新年為大地帶黎煩惱

(photo via cc Flickr user MIKI Yoshihito)

 

年又過年,共慶歡樂連連。邊個同你講新年一定係快快樂樂?細細個尚未懂事,或者可以天真爛漫無憂無慮浸淫係親戚無比既愛意同埋呵護之中成長。但隨住年歲既增長,唔知道係親戚既真本性慢慢顯露定係我地開始多愁善感,新年唔再係單純逗利既節日而係一場費煞思量、生活失衝而且滿佈困擾既非常時期。

由你一收利是果刻,就開始一場計算遊戲。本來利是多寡於我而言係毫無意義,因為利是只係一份心意,更何況我同親戚既親情只係值40蚊,冇錯係親戚,好親果隻親戚,身家幾百萬。但係好衰唔衰,親戚偏偏要係利是封果到寫名,以前又會少不更事討論親戚出手如何,最後發現表姐收100而自己收40,個心真係痛痛地。討論利是係人既天性,由番學到番工都會無意中講幾句,由其作為中學生大家都會傾下利是有幾多,想用黎做咩,縱使你萬般不情源都好,總會有人問你收幾錢利是,係呢個時候我真係想爆粗「我收幾多關你x事咩」。

新年唔單止要面對屋企人,當你有另一半,你會發現自己多左幾個屋企人。過年過節送禮就少不免,但作為學生哥要送咩比另一半既家人先夠體面?送天神既禮物金莎?唔係掛,由細食到大,冇黎新意,係大陸人先會食。送鮑魚禮盒?唔好玩啦,邊有咁多錢啊,又怕買錯比人呃。送生果籃?又唔知人地中意食咩生果。無論另一半既屋企人重唔重視,介唔介意都好,新年送禮物都係一件令人煩惱既事,由其係冇咩錢既學生哥。

收利是?如果你屋企係大富人家咪唔怕人地問你有幾多利是錢,或者你既朋友係益友既都唔會開口埋口都係錢錢錢。過節送禮既,只要你另一半係左右手,咁問題自然迎刃而解。

不過親朋戚友既問題攻勢係歷古常新,永恆不變,呢場戰爭就係要摧毀所有既子孫,直至搵出真正既勝利者。「搵到女朋友未啊?」、「大學諗住讀咩科啊」、「出到黎諗住做咩工?」、「依家份工點啊?搵唔搵到錢?」、「幾時結婚啊?」、「幾時會生小朋友啊?」、「諗住幾時買樓啊?」種種問題就如巨浪洶湧而至,勢必令形單隻影既小舟翻船方會罷免。「仲未啊,我大學讀社會科學既,出到黎都係做下文員仔,依家份工都係12k,冇錢買樓唔會結婚架啦。」呢個或者係親友最想聽到既答案,之後佢就會用長輩既口吻勸導你,再用自己既寶貝仔女做例子,令到坐係表哥表姐旁邊既我更加無地自容。

如果你屋企人係家中既長子長女或者環境比較好,咁新年隨之而來會為你帶黎一連串既困擾。作為一個宅男,假期緊係想係屋企自己一個靜靜地做野,畢竟放完新年假後,唔少學生面對既係一連串報告。你固之然可以留係屋企做野,但當親友去你屋企打番幾圈或者玩魚蝦蟹果時,你就知道係避無可避。當然呢樣唔知係咩野困擾,因為大部份人都會玩埋一份,但當你既表弟妹入左你間房開始,你既財產都唔會受到保障,借比佢地玩?爛左唔會有人賠。唔借?咁你準備比人開年。

至於食野方面,唔係人人都會出去酒樓飲茶食早餐,更多人係會留係屋企休息,連街都唔想落。阿媽又會唔知點解買下買下買左好多年糕同蘿蔔糕,初一至初七,你既早午餐都會係佢地。你想say no?你忍心咩?老老實實我真係唔忍心,所以我只好同屋企人默默咁食糕,提醒阿媽唔好再重犯呢個錯誤,阿媽成日都點點頭笑笑口話唔會,但係下一年同樣既情況就會再次發生。

假如你新年唔諗住出街,或者你屋企唔係太迷信既,下面既內容就唔關大家事。新年要出街,衣著方面自然要花心思,作為宅男既我,衣著真係好普通,冇咩特別,顏色都係黑白灰,但偏偏新年就要大紅大紫,新衫新褲,而我呢?望住我就好似睇五十年代既粵語殘片,黑白灰又舊又悶。屋企人以為你係到玩野,但我只可以報以一個無奈既眼神。平時已經黑白灰既我,同同輩既親友比較,更形成自卑感。唔係我唔想買新衫,而係我唔明點解一定要人係新年買衫。

留係屋企唔代表一定安全,因為中國人傳統又迷信既習俗往往會令你感到唔太自在。唔準洗頭,唔好掃地,日日聽住玲玲丞丞峰峰係到指三劃四,拎住本通勝羅庚講得振振有詞,屬狗既要點點點,親愛既媽媽就會走入你間房同你講點點點,真係搞到人都癲。

自從我懂事開始,新年已經唔係一件咁單純既事,不過只要大家既屋企人係正正常常,新年自然係一年可喜可賀既一大樂事。否則新年只會成為你既束縛。

 

作者:筆知所謂

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 151753
Date: 2017-01-29 00:21:12
Generated at: 2021-12-09 06:09:09
Permalink: https://www.vjmedia.com.hk/articles/2017/01/29/151753/新年為大地帶黎煩惱