共產黨有冇值得佩服嘅人,我會答你:陳雲。

 

「共產黨冇好人」,呢句我信。因為即使真係立心為國為民嘅共產黨人,心底入面都只會係普魯士式集體主義嘅餘緒,企圖將斯巴達咁嘅劃一整齊帶去世界上每一個角落,為反文明嘅共產黨掌權者作倀。但你問共產黨有冇值得佩服嘅人,我會答你:陳雲。

早幾日有位史界同道,提起中國內戰期間出現嘅超通脹同金融崩潰嘅問題,不免又勾起我對陳雲嘅興趣;於是呢兩日都搵到三冊《陳雲文集》嚟略讀。雖然搵唔返中共點樣設法加劇中國金融困局嘅史料,不過從其字裡行間,都可以睇到呢個小學未畢業嘅農家子,嚮內戰期間點樣幫中共處理好統治區(當時叫解放區)嘅財政同經濟問題;從而令中共唔會好似國民政府咁陷入金融崩潰嘅大難之中。

睇教科書時,有親共人士插手嘅中史書,唔會同你講內戰期間中共解放區入面其實都發生嚴重嘅通貨膨脹。具體數據唔講,睇下人民幣幣值就知:1948年12月1日,中國人民銀行成立,作為中共政權(雖然未正式建政)嘅中央銀行,開始印行「人民幣」,取代中共一直以嚟嚮各個根據地私自發行嘅貨幣,首張印行嘅人民幣面值係「五十圓」;直至1949年初,中共都仲有印行「一圓」同「二圓」嘅小額鈔。但係,隨住戰爭進入最後階段,中共正式建政之後,佢哋依然印行緊「五千圓」、「一萬圓」嘅大鈔。到咗1953年,人民幣已經印到「五萬元」。家人回憶,當年嚮大陸,去街市買條魚都要兩千幾蚊。

中共治下嘅通脹,原因亦都同國統區通脹原因相近:無限濫發鈔票。當年嘅中共,自從有咗人民幣,每個月出糧都係狂印新人民幣嚟出;而且,中共仲承諾國民黨降人全部可以得到比嚮國民黨時高嘅待遇,同時唔使做嘢(當然呢班人都嚮後嚟嘅政治運動入面畀中共整死晒,再唔係就一早嚮韓戰做咗炮灰)。養降人嘅錢,咪又係狂印。最後,到咗1955年3月1日,中共下令兌新幣,要全國「一萬兌一」,兩個月內要兌完,5月起廢除所有舊幣,之後中共對呢啲事幾乎隻字不提嚕。所以,內戰時期全國通脹,並唔係只係發生嚮國統區,只不過中共冇四大家族,亦冇人可以靠權貴炒賣物資,加埋陳雲一直睇住個市,利用中共嘅組織能力盡量控制物價,人民幣先可以一路鳩印都唔會變廢紙。中共得天下,陳雲有大功;功不在前線而在後勤,將陳雲比作中共嘅蕭何,真係不為過。

至於陳雲點去穩住解放區嘅物價,具體過程就可以嚮《陳雲文集》入面睇到。可能你會覺得,邊有咁神呀,中共出自己人啲書都係吹嘅啫。事實上《陳雲文集》、《陳雲文選》呢啲書,入面絕大部分都係佢哋中共啲內部會議紀錄、內部報告文件,而且幾乎一定過咗件事幾十年先會印行。因為呢啲文件份屬檔案一類,檔案形成時製作者冇造假嘅誘因;而且以陳雲主導中共統一財政工作時嘅決策,亦好少涉及中共自己嘅「大是大非」問題,嚮呢幾本文集入面嘅記載亦都大體可信。相比之下,檔案管理呢方面香港真係全部華人政治實體入面最差嘅地方。

 

 

