宅男的瘋狂初戀記事簿(一)

 

 

「不如我地將來搬去海邊住啦?你鐘意吹海風散步而我又鐘意睇星星,大家都開心嘛。」

「你幾時變得咁精伶架?你竟然諗到….」

「咪就係跟得你多囉!連你既傻佬病都傳染左俾我,搞到我傻埋一份,唔精伶d點得喎!」

不過呢幾句說話我已經再無可能聽到,因為過左去既人同感情係追唔番既

學生時代既自己的確可以用「痴線」黎形容,正所謂人一世物一世,有d野的確要去試下既。如果唔係到左臨死既時候,你都無難忘而刺激既開心野去回憶,咁樣你會甘心咩?

學生時代零用錢有限,拍拖不外乎三個好地方: 公園傾計散步吹下水、麥當勞一杯雪糕/一個細薯條/蘋果批兩份食之餘仲抄下功課鬥下嘴、再唔係就海邊你眼望我睇嘴對嘴傾心事。不過我呢個痴線佬諗到過一個新奇刺激又好玩既野,真係諗番起都覺得玩命。(頭盔:大家千祈唔好學,我唔建議各位朋友以身試法)

「今日我地去邊啊?」

「我想去睇下野,你送俾我本記事簿寫哂啦。」

「咁快?你又寫左d咩野落去啊?係咪寫情信俾第二個啊?係就話我知等我好好教訓佢!」

「點敢啊我?我唔想好似琴日張Worksheet一樣俾你扯爛一開二啊。」

「你成日都記住呢d野架!其他野又唔見你記得?」

「你既惡行梗係要時刻記住啦,如果唔係點掂啊?」

「你淨係識蝦我既啫!」

「你唔蝦我又點知我蝦你呢?」

沿路大家一路鬥咀一路行,卒之去到幫襯左好多年既文具舖。呢間文具舖既門口擺左各式各樣既玩具、閃卡、模型,就咁睇呢個設計擺位我相信大家都會認為似玩具舖多過文具舖 。 老板係一個上左年紀既大叔,每次我入親去佢都會好似一個親切既鄰居咁同我傾計 ,但今日入到去竟然係一個唔識既大叔睇舖,好似天助我也咁。

「你喺度陰陰咀笑咩啊?又想整蠱我?」

「無啊,我點會咁樣做呢?我從來唔整蠱人架!」

「係囉,上次我喺家政室整甜品唔知邊個拎d鹽俾我話係糖呢?搞到miss噴都噴唔切!」

每次入到去我地就好似d小學生去遊樂場玩咁 ,又拎下呢樣玩下果樣 ,同埋拎d筆寫d無聊野/歌詞寫落本拎黎試筆既簿仔度 ,但呢本簿仔成為左一個公開留言版,裡面會有人寫歌詞、問功課、寫心事。(我都曾經答過人既數學問題,但自從大叔寫左句問功課收費每次10蚊之後就無人再問功課)

「你鐘意邊本筆記簿?不如呢本啦,夠哂靚!」佢好快手咁拎起左本以粉紅色為主色既記事簿 。

「又粉紅色?你似買俾你自己多過買俾我喎阿姐!」

「點啊大叔?而家你係咪有意見先?」

「揀藍色好似好d,起碼都男仔d!」

「Nonono!咁你就錯啦! 因為粉紅色先帶出你既獨特!」

「Okok,咁你決定啦!」

我知道我點講都無用,所以就只好就範。不過睇住佢笑既笑容 ,就算我幾唔願意都會應承佢 ,亦可能因為咁我先會做好多旁人眼中既「傻事」 ,或者呢d就係傳說中既Puppy Love。

正當佢準備好去俾錢既時候,我一手捉住佢隻手就衝左出去舖頭。

「走啦,仲望?」我已經開始跑緊,而佢仲未搞清楚咩狀況就跟住我一齊沿住個商場一路逃走 ,我當時個腦只係諗緊好似俾喪屍咁追住,而睇舖既大叔亦都做好佢份工追住我地兩個 。

由於商場唔大,所以我已經諗好萬全既逃走路線,不過好衰唔衰跑到後樓梯之際我先發現原來上去商場平台既樓梯又封左,而且剛好正值廁所清潔緊 ,但我地又唔可以走落街市(實捉到),結果我就決定同佢一齊匿入女廁(人生第一次入女廁),但一打開門果下就迎面見到洗完廁所番出黎既阿姐…..

