念力應考與神召參選

 

我經常都講,如果你想做個奸狡之人,好簡單,第一件事,必須學習無論講咩野,到最後都要無人能夠驗証真偽。

本來科學既基礎就在於驗証,我地凡事如果覺得有問題既,就必須質疑,而且追究到底。但係每一個人既時間同精神,都係有限的。只要你能夠掌握人既弱點,時常發表無法能夠驗証真偽既言論,而且一直堅持,你就可以立於不敗之地,然後盡量想盡辦法,去暪騙世人,做自己想做,但唔見得光既野。聽落好似好困難,但實踐比想像中容易。

我舉兩個順手拈來既例子。之前有一位主張使用全攻型收音機既補習名師,最近又有新搞作,係考試之前,教人使用念力。雖然佢受到無數人既口誅筆伐,但係佢堅持自己做法無問題,而且還嘗試拎出各種所謂既研究,證明念力真係存在。你心諗,佢係咪癲左呀?但我相信佢無癲到。佢最多只係無恥之徒。

念力係咪真係存在呢?世間上過往好多邪教,都以教主有大能作出招徠。你依家聽番,會覺得得啖笑,但係睇番果D時間,都不知有幾多人願意為此獻盡家財,甚至連命都唔要。呢個世界無100%證實,但係人只要有1%既軟弱,係果一點加以利用。邊個都可以有大能,念力,甚至係神力,甚至——話自己就係上帝派黎,OR自己就係神,都得呀。咩唔得呀。

所以我一D都唔覺得驚訝,有人講自己想參選特首,係因為上帝叫佢去上馬。選特首有人話好痴線,但係有D人身在其中,依家直頭係執行緊一個神聖既使命呀。正如聖女貞德都係咁樣去打番個法國出黎。呢個上帝係咪真係存在,並不重要,成件事,已經變成一種信仰。呢個到最後,係一場宗教戰爭,正如我尋日講既政治化,係一樣道理。

尤其是選票不在人民之手,我話馬勒當拿叫我選,又可,我話中華白海豚叫我辭職,亦得。得左。WHO CARES。往後肯定有更多精彩既言論,我地一齊拭目以待。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 150562
Date: 2017-01-12 21:47:22
Generated at: 2021-09-23 05:32:43
Permalink: https://www.vjmedia.com.hk/articles/2017/01/12/150562/念力應考與神召參選