無緣對面不相逢——樂美心與Chris Wong

 

樂美心同學:

有一日係街上遠處,無意中見到你既身影,我真係即刻覺得,果個就係你,毫無疑問。我地係杏壇中學已經畢左業咁多年,但係猶記憶係學生時代,你做左學生會主席,不論係台上發表演講辭,定係係台下你以中文學會主席既身份,教學生寫實用文(雖然應該對於好多學生黎講,除左用黎考試之外係人生係從來無實用過),你都係一樣自信滿滿,英姿颯爽,呢一份咁既感覺,一直深印係我腦海,揮之不散。果日,再度跟你遇上,雖然係人海中,無打招呼,但我都幾相信係命運既安排。

係,或者你根本一直都唔識我。因為我係學校果陣,就算同你同班都好,我地都各有各玩,毫無招呼。咁以前既風氣係興男還男女還女大家都好似好守規矩咁架嘛。再加上你本身就熱愛文學,中文造詣就異常到家,但我就岩岩相反,細個係外國讀書然後中學先返黎,雖然講得一口流利英文,亦都叫做了解果下英國文學既偉大莊嚴,但係其實我一直都想結識你,只係失諸交臂。

我唔知到今時今日,係FACEBOOK寫封咁既公開信,係咪真係好老土。而你就算呢一刻見到,都希望唔好恥笑我,咁多年都唔識用書面語執筆寫野。我反正都係無文筆可言,不如索性豁出去,用口語,可能感情,仲黎得真摯。你有你既生活,我有我既忙碌,其實人生十多年流水匆匆,我都係果一刻先發現,其實我對你仍然有好奇妙既一份感情,只不過俾身邊既人與事,沖淡左。我地係同一時空下,有限既時間,係咪應該更珍惜眼前既一切?我咁樣問自己。

所以,我都唔怕自己會俾其他人笑到面黃,亦都唔會理呢封信無跟格式,會俾你扣分扣到傻左。做人最重要既,都係踏出第一步。希望你如果見到呢封信,可以抽空回覆咁就好喇。我唔奢望D乜,但可以做番朋友傾下偈,都好呀。

祝 生活愉快
Chris Wong

 

(編按:唔知而家D 同學仔仲識唔識呢兩個名?)

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 150243
Date: 2017-01-10 19:37:36
Generated at: 2021-09-23 04:30:45
Permalink: https://www.vjmedia.com.hk/articles/2017/01/10/150243/無緣對面不相逢-樂美心與chris-wong