412日電視台黑暗地獄史(五)——「求包養」事後唔認衰,語無倫次恨見報?

 

 

關公災難是如何釀成的呢?以下就是一個很好的例子:

 

「求包養」事件見報後,我在第二集大概講了老細的反應有多高興多雀躍,背後卻要女同事封口,幾個上級叫他入房表面說關心她,實則要她夾口供、唔好亂講嘢,令女同事精神大受困擾。事隔幾日,老細更特地叫齊人開會發表偉論,指文章所寫並非事實,女同事清楚知道當日外景拍攝內容,更表示非常關心她的心情;另一男同事都有去舉牌,但好不幸無人討論佢;又謂大家都做呢行應該明,在座好多人都有出過鏡拍攝,同事唔想做可以推。

 

第一,女同事知道拍攝內容?係知呀,不過係前一日先知囉!早一個星期監製行去佢個位問佢時根本無透露,好人的女同事答應了,直至拍攝前一日從導演口中略知一二,這時已經騎虎難下,就算想貼錢請臨記都來不及了,真係有得say no嗎?

 

第二,當日還有另一位男同事參與拍攝,同樣高舉「求包養」紙牌,不過香港人好現實嘅,男仔係較少留意。但「好不幸無人討論佢」是甚麼意思呢?言下之意是很想有人討論,那還說甚麼關心員工心情,究竟知唔知自己講緊乜?講得出呢句說話就知佢係死不悔改,也並非真正關心員工感受。如果老細咁恨見報,建議佢本人企出去,一定更有討論價值!

這位男同事本身並不是負責做節目,而是做娛樂新聞。星期一出外景前的星期五,同事收到更表,發現mark咗佢做呢個節目,男同事一頭霧水,還在whats app群組中問其他同事,mark佢做呢個節目即係做啲乜,當時無人答到佢,因為根本無人知。換言之,他們完全無徵求過男同事的同意,就直接mark咗佢去做,男同事直至星期一當日才得知拍攝內容,這不是霸王硬上弓是甚麼?

 

第三,拍膊頭幫幫手這種文化 ,在這一行的確是很常見,但這應該是建基於你情我願、互相尊重的基礎下實行,而不是像這樣用低劣的手法焗人上艇。以男同事的情況,連問都無問過,即是連拒絕的機會都沒有。

這位極權老細,向來不尊重低層同事,在他的角度而言,我們是奴隸,要我們做甚麼都要做,無得反抗、無得駁嘴,否則日子堪虞。這次「求包養」,如果同事拍攝前堅決拒絕,可能又會被指不服從上級命令。事後開會講唔想做可以推,就等於強姦犯強姦完人,同受害人講其實你可以拒絕架,咁我拒絕你係咪就唔強姦我呀?如果真係關心同事感受,事件見報還表現得如此高興,豈非貓哭老鼠?事後負責該節目的編輯,亦即係諗出呢條屎橋的人,還特意慰問男同事,男生表示自己安好但有點擔心女同事,編輯先生竟說出一句:「佢都紅咗啦!」真係沒有最仆街,只有更仆街啊。

 

 

記得讀書時有做過類似的關公災難case study。當企業被揭發出錯,可以選擇坦承認錯,或者死口唔認。如果認錯,以香港人金魚般的記憶力,通常好快就淡忘,減少企業形象的損害;反而死不悔改、講大話,只會越揭越臭,引發公關危機。這種道理細細個都識,勇於認錯改過才是好孩子,怎麼人越大越爬得高卻忘了這麼顯淺的道理呢?懂得自我檢討和認清弱點,才得以改進成為更好的人;厚顏無恥地漠視和否定自己的錯誤,會令人裹足不前。好地地一個電視台,有這種不知所謂的管理層,遲早步亞視後塵。

我們不是奴隸,低層員工都有權得到尊重。下回待續。

 

412日電視台黑暗地獄史

 

作者:無名呀!

所有作者不願透露姓名,連筆名都不願提供,而同時又令總編認為可以刊登的文章都用呢個名,要找晦氣直接搵容樂其。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 150908
Date: 2017-01-16 23:13:09
Generated at: 2020-08-13 02:54:19
Permalink: https://www.vjmedia.com.hk/articles/2017/01/16/150908/412日電視台黑暗地獄史(五)-「求包養」事後