逃避其實一D都唔可恥,但亦都無用

 

我聽好多網上既朋友睇完「逃避雖然可恥但有用」都話,感覺被治癒左。

除左新垣結衣呢個強大既元素之外,仲有咩可能原因呢?

如果再仔細去推敲,其實我估計都係,提出一個IDEA,希望大家唔好俾生活迫到過份窒息,有番些少既喘息空間唶。

係香港地,如果你問我,我一定會話,個社會NORM不嬲都係

「逃避其實一D都唔可恥,但亦都無用」。

我地細個唔識做功課,會逃避唔做,或者抄人。但係又會俾屋企人同先生責罰。

到考試果陣面對一堆唔識既試題,我地更加可以選擇逃避唔答,但係無分。

然後進入職場之後面對堆積如山既工作同埋死線,我地都可以SLIP,但個問題係,老闆就會追到你入去廁所個廁格,都要搵你出黎交野找數。

然後放工,仲有可能要面對拍拖,結婚,生仔湊仔各大人生選項,係呀你可以去打波睇戲旅行之類將呢D野隨時忘記得一乾二淨,但到最後最後一日,你拖住行李,開始記得要買手信。果堆負擔同重量,其實係你個膊頭上,完全無走過。

我好耐之前就覺得逃避唔係咩可恥唔可恥既問題。我唔再附和呢個世界既大小事情鐵則,唔再戴住面具,事事順人,虛從附和,係旁人眼中,都係一種逃避,都係一種鬧情緒既表現。係佛洛依德既簡單心理學入面,我就係唔想再咁花氣力去堅持果個道貌岸然既超我,我只係想做番細路仔,做本我,扭下計,發下脾氣。如果表現人性,都係可恥既行為,咁係我既眼中,你叫肚餓,想飲水,都好可恥,因為你唔係鐵人。等於有D人覺得準時收工唔OT,都好可恥一樣。

你係咪真係咁怕人地話你可恥呢。社會既約定俗定,就係枷鎖黎。其實旁人既眼光,你可以選擇唔理,當然唔係咁容易可以做到。而即使係做到,對你自身有無幫助,有用定無用,亦係另一回事。

但人生在世,好多野做黎,都係無用既,逃避只係其中一樣。你呼吸既係空氣,但其實只係想要氧氣,氮氣你都係係個鼻同口度噴番出黎(莫名其妙既比喻)。總之,想逃避咪逃避囉,有無用都打緊架,最後識得做番個負責任既人。係爛攤子,BBQ,場戲係你既,總之唔好要人幫你執手尾就好。

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 150856
Date: 2017-01-16 14:41:14
Generated at: 2021-09-20 16:48:44
Permalink: https://www.vjmedia.com.hk/articles/2017/01/16/150856/逃避其實一d都唔可恥,但亦都無用