年初一,我帶隻養咗廿年嘅鬼仔去拜年

 

是咁的,我叫阿橙。上年結咗婚開始要派利是,本身諗住去旅行避年,但阿媽話第一年一定要派。

派利是都唔緊要,最慘係我未有仔女無得逗利是,拎晒個仔啲利是,呃佢話幫佢儲住先是常識吧?!

更慘嘅係,我大姨媽個老公係鬼佬生意人,好L有錢,年年都一定畀幾千蚊利是,所以我一定要諗個方法逗到佢封大利是!

「喂!橙仔,乜今日咁早嘅~咁耐無見又高咗喎。你老婆呢?」大姨媽。

「哈哈,大姨媽你好。」我老婆拜年除咗「哈哈」「係啊」「多謝」之外,就無其他嘢講。

「我親愛嘅大姨媽,呢盒GODIVA朱古力送畀你㗎,小小心意。」話說我買呢份禮物時不知幾肉痛,不過唔緊要啦,當投資囉!最緊要係拎到大姨媽嘅利是。

「嘩~~咁有大姨媽心啊,橙仔真抵鍚!阿Ann~」大姨媽大叫一聲,工人阿Ann立刻衝出嚟拎走盒朱古力。

「咦?大姨媽,我送畀妳㗎喎!」我。
「哦~最近醫生話我血糖高,唔啱食朱古力,我今年都收咗好多啦,咪送晒畀工人食囉。」
「吓…哦哦…」

「多謝 Sir~新年快樂Sir~」Ann望一望盒朱古力,細細聲講咗句「唉又係呢啲…」就擺咗盒朱古力喺房。

吖!你老味吖!我幾舊水買盒朱古力,你竟然當係家庭什餅?
唔緊要,唔緊要!最重要係逗到利是!

「喂橙仔啊~你結婚嗰日我喺美國開緊會嚟唔到,都未畀禮金你添,唔緊要!姨媽封封大利是畀你~」說畢,大姨媽就喺手袋拎咗兩封脹卜卜嘅利是出嚟。

「多謝大姨媽!我愛妳大姨媽!」我。
「多謝多謝」老婆。

就喺呢個時候,大姨媽突然又收返埋封利是:「哎呀唔係喎,橙仔你未生小朋友,唔使派利是畀你喎~」

不過幸好我早有準備!

「其實…我今次嚟係想介紹我個仔畀大家識…」
「哎喲~~原來橙仔你咁快就做人老豆喇?!大姨媽真係好感動啊~佢喺邊啊?快啲畀我抱吓~」

「好。」於是,我就喺背囊入面拎咗一塊黃布出嚟。
「咩嚟?」大姨媽掀開塊黃布,見到一條乾巴巴嘅嘢。
「同大家介紹,佢叫吉仔,我養咗佢廿年。」我。
「係啊係啊」老婆。

「吉?咸甘桔啊?咩產地?」大姨媽拎起我隻鬼仔端詳。
「流產,每日滴血滴足廿年,好有靈性㗎。」我。
「哦~我都知整咸甘桔要花好多年心血,但點解佢形狀咁怪嘅?」大姨媽拎起我隻鬼仔放喺鼻前好似聞雪茄咁聞。

「哈哈~又幾香喎,好重鹽味。」大姨媽好佻皮地伸條脷出嚟奶一奶吉仔。
「大姨媽你奶緊佢個頭…」

「Mum~Mum~不得了喇不得了喇~」突然,阿Ann喺工人房衝出嚟。
「咩事?」
「Sir缸風水魚反晒肚啊…」
「吓?!唔係嘛,今朝仲好地地。」大姨媽聽見手都震埋,一手丟咗吉仔落地。

隔咗唔夠一分鐘,大姨媽屋企電話響起。
「Mum,係Sir打嚟…」Ann。
「妳千祈唔好同佢講風水魚嘅事!我呢幾日會買返缸一模一樣嘅魚返嚟!」
「知道Mum~」

當大姨媽睇緊缸反晒肚嘅風水魚時,Ann又再衝出嚟:「大件事喇Mum~大件事喇~」

「又點啊?你唔見我幫啲魚做緊心外壓咩?」
「Sir佢喺公司樓下仆街,入咗醫院…」
「吓!?點會咁㗎?!哎呀我暈喇~」

「Mum~Mum~」Ann慌寸大亂,我唯有叫老婆幫我Call 白車。

「係啊係啊,好啊好啊。」老婆叫緊白車。

十分鐘後,救護員出現抬走咗大姨媽,我作為親屬都有跟埋去。幸好去到醫院無耐佢就醒返,我就入去病房睇佢。

「邊位係病人家屬?」醫生入咗嚟病房。
「我係,我大姨媽佢無咩事嘛?」我。
「放心,無咩事,受咗少少刺激啫。不過你大姨媽應該幾個月都無大姨媽到。」

「你噏乜啊醫生?」
「你大姨媽有咗BB。」
「Oh My God,我即刻打電話通知Sir~」

醫生離開病房之後,大姨媽同我講:「哎呀今次真係失禮。」

「唔好咁講啦大姨媽,係喜事嚟。其他人差不多到醫院,我落去接佢哋。」

「橙仔等陣!呢封利是畀你嘅,健健康康。」大姨媽喺手袋拎咗兩封利是畀我。
「多謝!」

我接過好似塞咗報紙咁厚嘅利是,正當我打算離開病房,感覺到背囊入面嘅吉仔好強烈咁震咗一下。然後,我見到一團白煙,從背囊飛咗入大姨媽個肚度…

吉仔…你真識食!

我作為父母嘅,最重要就係學識放手,畀子女做佢自己鍾意做嘅事。我相信,含住金鎖匙出世嘅吉仔,將來一定會生活得幸福快樂。

 

 

作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 151759
Date: 2017-01-29 00:46:34
Generated at: 2020-06-06 22:15:30
Permalink: https://www.vjmedia.com.hk/articles/2017/01/29/151759/年初一,我帶隻養咗廿年嘅鬼仔去拜年