其實拜年打番幾圈咪幾好,點解一定要R 水吹?

 

(photo via cc Flickr user takyin)

 

點解一去到拜年,「幾時結婚/拍拖」之類,又會準時辣慶一班後生?

一開門,大家喊句恭喜發財甚麼的,不過是例牌,儀式,其實心裡面有幾由衷,真係大家心照。然後就開始進行雙邊/多邊(BI/MULTILATERAL)BOP ACCOUNT交換利是儀式,你俾完幾草野我,我又俾番幾草野你。一來又唔係自動對盤,INEFFICIENT之至,二來,一邊笑晒,一邊又要扮晒大方咁講都係攞個意頭,其實心裡面又要「妖,個死仆街又生左個仔又要俾多幾封」,咁拜年成件事係咪一早就已經開始變質,令到一班年青人根本唔知拜年黎做乜,索性快趣篤手機,拎定大容尿袋鬥長命算數?

當一堆新年四字祝福語已經落晒鹹水公海,猶如無講過之後,佢地既出於關心既問候說話,係今時今日既香港,當然難免變得不合時宜兼離地九尺遠。小學組:讀書讀成點呀?係咪即係想問我TSA成績,學校駛唔駛操?中學組:開始預備DSE未呀?你叫我黎拜年想我點溫書?專上組:你間大學係咪唔錯呀?係呀根本無你個仔女讀三大囉,好未?人生失敗組:拍拖未呀/結婚未呀/係咪做IBANK呀。係又點,買到樓咩?一圍檯萬四蚊你幫我俾?

其實我覺得,依家拜年,真心果句,對後生絕對唔公平。以前我地上一代拜年,一定唔係咁。一黎到,當然都係例牌講幾句恭賀新禧之類,然後就已經即刻開檯,麻雀又好,番攤又好,天九又好,排九又好,甚至賭骰鐘賭魚蝦蟹十三張三公。。。總之新年就係賭賭賭賭賭,賭晒佢,財散人安樂先係破災擋三災既真理。大家輸左唔忿氣打交又好,請食飯又好,總之無人得閒理你幾時結婚呀。飲啦!柒頭。呢D先叫過年氣氛。而唔係「後生仔要努力上進,唔好搞咁多政治」呀。

唉。其實講下呢D社會問題,就知道所謂「新年快樂」,有時真係好難快樂架。仲要同場上映奶媽同薯片兩派支持者係度無票互摷。但影七萬張大合照試緊N個COMBINATION果陣,企係三叔四姨媽面前,千祈要E起個嘴。唔係又問你做乜唔笑架啦。陰公。學業進步呀呀仔!步步高陞呀呀女!(我幫大家打定底先。LOL)

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 151518
Date: 2017-01-25 17:06:29
Generated at: 2021-09-23 05:52:05
Permalink: https://www.vjmedia.com.hk/articles/2017/01/25/151518/其實拜年打番幾圈咪幾好,點解一定要r-水吹?