未來奶奶:「阿四姨婆,三家姐,七叔都話,呢D野,最緊要體面!」

 

 

「結婚係兩個人既事,不容其他人干預架!」
「自己鍾意就得,駛咩同人分享呀!」

我幾乎可以過來人身份夠膽講,百分之八十既準新人,有邊一對一開始唔係咁振振有辭(我都係啦)?講真,香港今時今日,邊個可以有咁多心力同財力想大搞,唔簡簡單單分享下「小確幸」然後兩家人高高興興溫溫馨馨,將慳到既錢,去一個豪華D既渡蜜月,或者儲落去第時(如果仲有機會)上樓既裝修費入面?

但SORRY,天氣不似預期。當係廁所偷食鮑魚,都會天網恢恢,你就知道世事往往未能如願。當你係宣布你地將會踏入人生新階段既同時,有好多人已經幫你安左架過山車,然後綁架你上埋安全帶,你既婚禮,就係果一刻,遭受騎劫,走向絕對悲劇既恐怖帝國。

記住,不論你屋企兩老平時幾咁和藹可親,有商有量,甚至會以理性分析邏輯思考,一去到呢個關節眼,佢地就會即刻好似無線D廢劇咁,人物性格呈現一百八十度既轉變。除非你係結婚前果下,已經同另一半商量好,即刻將四老丟入山頭困佢地十年唔再俾佢地有外界接觸,否則就算佢地心入面有想俾你地放手搞自己鍾意既一絲諗法,好快一場「十八銅人長老最高指示會議」之後,佢地就會受洗,洗腦個洗:

「唔得架,阿仔,話晒我第一次做人奶奶,點都要昭告親朋戚友分享喜悅架。」

下,阿媽,依家唔係我結婚咩。關你茄事?但跟住老豆就會每條皺紋都笑住咁同你講:

「我已經同未來親家傾好晒,大家都同意要大搞架,咁開心既野,梗係要一齊分享啦!同埋阿四姨婆,三家姐,七叔都話,呢D野,最緊要體面!」

好喇,跟住少年你天真起黎,仲諗住以理服人,掟出一大堆方程式,甚至用自己CFA考番黎既財務會計野,計晒PV證明其實唔擺酒對於大家都有好處,就可以安然過關。但結果會係點呢,就係長老絕技時間。爆粒珠入COUNTER MODE先,之後天地為之變色,長老們開始健威變豪鬼,瞬間移動出現一堆幻影,共會用內功入密話:

「總之婚姻之命,媒妁之言言言言言言。。。」

銀呀!!即刻-9999 HITS,完場。KO PERFECT。

我曾經聽過就係呢樣野,搞到父母登報脫離關係又盛。呢招真係大絕黎。同類型既咒文仲包括:「我地唔會出席你既婚禮。」/「好呀你夠膽呀,以後有財政困難唔好搵我。」等等。讀中文系既你,會係果一刻好憎孟子,好憎香港係中西合壁,並且好同意魯迅曾經講過,禮教會吃人。但係魯迅就算墳總幫到你上到黎陽世,佢都只係拍拍你膊頭:「今鋪只能夠硬食囉,老友。」

再記住記住,所有野都仲係岩岩開始渣。婚禮搞起碼一年,仲有排你受。到你已經人格再無底線,你就發覺當眾錫,已經唔算係咩囉。遲D得閒有人睇,先再一一娓娓道來。LOL

 

【港式婚禮新郎喊苦喊忽自己知】

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 149133
Date: 2016-12-30 17:14:23
Generated at: 2021-09-20 16:12:11
Permalink: https://www.vjmedia.com.hk/articles/2016/12/30/149133/未來奶奶:「阿四姨婆,三家姐,七叔都話,呢d