412日電視台黑暗地獄史(四)——「家有白事?下次早講!」

 

對那位自喻為「穿Prada的惡魔」的前老細而言,我們身為奴隸,無論遇上紅事還是白事,請假就是大罪,罪不至死都不會有好日子過。

公司每位同事都享有白事假及婚假各2天(咁大把),本人沒有請過,也不知道可以請幾多次。不過曾經有一位同事(已經頂唔順離職了),是我的上級,人很好、很率直,亦因為率直,老細不喜歡,覺得她唔聽話,成日駁嘴,便經常留難她。本來已經受盡欺壓,有次家裡有白事,於是向上級請假。這對很多打工仔來說應該是很正常、亦是應有的權利,但在這個地獄,我們不是普通打工仔,是地底泥都不如的奴隸。當時上級回應說:「一早排好更喇喎!下次早啲講吖嘛!」吓?白事要早啲講?我有預知能力嗎?難道要預早一星期告訴你:我下星期會死老豆呀,要請假?仲要叫人「下次」早啲講,即係咀咒我今次死完老豆下次死埋老母呀?啊唔係,應該係「預知」今次死老豆,下次「預知」會死埋老母!連一句客氣的「節哀順變」都唔識講,仲衰過直接講一句「我真係恭喜你呀」!

我所屬的部門請大假制度非常嚴謹,同一職位不能一齊放假,係半日都唔可以撞,無情講。請假前要先到向上級mark假,然後全部要經老細審視,批准後才可入紙向人事部申請。一直覺得這個制度很正常,直至有次跟行外的朋友說起,他反應得大:「痴線!咩叫AL呀?打工仔權利嚟架喎,要幾時放就幾時放架啦,有得咁嘅咩?」不過做這行就是這樣,似乎很理所當然,大家也默默接受。然而,就算全行都是這樣,就等如合理、恰當嗎?很多大陸人都會隨街大小便,當人人都習以為常,就等於這種行為合乎道德、合乎禮儀嗎?相信不同行業都有自己的苦況,其實很多時就是高層取態和處理手法的問題了。

有次想在聖誕期間請AL,因為我們紅日都要返工,不能像其他打工仔可以請一日連放四日,想在大時大節放假,唯有連請幾日AL。那次沒有跟其他人撞假,但都被reject了,理由是不可以連請幾日紅日,合理嗎?老細後來更下封殺令,說任何人都不可以在12月請大假,因為那個月會好忙。其實,正常一間公司,如果老細同員工打好關係,非常時期想員工不放大假留守公司,搭個膊頭好聲好氣講句「幫幫手拍硬檔唔好請假得唔得呀」,相信員工都會很樂意幫忙,這就是所講的態度問題。老細的確有權reject同事請假,但在這種高壓極權統治下,無論用咩理由reject,都無人條氣會順。

就連請婚假,都難過登天。有日老細喺房審閱同事們mark的大假,又高聲叫嚷著:「婚假只可以請一次,我唔理佢結幾多次啦!」、「唔好同我講買咗機票呀!唔批就唔批,有本事咪唔好撈囉!」不知是審核哪位同事的申請,聽到的就大概是這樣。那難道我要等你批假先可以結婚嗎?那你真的比我父母還要偉大啊!仲勁過神叫林鄭選特首,婚姻大事都掌握在你手了。用這種態度對待下屬,誰會心悅誠服啊?

至於病假,只要你有醫生紙,佢真係奈你唔何,無得唔批。不過只要請多幾次,或者入醫院請兩次稍長的病假,理得你係有絕症定要做手術,老細都會看在眼裡,病完返去就有排你受了。

有人說文章很大怨氣,我不得不承認,這是當然的,如果老細是正常人,制度完善,員工又怎會有怨氣呢?有誰不想開開心心上班去啊?而且有怨氣的又何止我一個?正如之前所講,我說的故事並不只代表我一個喔。

週末休息,下回待續。

 

412日電視台黑暗地獄史

 

作者:無名呀!

所有作者不願透露姓名,連筆名都不願提供,而同時又令總編認為可以刊登的文章都用呢個名,要找晦氣直接搵容樂其。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 150675
Date: 2017-01-14 01:12:33
Generated at: 2020-08-15 10:41:25
Permalink: https://www.vjmedia.com.hk/articles/2017/01/14/150675/412日電視台黑暗地獄史(四)-「家有白事?下