鄭欣宜——「肥才是美」的形象哲學

 

其實我覺得,嗰啲話欣宜「瘦唔到」、「歧視欣宜肥」嘅人,都係把自己當咗喺欣宜,所以就逼不及待撲出嚟話,咩呀肥有罪呀肥唔做得女神呀?而其實我好想講,好多人係唔鐘意「欣宜」,而唔係「唔鐘意肥人」。你睇欣宜瘦到得返百三磅嗰陣都係紅唔起,啲人都係一樣唔鐘意佢就知。而其實欣宜究竟有無暴飲暴食定真係餐餐只飲減肥茶都瘦唔到,係真係只有佢知道,你們真的不必把你們的減肥血淚史投射落欣宜度。

其實呢,欣宜個問題真係唔只係肥,而係佢真係無觀眾緣,佢係真係好唔得觀眾歡心,呢個係事實。mean啲講句,古乳有暈「雖無過犯面目可憎」就係講緊佢。

你話佢係咪真係好醜?其實真係唔係。係咪真係無人肥過佢醜過佢?又真係唔係。
佢唱歌係咪真係五音不全?其實真係唔係,甚至佢嘅歌藝好過好多時下嘅歌手。

但係佢就係唔得人鐘意嘛,咁應該怪佢定怪人?佢就係決定把「無觀眾緣」呢樣嘢賴咗去佢肥嗰度,賴咗去嗰啲批評佢嘅人身上。

你話肥係咪有問題?係無問題㗎。三高嘅話係佢自己受㗎之嘛。
體質導致佢瘦唔到,減肥減到好辛苦所以唔撚想減喇,有無問題?無問題㗎,咁你咪做一個愉快嘅肥婆囉,好似肥姐咁做「香港人的開心果」囉。

但係欣宜偏偏要走偶像路線嘛,要人人都去認同佢肥係靚嘛。佢一直表現出嚟話而家嘅審美眼光就係逼人認為「瘦才是美」,但其實佢都強逼人接受「肥才是美」,因為佢表現出嚟就係,你唔鐘意佢就係因為佢肥,就係受世俗嘅眼光所限就係對肥人的欺凌壓迫。

台灣的家家,外國的 Adele,都唔係瘦到碌竹咁,佢哋都係肥嘟嘟圓碌碌咁嘅身形,佢哋都曾經畀人拿佢哋嘅身材大做文章,但佢哋係點做? 佢哋唔係去批評嗰啲批評佢哋的人係「歧視」,而係接受自己的身形,坦言面對自己的肥/不完美,然後以自己的努力去換取別人的認同。

所以提起家家,你會想起「靈魂歌后」治癒的聲音;提起Adele,你會想起佢好多的經典歌例如 《Hello》 例如 《Someone like you》。

咁但係你講起欣宜你會諗起咩?死亡之吻囉、肥囉、喪母囉、外國男友囉。無喇。

點解啲人會覺得欣宜係賣肥?因為佢畀人嘅感覺就係,佢真係好撚介意自己肥嘛。佢一邊話自己肥得好開心唔介意人點睇佢,一邊就話啲唔鐘意佢嘅人係「網絡欺凌」佢。唔知情仲以為佢係傲嬌黨黨員——我先唔介意你哋話我肥呢~

如果真係好似佢自己咁講,唔好為世俗眼光而改變而難過嘅話,做咩要每一次都要把「我不介意人地話我肥」掛喺口邊?一方面叫人唔好在意佢嘅體重,另一方面就一直好自卑咁想人鐘意佢。於是就每一次都強調,我很肥但我不介意你們話我肥,就等於黎明話自己「我豁達所以我唔介意人話我唔豁達」一樣。究竟介意佢肥嘅係邊個?次次都提住觀眾佢肥嘅又係邊個?其實鑊鑊都係佢自己。

再講賣母。

有人話,得獎呀,多謝自己個阿媽都唔得?
我要重申,得獎多謝阿媽無問題,問題係欣宜幾乎每一次出鏡每一次訪問都會提到佢阿媽 – 而每一次提佢阿媽,佢都會,喊。

欣宜喪母是一件悲劇,佢和阿媽嘅感情好好,不捨得佢阿媽,呢個係人之常情。

問題係,佢同佢阿媽嘅感情同發生過嘅事,係咪有必要年年月月日日咁宣諸於口?重要的人和事,放在心中默默記住同懷念,其實已經好夠。

佢得獎,又或者每年悼念肥姐等等的活動,佢講,佢喊,一啲問題都無。之但係肥姐死咗八年,欣宜就講佢阿媽講足八年,仲要係幾乎每個show每個訪問都係咁講,然後,喊。

陳慧琳同佢經理人鐘珍,感情都好好,每次Kelly上台拎獎講到多謝鐘珍都會喊,但唔會有人話佢拎個經理人嚟賣,因為佢唔會每個場合都拎個經理人嚟講。

《九品芝麻官》話齋,老佛爺梗係唔放喺眼內啦,老佛爺係放喺個心裡面尊重的。好似你咁日日講講到cheap曬,你咩居心呀你?

 

 

作者:小妤

生平無大志,只想吃喝玩樂的港女,卻身不由己地關心着政治

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 149503
Date: 2017-01-03 21:14:33
Generated at: 2020-06-03 03:18:24
Permalink: https://www.vjmedia.com.hk/articles/2017/01/03/149503/鄭欣宜-「肥才是美」的形象哲學