大學生溫書姐,唔使成日打卡既

(photo via cc Flickr user Francisco Osorio)

 

無可否認係訊息發達資訊氾濫既時代下,人與人之間既距離係拉近左,大家知道朋友、社會或者國際發生緊咩事,現代人一日接收既資訊可能比中古時期既英國人一生所接收既資訊仲要多,之但係我地依家接受既資訊係唔係全部都有用,或者已經超過左所需要既範圍?學生係唔係成日依賴社會媒體去為自己編寫日記呢?寫日記唔係問題,問題係在於入面既內容可能扭曲緊學生自己既價值觀。

呢篇文要講既就係學生哥最中意既打卡,不過打卡呢樣野其實真係冇咩問題,正如唔少景點或者餐廳都會用客人打卡作為折扣既條件,互惠互利,或者大眾中意同朋友分享自己既行蹤,呢d都唔算係咩問題。不過學生哥最搞笑既係連溫書都要打個卡。

唔知由幾時開始溫書同埋上堂變左做一件值得打卡同埋紀念既事,情況就好似狼英番工打卡,跟手出個post係下面寫「8:30番工」、「好眼訓!」、「大把文件要睇!」之類既說話,見到依d內容,相信正常有頭腦的香港人都會串番佢幾句,例如「番工係你份內事黎架喎,眼訓咪番去訓囉。」或者係「8:30好早咩?大把人番早過你啦!」。其實學生哥何嘗唔係咁樣?番學係一件學生應份要做既事,點解連咁少既事都要放上網?回覆佢地果班同學仔都好野,咁既內容都可以回覆到。

臨近考試月份既時候,社交網站一定會湧現為數不少既溫書文,唔係有感而發既溫書文,而係一張圖,之後打一兩句唔知講咩野,或者係完全無意義既句子,更令人作噁既係扮哂有感情既文句。

通常呢d溫書文有一定既格式,大部份既圖片都離唔開幾個地方,第一係宿舍或者屋企,通當宿舍就會影住d同學仔,話佢地考試都唔溫書,成日叫你玩,之後成班同學係間房都唔知做咩野事。而屋企黎講,通常會話宿舍溫唔到書,好嘈,要番屋企安靜溫書之類既說話。本身冇住宿舍既就會影住屋企話太嘈,專心唔到,之後就可以跳去下一個打卡熱點。圖書館,通常學生都會將圖書館形容為適合溫書既地方,影住自修室入面作為努力讀書既證明。第三就係影住個鐘,呢個行為既作用就係要同朋友講你溫左幾耐書,或者你通頂溫書,證明你好努力或者你平時係十分之yo,去到考試之前要開夜車,證明自己唔係死讀書既yo b!當然唔少得既仲有星巴克,或者星馬克有中產既味道,坐得舒服,溫起書上黎都會特別起勁,所以一定要影住杯提神咖啡打個卡,仲有影埋部電腦或者份筆記,咁先可以證明自己係溫書既乖孩子。

好似頭先所講,溫書最緊要係咩?緊係電腦同埋筆記既,書唔一定要溫入腦,但最緊要係影入鏡,咁先可以證明自己既努力。

講完溫書派之後,考試往往都會有一班輕鬆派,佢地唔係溫哂書,而係唔溫書,佢地會將平時唔會放上網既野,好似打機,同朋友玩game既相都會放上網,下面再補充「考試又有咩好怕喎」、「考五科姐輕鬆啦」、「放棄了」之類既說話。

當然得閒影下都冇所謂既,如果考每一科之前都要影一影,講一講就真係會煩左少少,正如你女朋友要求一道菜要影五張唔同角度既相。

學生有時或者太過在意要比朋友知道自己做緊咩野,就連一d無咩意義既事都要分享比人地知道,當然大家都會有分享既權利,正如港女食飯之前相機先食咁樣,佢地都係分享比人地睇下d美食姐,佢地有錯咩?佢地冇錯,只係有冇呢個必要性。

老老實實作為學生,如果唔係神科或者係workload比較大既科,當你覺得溫書好辛苦同埋好特別果時,你真係要咩下自己係唔係做緊一個學生,定係你只不過當學生係一種副業。呢個問題冇人有資格去評論,學生只可以問問自己係唔係讀緊一科workload好大既科,定係自己平時走爆哂堂,先會搞到今時今日咁辛苦。正如保皇議員係立法會只係得閒講下野,或者舉下手投票,係狼英或者薯片佬發表施政報告果時問題都冇問過一條既情況下,打卡話自己成功爭取一樣咩咩咩,咁樣唔係好可笑咩?

分享唔係問題,話哂大學既一點一滴都係青春既回憶,重點係在於心態,千奇唔好當讀書或者溫書係特別野,因為你係一個學生,你要記住呢個身份,你地溫書同埋讀書係應份。

最最最重要既係開夜車或者臨急抱佛腳既同學仔要專心啦,否認下場就會同我一樣,書又溫唔哂,掛住上fb搞到陰溝翻船。

 

作者:筆知所謂

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 解構精神心理治療——輔導個案概念化(Case conceptualization) by 西多士
    如果問大家對「輔導」一詞想起甚麼?可能會聯想到精神疾病,情緒困擾,婚姻問題,家庭暴力等。其實,「輔導」並不如有些人想得這般負面的。先說說「輔導心理學(counselling_psychology)」吧。!它是「應用心理學(applied_p…
  • 「𠒇」字係咩嚟?——港姐冠軍帶出嘅哲學問題 by 散彈一號
    試想象下,喺未有電腦嘅年代,如果你見到某張手寫嘅form上面,有人寫自己個名係「陳曼𠒇」咁啦。你會唔會即刻覺得自己唔識讀呢隻字,即刻走去查字典睇下個字點讀? 應該唔會掛。你第一個反應,可能會心諗:「嘩,呢個人寫個『兒』字寫得咁樣衰嘅。」…
  • Zopiclone——傳說中的安眠藥「白瓜子」 by 小小藥罐子
    Zopiclone,可以讓人入睡大約6至8個小時,所以,一般建議連續入睡至少8個小時,避免出現「宿醉(Hangover)」的機會。所謂「宿醉」,簡單說,透過安眠藥入睡後,如果睡眠的時間不夠長的話,醒來後,仍然可能會覺得睡意未散,頭昏腦脹,影…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
歡迎讚好我們的facebook page,免費資訊源源送上。

文章資訊

ID: 151986
Date: 2017-02-01 21:40:20
Generated at: 2022-12-03 06:08:54
Permalink: https://www.vjmedia.com.hk/articles/2017/02/01/151986/大學生溫書姐,唔使成日打卡既