔會亂諗野,唔會抑鬱。有D人OT可能只係填下格仔入下FORM,但係有D人OT真係錯少少,就會累左成條TEAM或者成間公司。佢OT十個鐘同你OT八十個鐘,邊有得就咁比?

只能夠講,搞成咁,呢D新聞出下又一單出下又一單,社會已經去到一個極度扭曲既地步。而好多人仲會為左生存而樂此不疲,積極地去推廣鬥慘文化,完全係害延幾代。呢種做法一日唔清除,將成個風氣扭轉過黎,往後只會有更多悲劇,湮滅係社會入面。講真,病死既,生CANCER既,有幾多證實到係同自己份工太CHUR有關?根本就證唔到。保險亦唔會賠,公司當然只會講句ROTTEN LUCK。

鬥慘真係要戒。衷心祝願死者安息。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 149073
Date: 2016-12-29 22:47:49
Generated at: 2021-09-23 04:50:17
Permalink: https://www.vjmedia.com.hk/articles/2016/12/29/149073/如果每月ot-過百個鐘要自殺,香港都死好多人