自己既駛費自己承擔番,對於我黎講咁樣先係禮儀

 

(photo via cc FLickr user Azlan DuPree)

 

如果係存在朋友間既一個互相「尊重」,就當然係自己果份自己俾番。就算同一個我明知佢多錢我好多好多倍既人一齊食麥記,都斷唔會出現一個情況係,佢同我講:「哈,呢餐飯對於我黎講係零呀,我已幫你俾埋錢喇。」自己既駛費,自己承擔番,其實唔係咩複雜既事,對於我黎講,咁樣先係禮儀。佢俾埋錢我會覺得係施捨。呢一點,我覺得係同性既然都存在,係異性亦都當然APPLY。

咁但係如果依家唔係講朋友之間既「尊重」咁簡單喇,我直頭講緊「鍾意」,咁點呢?首先,愛就係選擇,如果你「鍾意」果個人真係堅持你幫佢找數,先至叫做有風度的話,咁其實我地都無乜其他野好補充。你更唔爽,你咪又係要開荷包俾$$?但係我既個人閱歷而言,「鍾意」其實都唔希望係單向,係雙向既。一切都在乎溝通與關懷。。。

我單純覺得,如果有個女仔真係心地有番咁上下善良,又算係識諗,仲有諗住同你共創未來的話,無論係邊個階段都好,佢都唔會一開波就以「金錢」、「你請唔請得起我食N餐飯」去決定往後仲有無發展既可能。一來我相信,一段感情,包括愛情,都仍然應該有番朋友果個基石存在,包括尊重。而唔係一種天公地義式既壓榨。

如果佢都有同樣地鍾意你的話,你誠懇提出,你能力真係唔可以承擔到每次都米芝蓮幾千蚊落樓找唔到條數,佢一定會理解。真架。如果一方面又話愛可以好簡單,但係連「請食飯大家輪流俾錢」都接受唔到,你個愛究竟係幾簡單,定係其實到最後,都係希望「包羅萬有」。大家都識心照架啦。

每個女仔都希望男仔有米到咩都可以COVER到佢既需求。正如每個男仔都希望女仔「入得__,出得__」,而且仲要有完美既面孔同身材等等等等。但行番貼地一D,唔好話俾錢食貴飯,面對一大堆結婚生仔都會即將出現既駛費,你地兩個其實係咪應該識諗,反而去到咁上下就要有共識,甚至減少去旅行,去貴餐廳?(其實果陣塔嫂成日同我食茶記就係咁。。。)

呢個世界,真係無免費午餐架。你話,超,塔巴你咁RATIONAL去分析有春用!呢個世界係唔講理智架嘛。係架。咁你自己做選擇同捨棄啦。拜拜。

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 149830
Date: 2017-01-07 03:45:01
Generated at: 2021-09-23 04:29:05
Permalink: https://www.vjmedia.com.hk/articles/2017/01/07/149830/自己既駛費自己承擔番,對於我黎講咁樣先係禮儀