為何我會離家出走?

(photo via cc Flickr user Britt-knee)

 

唔單只俾媽媽打,細個既時候都俾家姐打,扯頭髮、連環摑都有發生過,拖鞋打面或是用鐵造既晾衫棍打都有。所以我小二睇書睇到人權,我就番屋企講人權,但最終解釋完都係俾人打啦so9sad。但係無論幾痛幾痛,我都唔會喊,因為喊就係示弱,喊就係輸!

或者係以前大家都唔成熟,但係至今我仍然係咩都記得一清二楚。

朋友發現我對聲音既敏感,其實就係緣於細個個陣只要突然有聲就係可能突然俾人打,要馬上防備/作出反應。即使一個人係屋企睇書或點,我都一定會睇閉路電視睇屋企人番嚟未,大約15-20分鐘就會睇5分鐘。

我喺咁既家庭下長大,屋企人去到我廿歲都唔明「其實我真係唔鍾意俾人打,俾人打既感覺唔單止係無法溝通,更加係你放棄同我溝通而走情緒發洩既路。喺呢種感覺入邊,我不單感覺到唔尊重,而且極唔安全。」去到上年,我決定出走既個晚,我係人生第一次反抗,我用咗本字典飛過去我母親度(刻意飛正隔籬,而非正中),然後同佢講「我打你,你都會嬲,點解你可以咁對我?」。我媽媽當然冇聽啦,仲成個人撲埋嚟壓我落地,不斷打,用長遮瞄住我個頭打連續咗10-20分鐘,亦係嗰刻我意識到當佢憤怒既時候,你既人身安危真係nothing….其實佢都唔理你會唔會死咗,會唔會受傷…

大家有時聽我講離家出走或者討厭家人,總是會同我講「天下無不是之….」、「啲事始終過去咗,依家你大個啦……體諒下」……

呢二十年,我學識既唔單只係忍讓,更學會「緣來緣去」——家人都可以對你唔好,何況係其他人,一切何必強求?所以先會去到有時大家聽到啲難聽說話,我反而話一切都習慣。只能說我既經歷令我變得不簡單,小三就離家出走咁型喎!你估個個都得咩?

今年我點解會休番學,覺得自己真係再頂唔順就係有一次我上堂時咁啱講音樂治療,入邊有個細session要你想像,去到最尾時要你一個人番屋企,仲要開電視(而我諗到既就係細個坐定,睇閉路電視緊張不安緊張不安忐忑恐懼既時候…前面有講到點解)。

我個日上完堂就好驚,本來可以夾硬壓住既情緒又爆番曬出嚟,所以我係好怨自己軟弱嫁。細細個既事,竟然以前面對到,但到依家就開始連環爆,仲要搞唔掂自己咁。

我係好討厭咁既家。雖然家人其實仲可以聯絡到我,雖然我其實好掛住表弟妹,但係真係….我基本都唔回覆,至少我家既大人都唔回覆了。

我忍夠由細到大都俾人覺得我俾人打係因為我唔懂事,係我激嬲媽媽。喺當時決定出走,收到阿姨電話,最尾竟然同我講「你個人成日都係咁」「一定係你做錯咗啲咩先啦」「你就唔可以好好同你阿媽講」,都係由個刻開始,我開始走向斷六親既方向?

有頭髮邊個想做癩蜊,有頭家邊個想要出走?——人生就係咁無奈嫁啦 <3

 

PS. 可能有啲人會覺得我消費過去啦…但老實,呢種過去你有得揀都唔想消費,直頭唔想有啦。人總會保護自己,講自己既嘢出嚟其實需要勇氣啊。唔好諗得一切既事太簡單,我唔要求所有人體諒我既所有,我都曾經因為屋企呢種不安感,選擇去做仆街,玩鳩人。點解冇呢?人總有既,一生總有自己在意、恐懼、想要但得不到既嘢,對人有限度地寬容少少,同時係放過自己。

 

作者:Echo

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 150671
Date: 2017-01-13 21:00:32
Generated at: 2020-10-30 09:44:04
Permalink: https://www.vjmedia.com.hk/articles/2017/01/13/150671/為何我會離家出走?