「你地兩個好急咩?」阿姐用一個好特別既眼神望住我地。

「我…….」我都唔知點答呢個問題。

「最衰呢個傻佬啦,又話肚痛又呢樣果樣,咁啱出面男廁又洗緊所以咪….」

「哦,見你地兩個索哂氣,唔怪之得啦!阿妹,下次唔好啦,好彩今次無其他人咋,如果唔係你呢個男朋友實俾人當變態佬架咋!」

「細路,你快快手手搞掂佢 !仲有啊!!我唔理你屙乜啦,你整到又污糟哂我要你自己洗番乾淨佢架!」阿姐呢個moment變面快過食杯麵。

「…..真係唔該哂你,靚姐!」

「睬,我做得你阿媽啦!喺自己個女朋友面前仲咁口花花咁!」

「阿妹,下次呢個人再口花花你就打佢就啱架啦!唔洗錫住佢!」唔知點解阿姐講完之後就好開心行左出去….

「聽到未啊?死佬!阿姐叫我打你啊!」

「無你咁好氣啊…..嗄嗄….」我已經係上氣唔接下氣。

「你痴左線咩?死傻佬,做咩野去偷人野?仲要跑到我地死死下!俾人拉左點算喎?正一痴線佬!死傻佬!」

「殊!咁大聲做乜鬼?拉咪一齊拉囉,有咩好怕?咁先夠難忘,咁先係大家既回憶黎…..」

「都係既….」

廁所中你眼望我眼,寧靜到聽到自己既心跳聲,每聽到有腳步聲靠近,我同佢都不自覺地緊張起黎 ,而大家都一直攬實大家。

「我估果條友無再追我地,可以行番出去啦,不過如果有咩事你就唔好理我自己走番屋企就得架啦。」

「唔好啦!再等多陣先出去啦…」

「夜晚人多,試問我地點樣可以安然無恙地行出去呢?」

「咁又係喎 …..」

一男一女戰戰兢兢行出女廁,好彩既係剛剛好附近無人,而我就扮無事咁送佢番屋企…..

第二日我就一個人拎住本記事簿去番間文具舖度自首謝罪 ,見到大叔既眼神十分凌厲咁望住自己 ,我都心知不妙瓜多過菜,但願唔好拉埋佢落水就得 。

「大叔,對唔住……」

「唔…….」大叔一面嚴肅,搞到我更加驚,不知道如何是好。

「琴日既事的確係我做錯,本記事簿同錢我都俾番大叔你,如果你要同學校講或者報警的話我都甘願受罰,不過我有個少少既請求…」

「請求?」

「要拉要罰我一個人就得,完全唔關個女仔事,佢乜都唔知架 。」

「你又話唔關佢事,佢又話唔關你事,咁你地兩個想點?」

「啊…….拉我一個就得,唔洗聽佢講,我一力承擔 。」

「好,你自己話架!唔後悔?」

「無後悔。」

「好!警就我唔會報,學校方面我亦都唔會講住,不過你咁貪玩一定要小懲大戒先得 。」

「對唔住大叔,我唔會架啦….」

我好意外既係點解佢會快過自己去舖頭做同一樣野 ,亦好驚訝既係大叔唔親手處決我報警,突然間心裡既又驚又喜。

「門後面就係貨倉,幫我好好執番整齊佢 ,我諗你應該搞得掂?」大叔好似暗示要我將功補過,不過都係自己諗埋d屎橋,只有頂硬上啦……

「執好哂啦….大叔….我散啦…」

「好玩唔玩玩偷野,溝女啫?雖然我覺得係幾突出 ,我後生番幾廿年都可能有樣學樣….不過你真係咪再咁玩啦 !」大叔語重深長咁同我講。

「知道啦….」我個腦海突然間又諗到d痴線野,所以不自覺地笑左下。

「不過呢個女仔真係對你幾好,你真係執到寶。」大叔突然好慈祥咁樣講呢番說話。

「都算係既,不過只係有時候會無啦啦發脾氣,有時候心情好到咩都得,真係好難捉摸………」

「女人易捉摸仲係女人?你諗得太簡單啦!不過記住對人好D,如果唔係佢今朝就白黎白流眼淚。」

「今朝發生咩事?流眼淚?」

「今朝佢一早就黎我舖同你一樣講同一番說話 ,所以我真係服左你兩個!」

「啊,咁我走先啦……..」

喺呢一刻我好想即時攬實錫佢一啖 ,天下間有個咁為你既女仔真係執到寶,不過千錯萬錯都係自己錯,無去珍惜一個肯為你既女仔。

打開櫃桶,裡面雖然只係有封寄不出的信,再無日記簿、即影即有相機、禮物、相同埋有隻Melody公仔,但對我黎講,一切依舊喺我個生哂花草樹木既腦入面。

 

作者:陽光宅男

陽光宅男
人如其名,只係一個有陽光氣息既宅男,鐘意打機9up講笑話但懶到出汁,保證大家完全估我唔到。FB PAGE 陽光宅男Ken

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 150680
Date: 2017-01-14 04:30:48
Generated at: 2020-10-31 15:28:52
Permalink: https://www.vjmedia.com.hk/articles/2017/01/14/150680/宅男的瘋狂初戀記事簿(一)