消滅怪獸家長,由鼓勵生育開始。

 

(photo via cc Flickr user Ding Yuin Shan)

 

年末年始,在所難免要見成堆親戚。喺阿嫲嗰邊,糖糖係同代人之中最大嘅,對落一個堂細佬細五年兼自細唔喺香港,然後再數落去又細多五年。食飯嘅時候,無法避免聽埋聽埋好多教仔育兒同埋教育話題。聽到姑姐叔父講小朋友啲近況,最近學校點樣點樣,從未受過香港教育嘅糖糖聽到皺晒眉頭,心諗邊係咁嫁。飯後同糖媽媽吹水嘅時候,大家都覺得有啲問題。諗唔到嘅係,我啲姑姐叔父原來已經對小朋友好好,比起喺facebook、報章雜誌上面描述嘅怪獸家長,真係小巫見大巫。

日前展現咗慈父相嘅哲學仔同埋我家仔仔周竪峰成日同我講生仔要考牌[1],唔識教就唔好生。呢個講法聽落好似好合理好legit;諗落好似有啲唔對路。我唔信五十年前同依家嘅家長有幾大分別:只係以前一擔心血要照顧四五個甚至更多,無咁多心血時間去理咁多,想理都理唔到;而同樣係一擔心血,依家只要照顧一個起兩個止嘅小朋友,所有目光聚焦晒喺嗰一兩個仔女身上,干預嘅門檻因而降低,理得到嘅事情自然而然多咗。試諗下,四五個仔女,督促得邊個做功課、想要送佢哋學琴要俾嘅學費,都起碼係兩個仔女嘅double。呢個係一個簡單嘅resources allocation問題嚟嘅啫。

當家長理唔到咁多,仲點樣跟到咁足,點樣施壓學校追求評核成績有用啫?chur爆家長嘅resources,老師同埋仔女嘅壓力同樣會得到release。再者,生得四五六個時,又有幾多家長月入六位可以供咁多補習,買咁多exercise去操啲小朋友?與此同時,教科書貿然改版會面對大好多嘅壓力。依家年年改版,仔女都係得一粒時,買新書咪買新書囉,貴但唔覺肉痛;試下一年要買四五set書,set set都咁樣改版,俾你做家長都肯定會同佢死過。

而家長無咁得閒理啲小朋友時,小朋友會得到空間去發展自己嘅興趣,做自己中意嘅事情,無論係睇書定係玩,都會有啲得著,會覓尋到自己嘅前途,會有機會思考未來嘅出路。覺得自己讀唔成書嘅,可能會玩得出一門手藝:烹飪、木工、女紅,咩都好啦,比起資源錯配,焗人讀書,好似更有效率。到其時,邊使cut大學學位啫。依家七萬人爭萬七個學位就話太多啫;變成十五萬人爭兩萬個學位,聽落都唔過份吖♡

只要消滅得到怪獸家長,一次過解決幾個問題,一箭N雕,聽落好似幾好。唔好驚自己唔識教就唔生,唔識教更加要生多啲:到時你識教都無用,你都無咁多心血時間去教,識唔識教已經唔再重要。

 

【利申:唔會生。】

 

----

 

[1] 哲學仔澄清道:精英生仔先要考牌,草根唔使,如果唔係邊有齒輪。

 

作者:砂糖雪(☆しゅがぁ雪♡)

砂糖雪(☆しゅがぁ雪♡)
汀瀅冰中結,砂糖雪裏埋。單純愛美愛腐愛幻想,自知殘存在凡塵俗世,沉溺虛構神話裏、迷途弱蟲迷宮中,困於弱水三千內顛倒夢想 - 神無月的凝視下,葬下零落的白色花瓣、綻放璀璨的戀色花火 - 明知是夢想,依然惜夢。FB :佐藤 栞

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 151699
Date: 2017-01-28 03:23:46
Generated at: 2022-09-28 14:06:43
Permalink: https://www.vjmedia.com.hk/articles/2017/01/28/151699/消滅怪獸家長,由鼓勵生育開始。