利市

想不到新年流流,一封小小利市都攪出一場風波。

事緣某個Facebook語錄專頁「牽手會把女生的心牽走」借新年題材,講咗句

「好男友就是在過年期間有包紅包給女友。」

 

此語錄一出,當然引來圍觀甚至抽水,內容不一而足。之但係呢,有網友就指出,呢個係臺灣規矩,講的不是香港情形云云,但是否有根據,講解者也不盡不實,知其然而不知其所以然。最後,又變成口同鼻拗的問題。

既然如此,就花些少時間講吓香港同臺灣之間的「利市」文化差異。

 

利市由來

(無興趣的,可以直接睇第三部份。)

「利市」呢個辭語,早在《左傳.昭公十六年》就有提及:

「爾無我叛,我無強賈,毋或丐奪。爾有利市寶賄,我勿與知。」
(語譯:你不要背叛我,我不強買你的貨物,也不強行奪取。你有賺錢的生意和寶貴的財貨,我也不加過問。)

 

關乎幸運吉利、行事順遂的解釋,大概來自漢代焦延壽《易林》。例如:

《觀之離》:「福過我里,入門笑喜。與吾利市。」
《升之大壯》:「開元作喜,建造利事。平準貨寶,海內殷富。」

(案:網上流傳的《易雜注》謂「營商利市,營達利事」實不可考,不足為信。但見連報章傳媒都抄埋一份以訛傳訛,就……大家留意返無呢種根據就好。)

 

解作節慶的賞錢,例子可見五代的辭人和凝《宮辭百首》:

「碧羅冠子簇香蓮,結勝雙銜利市錢;花下貪忙尋百草,不知遺卻蹙金蟬。」

 

更加詳盡的描述,參見宋朝孟元老所撰的《東京夢華錄.娶婦》:

「……女家親人有茶酒利市之類。至迎娶日,兒家以車子或花簷子發迎客引至女家門,女家管待迎客,與之綵段,作樂催妝上車簷,從人未肯起,炒咬利市,謂之『起簷子』,與了然後行。迎客先回至兒家門,從人及兒家人乞覓利市錢物花紅等,謂之『攔門』。」

 

顯而易見,「利市錢」已經同最早榮商獲利的解釋無關,演化成喜慶禮節的一部份。

一路以來,利市就係一張染紅的紙包住銅錢派畀人,所以你重會聽到老一輩的人講「紅紙仔」「紅紙一張」云云,包住「硬嘢」,先係古時風氣;直至晚清光緒年間,由於印刷技術進步,先開始有印上吉祥文字符號的「利市封」的出現。時至今天,大概唔會再有人再收到硬幣利市了。

 

香港、臺灣習俗分別

講返正題,到底出咗乜嘢問題呢?香港嘅「封利市/事/是」同臺灣嘅「包紅包」,係有好大差別的。以下撇開做生意的老板級人士,簡單嘅區分方法,就係:

香港派利市,視乎婚姻狀況;臺灣包紅包,視乎就業狀態。

喺香港,基本上同儒家文化圈內區域常態相似:近親的話,長輩派畀晚輩,晚輩唔會回派畀長輩;如果你結咗婚,就大概走唔甩,無論親戚、朋友、同事、晚輩不論大人細路,以至唔多熟的鄰居、樓下嘅看更、食肆嘅伙記,你都可能會派到。但金額由於廣泛派發,一般並不會多,大家旨在攞個意頭。

有趣的是,如果你單身,即使人到中年,祇要面皮厚些少,還是可以領到已婚朋友或同事的利市,雖然情景有點老尷就是Sosad。相對地,新年就係細路嘅天國,若然你家親戚朋友夠多的話,四處跟大人拜年逗利市,你就會大豐收過肥年,好似係。

以上呢啲眾所周知,所以解說從簡。

而喺臺灣,就係兩回事:出嚟社會做事的晚輩,即使平素有畀開家用,過年過節亦會封金額不小的利市畀父母,以示感激之情,由幾千到上萬新臺幣都有;部份經濟條件許可的,甚至連祖父母嗰份都會畀埋,無關當事人婚姻狀況。再誇張少少,如果去到談婚論嫁的男女,甚至可能要封埋利市畀未來老爺奶奶、外父外母,以示孝敬的。

長輩派畀晚輩呢,錢就少好多。祇有未畢業出身的後生仔女,先會祇收利事而不派。

封利事畀平輩近親、兄弟姐妹呢,都有,但金額相對就細好多,純粹新正頭圖個吉利咁解。之但係,臺灣人係唔興四圍同唔熟的親友拜年的,所以,利市基本上唔係四圍拜,亦唔會出現細路周圍逗利市的事情。

喺呢度,就嚟第二項分野:香港人愛面子的體現,同臺灣的不一樣。臺灣的面子,重在厚待親人;香港人,則用「廣結善緣」周街派嚟顯示派頭。即是話,喺臺灣如果父母拎住萬幾文的紅包,佢哋就可能拎出嚟同啲朋友鄉里比較。

至於夫妻之間呢,興許也有,不過禮節上同平輩類同,而且多數是互派,感謝對方為家庭付出之餘,也是趁過年採意頭。但擴展到男女朋友之間呢……容我引用海濤法師的金句:

 

 

「假的!」

講穿咗,呢個不過係近年的Invented Tradition來,網上嘅講法亦係莫衷一是,更莫講話圖中呢種單方面畀另一方的做法了-你當「情人節送朱古力」咁去理解就得。

上面嘅嘢,自己參透吓。亦勸大家一句:抽水之前,瞭解清楚文化差異先。

 

作者:無妄齋

無妄齋
是非忘所以,黑白觀自在

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 152030
Date: 2017-02-02 12:59:28
Generated at: 2021-09-19 16:28:46
Permalink: https://www.vjmedia.com.hk/articles/2017/02/02/152030/利市