412日電視台黑暗地獄史(六)——「劉德華都可以封殺,啲奀星算係乜」

 

劉德華喺泰國拍廣告時發生墮馬意外,凌晨搭專機返香港入院醫治,公司舊同事們不辭勞苦,分別在機場、醫院守候,辦公室裡的同事亦都要OT,據說是要趕凌晨兩點播放的娛樂新聞。真的很好奇有無人會凌晨兩點開著個收費電視台觀看娛樂新聞,難為舊同事已待在公司超過13小時。不過無辦法,只怪那個是劉德華,民間特首喎,邊夠膽唔追呀!

不過那位極權主義舊老細就真係夠膽,而且非常引以為傲。話說我初次邀約藝人上節目,唔知有無車馬費畀人,關乎錢銀嘅嘢梗係要問清楚,幾時到我話事吖,不過監製就覺得點解我會唔知呢,啲咁嘅嘢都要問,我就好直接咁話,你無講過我點會知。可能我講說話太直接,玻璃心監製覺得我頂撞佢,於是向他媽老細告狀,當然我就畀老細訓示咗一輪。而訓示嘅內容,有九成都係吹虛自己個台有幾咁巴閉幾咁威,包括曾經封殺劉德華。

 

 

2011年,劉德華以廣東話接受友台訪問,但就唔接受我地公司訪問,心胸狹窄嘅老細就覺得佢大細超,下令封殺,以後唔幫佢做訪問。當年報紙都有報導,不過連公司大老細都無直接承認此事,反而佢嘅下屬,即係我老細,就一邊訓示我一邊理直氣壯咁話:「我連劉德華都夠膽封殺,話唔做佢就唔做佢,我地咁大間電視台唔驚佢…佢地上節目係我地幫佢宣傳,益咗佢添啦,仲要我地畀錢?佢唔做大把人爭住上嚟做,就算無人做淨係播歌都得,我地好巴閉乜乜乜…啲咁嘅奀星算係乜呀,畀機會佢上嚟係佢地有著數乜乜乜…」下刪數千字吹捧自己嘅說話。

首先,如果真係覺得自己係大台,就應該有大台嘅風範,唔係咁小學雞玩封殺,兼且睇唔起佢口中嘅「奀星」。其次,佢唔止無大台嘅資源,反而窮到一個點,由2008年開始已經蝕錢蝕到hi hi,至到2014年累積蝕咗超過12億,近呢兩年更係變本加厲,究竟憑甚麼可以咁大口氣?再者,佢講嘅說話非常之離地,佢真係覺得自己個台好多人睇?事實係越嚟越少,自從翠如bb佢地成批主持走晒,早就已經風光不再!你見有人為咗cut約搞到要斬人,就可想而知了。有機會老細真係應該試吓親自邀約藝人係幾咁難,好多唱片公司或者經理人都會問同一個問題,就係「會唔會喺地鐵播」,亦即係話呢個係佢地唯一比較在意嘅觀眾來源,而家有幾多人會開電視睇呢個收費台,心照啦。

 

 

前老細自視過高,對藝人嘅態度亦係極之唔尊重,見高拜見低踩。第二集提過我曾負責一個節目,要搵藝人探訪慈善機構,當時恰巧跟Robyn&Kandy的經理人說起,想找人去音樂兒童基金會,經理人表示相當切合兩女的形象,很爽快便答應了。老細卻嫌棄他們,覺得佢地太奀,無人識,心頭高想要找天后級歌手。結果就係要我做醜人用拖字訣,遲遲都唔覆實佢地拍攝日期,到最後真係搵唔到老細想要嘅天王天后級人馬,編輯哥哥用盡口水先說服到佢畀我地搵Robyn&Kandy拍攝節目,但要改去另一個慈善機構,導致我又要花一些功夫去說服經理人,浪費大家時間。

Coffee林千妤因爲殘廁Gathering單嘢畀大台終止合約,不過亦都因為咁多咗人識,於是我舊公司就搵佢嚟做新節目。負責該節目嘅編輯係老細嘅愛將,亦即係「求包養」單嘢嘅搞手,竟然喺開會傾節目內容,期間當住眾人面前問Coffee:「你喺殘廁Gathering單嘢講得架可?」Coffee頓時呆咗,不過都好大方咁回應話無咩唔講得。如果知道咩叫禮貌同尊重,呢啲嘢係可以私底下問,唔需要喺咁多人面前令對方咁尷尬。

 

不下數次試過有同事幫手搵某啲藝人拍節目,約好之後又改變主意要臨時飛起人,人地話晒都係歌手、係藝人,咁樣呼之則來揮之則去,當人係咩呀?真係以為娛樂圈全部都係雞呀?眾多例子都顯示此台對藝人態度有幾唔尊重。如果係大台,人地或者會有所顧忌,但唔係大台又無人睇,憑甚麼要人地睇你面色做人呢?

電視台同歌手、藝人的關係總是很微妙。藝人需要靠電視台作宣傳平台;電視台需要藝人亮相提升收視。尤其不是大台,無自己藝人,要營造到成個台星光熠熠,是很難的,所以電視台同藝人可以話係互惠互利嘅關係,不過都要建基於互相尊重。有這種狗眼看人低,唔識尊重藝人嘅管理層,不是大台又要擺大台款,真係隨時得罪人,然後又步亞視後塵。下回待續。

 

412日電視台黑暗地獄史

 

作者:無名呀!

所有作者不願透露姓名,連筆名都不願提供,而同時又令總編認為可以刊登的文章都用呢個名,要找晦氣直接搵容樂其。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 151054
Date: 2017-01-19 03:43:41
Generated at: 2020-08-15 10:06:02
Permalink: https://www.vjmedia.com.hk/articles/2017/01/19/151054/412日電視台黑暗地獄史(六)-「劉德華都可以