耶教人到底又幾避忌意頭野?——論真假敬虔

文教 / 最新文章綜覽

 

今日已經是年三十,大家行行花市是少不得的,但就出左張咁既相:

Photo Credit to: Alan Lau

 

話說原來本來年宵的廣場名為「風水廣場」(此為大埔天后宮風水廣場)。唔知邊間教會一心諗住擺個年宵攤檔傳下福音啦,好衰唔衰叫「風水廣場」真是有D難搞,於是唔知邊位忽發奇想,將「風水廣場」易名為「耶穌廣場」(耶穌表示躺著也中槍),後面仲要括住「海寶花園旁」(因為D人搵唔到就真是笑到碌地啦),咁做法、真是令人哭笑不得。

話說耶教本身對於一些風水字眼十分避忌(感覺十分像普通人唔鐘意聽D唔「老黎」既說話),由新年唔俾講「恭喜發財」開始(原因是我地要積財寶在天喎…但君不見教會幾多有錢佬?),到最激動者莫過於是「唔好住黃大仙」之說,皆因「黃大仙」三隻字喎。咁搞法,其實「慈雲山」呀、「車公廟」呀都唔應該有基督徒住至得,點可以淨是Bully黃大仙架(笑)。咁講法,其實新年本身個典故同「年獸」有關,我地連新年都唔應該慶祝喎…

咁點解會有呢D咁既言論?一般黎講,教會都唔會太反對呢類型既「謬論」,原因往往是教會對於世界的態度是「聖經叫我們「分別出來」嘛!」。但教會卻樂於限制行為而滿足,總之見到你個外殼是「敬虔」就算(畢竟限制行為容易、改變人心才難,所謂「有諸內形諸外」嘛)。於是形形式式由「分別出來」之論而限制行為的說法越來越多,時至今日,已經是變成毫無疑問的形式主義。

馬大福音 23 章有個故仔,講到耶穌起度鬧果班法利賽人(法利賽人即是聖經中成日以為自己好叻好聖潔又有權有勢的一班人),話佢地「能說不能行」,即是「講就天下無敵、做就有心無力」,成日做D表面野,例如「將佩戴的經文做寬了,衣裳的繸子做長」,即是Show俾人睇「嘩我幾敬虔呀BlaBlaBla」。而遺憾地,而家既耶教人已經是活脫脫耶穌口中的法利賽人而不自知,真是烏呼哀栽也。

所以,要點樣拿掐「真假敬虔」,唯有由心而發的行為先最能定奪。好明顯,無啦啦改左人地個地名只會被人覺得「你真低B」,而唔是「你真敬虔」,唔係改左人地個地名就代表你「分別左出黎」架嘛。終歸究底,我們這班信徒要向人傳福音,就必須做到「「分別出來」得黎又唔離地」。離人群越來越遠的結果,只會令外教人更唔想認識這個空有外表的宗教。我想,耶穌講的走窄路大概如此,並不是單單唔講「恭喜發財」、或者將「風水廣場」改做「耶穌廣場」就能解決的。基督徒們,又有沒有認真想過這個問題呢?

 

作者:殷琦

殷琦
港大表達藝術治療碩士生、教院音樂教育碩士、港大主修中文中史。一舊蕃薯般的孤獨文青。做YouTuber、專欄作家(稿費...)、鋼琴老師、合唱團、作曲卻不懂用電腦編曲。總活在迷霧之中,怨氣太多,希望太少;與你和我一樣,在小小的香港同受壓抑、同唱悲歌、每天僅為生活掙扎求存。興趣在表達藝術治療、哲學、心理學、生活、音樂、藝術、政治、宗教等。小妹專頁:https://www.facebook.com/pages/YanKi/1002326119779241

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 151633
Date: 2017-01-27 04:08:38
Generated at: 2019-02-17 08:56:20
Permalink: https://www.vjmedia.com.hk/articles/2017/01/27/151633/耶教人到底又幾避忌意頭野?-論真假敬虔