香港最大嘅教育問題，就係「我哋都只係想仔女好咋嘛」

我唔否認呀，香港嘅教育真係只適合聰明人生存，如果你舉一反三，聞一知十，香港刻板嘅教育真係唔難應付，你有ADHD呢啲問題可能例外。

但係其實最大問題係班讀書唔成又一無是處嘅家長。

班家長一無是處，所以唔想啲仔女行自己舊路，又因為人蠢，所以將問題歸咎於自己讀唔成書，真係低智無極限。

其實個細路唔係讀書嘅材料，你逼佢讀書，咪逼癲逼死佢囉！

而個細路讀唔讀得成書，父母讀唔讀得成書又係一個可作參考嘅指標嚟（話明參考即係容許有exceptional cases，聰明仔唔好衝出嚟柒！）。

點解話父母係一個重要參考？因為個細路讀唔讀得成書，都係分先天同後天兩個因素。

先天嘅話，即係遺傳因素啦，父母自身就完全determine咗細路係咪讀書嘅材料，俗語講得好：龍生龍，鳳生鳳，米奇嘅仔女會打洞！自己咩料，生個仔咩料係正常事。Again，我唔排除你係馬，你老婆係驢，生隻騾仔出嚟㗎！不過如果自己同老婆讀書都唔叻，你就唔好勉強你個仔囉。

而後天因素，父母又佔咗好重要嘅一部分，就係家庭教育。雖然話朽木不可雕，不過一位大師就係能夠化腐朽為神奇。但問題就係，你自己都讀唔成書，點解會覺得自己識教人讀書？不如你教下自己讀書先啦！你話：「我雖然自己讀唔成書，但咁係因為能醫者不能自醫，我知道讀得成書嘅方法就係操練同被人逼！」真係笑話！我唔會否認壯元係操練出嚟，但係壯元唔操練都一樣可以輕鬆拎八十幾分，因為八十幾分同九十幾分差嘅唔係十分，而係幾倍嘅努力，如果你個仔係庸材，操練係冇用㗎，如果操極都係得嗰八十幾分，就更加證明係庸材，早日放棄吧啦，因為上到大學，呢啲唔係講操練嘅地方，咪一樣係廢人。

更加可笑嘅係，成班家長都唔理自己嘅仔女係咪精英就逼自己個仔讀精英班，如果係二流學校都仲好，因為都只係喺猴子入面嘅精英，但係喺傳統名校？成班都係老虎，你隻馬騮跳出嚟托咩？仲諗住山中無老虎，猴子稱大王呀？

如果自己嘅仔女唔係讀書嘅材料咁點？你不如諗下自己點解會一事無成？因為你老豆老母唔識教仔囉！再唔係就基因廢！唔想承認後者，就不如由前者著手，但係家庭教育係家庭文化嘅傳承嚟，好多時你老豆老母點教你，你就會點教仔。

你老豆老母套嘢證明咗係失敗，你都唔會識點樣教仔，所以不如索性無為而治，畀小朋友自然而然咁發展自己嘅興趣。

睇下老子識唔識教仔。

作者：哲學仔

一條哲學廢青

閱讀後覺得好，請多多讚好及分享～：）