香港家長無論把口講乜,暗地裡都係認同考試呢個制度

 

香港家長背後追逐既精英心態,就係一來要人有我個仔女要有,二來就係暗地裡認同考試呢個制度。

一定要有考試。只要有考試,至有量度既分數;有分數,就可以排高低,可以講優勝劣敗。呢個係最方便既一種認證,寫係紙上,變成一個所謂既ACHIEVEMENT。然後社會跟住黎玩,個個不認人,只係認有幾多張呢D威水史/沙紙。於是讀書有考試。音樂有考試。連去學水墨畫,都有考試。

唔單止香港人,全個亞洲,都特別鍾意考試。千祈千祈,唔好考寫ESSAY,試抒己見,自由發揮,一定要有樣本先識寫,OPEN ENDED QUESTION一樣唔得,因為唔知點俾分。最好MC,然後所有長問題,都要有所謂MODEL ANSWER。學生易跟住黎死讀爛讀,老師有評券準則,亦易改卷。

只要有考試,就唔係單考學術,或者果項技能,就有得操練考試技巧,音樂體育,都係同樣道理。雖然果堆學番黎既考試技巧,到廿年後相信係完全無用,但卻係果時主宰人生既成王敗寇路線圖既一環,半分疏忽不得。於是,就會有各種既訓練課程,補習班,精讀班,天王天后,考試大帝,傾巢而出。有龐大既市場價值,造就大量就業機會。想CUT左考試,小童快樂學習?大把人即刻同你死過。

求學不是求分數,都講左好多年,而且話就話應該訓練學術尖子,推多一D研究人才之外,都話要有訓練技能,同職業接軌,做得好一樣有出頭天。但個風氣有無扭盡過黎先?依家新生家長,已經碌到落去七八十後,佢地仍然係公開試底下既產物,亦都見識過考試底下既殘酷同生靈塗炭,但見到依家個教育制度,其實係玩多左好左範之外,成個基本遊戲規則都無變。你係佢地,你話對住D仔女,操唔操?一於操左先,唔會有蝕底。

人既天性,就係取易不取難,唔想麻煩。咩都要諗,邊有咁多時間。有條路死跟最好。講培養創科人才呀,音樂家呀,文學家呀,對於佢地黎講,太遙遠啦。你講就係離地,對依家要奮戰既家長黎講,就係係唔輸在起跑線既前提下,執靚份RESUME,然後保送入一間好既小學中學一了百了。其他野,唔顧得咁多架啦。咪到時先再算囉。

即使,有時好多野都係因為呢句,就此糟蹋一生。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 151038
Date: 2017-01-19 05:59:55
Generated at: 2021-09-23 05:51:15
Permalink: https://www.vjmedia.com.hk/articles/2017/01/19/151038/香港家長無論把口講乜,暗地裡都係認同考試呢個