講返正題,咁到底陳雲係點穩定物價嘅呢?相比起多少會玩下財技嘅國民黨才俊,農家出身嘅陳雲直接將財經問題指向「物資」。CE Econ有教過,錢其中一個用途係「儲存價值」,彌補最基本嘅以物易物交易中二物價值不對等呢個問題。亦即係話,佢要確保解放區城市可以有足夠物資供應,一嚟可以強化人民幣嘅信用,營造「用人民幣一定買到嘢」嘅形象,二嚟亦可以平抑物價,防止出現國統區金融崩潰嘅情況,仲有就係嚮新嘅解放區可以用呢種方式去獲得法幣同金圓券,再交畀嚮國統區嘅共諜大手買入物資,加劇國統區嘅金融問題同物資短缺問題。由於中共本嚟就係「農村包圍城市」,一直都操控住「物資」嘅來源農村,而且亦一直有向呢啲農村徵收產品。陳雲做嘅就係爭取到佢可以調度米糧、棉花等等產品,只要稍有物資短缺,中共就即時向短缺地區拋售物資。同時,當然佢唔會放過過剩嘅物資,反正人民幣都係鳩印嘅,咪買囉。但係,即使係咁,到咗內戰末期,由於1949年農業失收,加上國民黨大量人員投共、解放軍又不斷擴軍,令中共財政壓力大增,人民幣結果都係因為瘋狂加印而造成大幅通脹,只係未去到國民黨咁慘啫。

陳雲嘅財經工作,最重要係佢唔會囿於一啲左翼教條。最佳例子就係,佢係不斷要求中共發行債券。試問一個高舉社會主義同無產階級嘅國度又點可能放債嘅呢?所以呢件事都拖到1949年尾先宣佈發行。但中共發行債券嘅目的,並唔係真係要現金,而係想收回過量發行嘅人民幣,從而制止人民幣通脹。可能你又會問,內戰都完咗啦,點解仲要繼續呢類措施呢?唔好唔記得,中共一打完內戰,就即刻打韓戰,繼續勞民傷財架。只不過呢次去送死嘅,好多都係國民黨降兵。一場韓戰連殺降都慳返呀~之但係因為自從1937年開始連續12年以上嘅戰爭已經結束,全國經濟開始恢復,至少唔會再好似戰時咁會出現物資嚴重短缺嘅情況,人民勝利折實公債原定發行兩期,都取消咗第二期。

順帶一提,當年呢種債券叫「折實公債」,係因為佢嘅價值係由物資價格決定,中共當年嘅公告係話:「本公債之募集及還本付息,均以實物為計算標準,其單位定名為「分」。每分以上海、天津、漢口、西安、廣州、重慶六大城市之大米(天津為小米)六斤、麵粉一斤半、白細布四尺、煤炭十六斤之平均批發價的總和計算之。此項平均市階,統一由中國人民銀行每十日公布一次。」我都唔知呢啲係叫「物資本位」定係連中共自己都對人民幣冇信心囉~

五十年代,陳雲仲要著手處理中共早期針對商家嘅政治運動「五反」所帶嚟嘅問題:全國私人企業為免捲入政治風暴索性停產。但係陳雲點都唔會出聲話搞呢啲嘢唔啱,甚至會一力支持。佢只會將政治運動帶出嚟嘅經濟問題列出嚟然後慢慢解決。不過呢,嚮全國經濟恢復呢個大背景下,加埋中國尚未大規模城市化,「五反」呢啲主要搞親城市嘅運動影響都有限;同時陳雲主理嘅第一次五年計劃亦算成果斐然,令中共進一步嚮中國贏得民心。只不過,中共統治中國嘅蜜月期亦都到此為止,因為中共已經差唔多整死晒會反對佢嘅人喇……

今時今日嘅中共,同樣面對經濟危機。不過今日嘅中共已經唔止有四大家族,分分鐘係十幾大家族;中共對地方一早就唔係令行禁止;中共嘅陳雲亦都唔再係嗰個陳雲。當年毛澤東同陳雲有咩唔啱,做嘢有幾政治掛帥都好,都要留住個識管錢嘅陳雲(同埋鄧小平)。今日當香港呢個中共最後救命門要換人之際,老實講,對中共最有利嘅人選,真係得返陳雲一個。所以到今時今日仲多咗群人圍住陳雲轉,我真係恭喜你呀~~

 

P. S. 如果真係對陳雲有興趣嘅,大可以上網搵下嘅文集嘅。呢個侵權之國係連自己元老嘅版權都保護唔到架(笑)~不過唔好去睇咩陳雲紀念館嗰個,嗰個啲文唔齊~

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 151222
Date: 2017-01-21 05:45:02
Generated at: 2021-06-24 20:26:32
Permalink: https://www.vjmedia.com.hk/articles/2017/01/21/151222/共產黨有冇值得佩服嘅人,我會答你:陳雲。