點解仲會咁多人收好少錢,甚至唔收錢寫嘢?

 

ROMAN DRITS 圖片

 

有日唔知邊個係FB寫,『以後真係唔會再免費寫野』。我一直想覆,但係掛住做公司野,唔記得左。

其實呢個問題我自己都諗左好耐。因為依家成日都流傳既一句話就係,有質素既野,就唔應該係免費。而且一旦免費,你寫既野就唔會有人稍罕,鍾意咪放低一個LIKE,唔鍾意就一隻手指就已經碌過左你,已讀不回就係咁解。的確,呢個係簡單既市場學/經濟學邏輯。亦都係無可奈何既現實。

但係我又會咁諗。依家好多人都會去玩所謂BUSKING,揀一條隧道,或者一條街去表演佢地既音樂。我都相信佢地唔係希望會有錢俾,或者真係想圖個出名然後拎著數。佢地只係希望有人聽下,甚至搵到知音人,已經滿足。寫野都係一樣,好廉價,好CHEAP,無人睇好孤獨,好不受重視。但真正鍾意既野既人,真係只係想抒發下,為第一主要。好似要對住個天,大叫一聲,就係咁簡單。大叫完,心理獲得平衡,條路感覺上好行左,咁解。

唔會相信自己會影響到世界。但係心中鬱悶,就會想嗌出黎。做人唔開心,會吐苦水係本能。寫野某程度上,都係一樣。係好多人都想做名作家飛黃騰達之類,但其實到頭來無出名,佢都可能會繼續寫落去。只要有一個讀者已經足夠。

以前唔單止上網慢,想人去讀你既作品都好難。邊有依家一個SHARE,可能已經REACH到成百上千既人。我記得細個果陣,投稿仲要真係放入原稿紙,擺入牛皮信封,搭隻船,上到人地報館或者咩東文學雜誌OR學會,真係遞出去。仲要等回音,唔知幾時,隨時石沉大海呢。咪一樣慘。

我呢D小人物唔係話勉勵大家定乜野。做人最緊要開心,隨心所欲。想寫就寫,唔寫就唔寫。筆係你度,腦係自己度。我過去八個月都製造大量廉價文字啦,如果換到錢都開心架,但換唔到我又無咩損失。凡事唔駛太上心既~~

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 150798
Date: 2017-01-16 01:32:08
Generated at: 2021-09-23 04:15:20
Permalink: https://www.vjmedia.com.hk/articles/2017/01/16/150798/點解仲會咁多人收好少錢,甚至唔收錢寫嘢?