【職場新手】永遠唔好低估成功背後所需要嘅努力

 

(photo via cc Flickr user Mike Nelson)

 

一個人點解會出醜人前,不外乎:

一,準備不足
二,無自知之明

我地日常係公司見唔少人可能要做PRESENT,講少少野,都唔係咩大型公開場合,想交代既野亦都並唔複雜,唔係想講咩好學術或者好似FB某些人咁要講既哲學道理,但唔知點解都可以講到一劈劈,甚至佢自己都唔知自己係度講乜,全場O晒咀。呢樣野根本同自有既學歷甚至智商係完全無關係。個問題只係在於佢完全無準備,就以為可以打天才波,結果,咪就係會出事囉。

我地成日都幻想可以打天才波,不外乎係因為睇人地做果陣,覺得佢好輕易得到理想效果,就以為自己都有機會做得到。但其實一方面見唔到果個人背後既努力,可能日鋤夜鋤,又或者佢做類似既野,經已身經百戰,所以先唔需要預備。有D商界人,你叫佢做PAPER野,佢全炒。但係你叫佢吹水做解說,佢就一流,行雲流水。呢D實戰經驗日積月累,到最後佢就可以駕輕就熟,一黎,講重點,三下五去二,完。台下必掌聲如雷(過五至十分鐘,搵你聽啦,台下訓晒)。

準備不足,可能真係貴人事忙,同你自己無關係。但係無自知之明,就真係邊個都救你唔到。明知要打仗,你就一定要計算取勝機會。如果好大機會要輸,就唔好上,或者再等下,等時機成熟,先再圖後事。攬大沙包披甲上陣,以為自己可以百萬軍中探囊取物?觀眾已經一早買定花生入場。就係等你做北韓飛彈,柒出宇宙。

其實對自己既能力有一個合理既評估,係好簡單既事。自己可以做,問人地既意見,亦好多時候幫到手,旁觀者清呀嘛。但唔知點解,無自知之明但以為自己係救世主既人,總係比比皆是。而正因為呢種自信心爆發,更加覺得唔需要做任何事前準備功夫,於是一二兩個條件都齊晒,有咩辦法唔為各位係日常工作提供笑料?

所以話柒人有樣睇,其實真係錯唔晒。每當我地係度樂於恥笑佢地果陣,更加應該引以為戒,因為笑還笑,隨時一個唔該,自己都會唔覺意身處同一個境地。

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 150972
Date: 2017-01-18 05:45:19
Generated at: 2021-09-23 04:34:27
Permalink: https://www.vjmedia.com.hk/articles/2017/01/18/150972/【職場新手】永遠唔好低估成功背後所需要嘅努力