依家有fb就係女神,影張相就收到兵,呢啲大家都知嫁啦。但其實性騷擾啊,真係感受到既壓逼係好少講到出嚟

 

收唔收兵,貼唔貼J圖呢啲反而是閒事。

襯呢幾日fb多人睇,其實要講既係所謂「身材好」其實唔佔優勢。

嗰樣生得低B,又叫細細粒,只要有少少所謂身材,即使你包得幾實,樽領長褲都係會有變態佬攪鳩你,同性既閒言閒語更是少不免。

識我既人都會知我係將應對性騷擾作為生活常態,而日常衣著基本就t-shirt加熱褲,冬天就係樽領針織加長褲居多(你估真係日日fb post噉著咩orz)。一個月基本跟蹤啊非禮啊當面出言性騷擾點都遇到四五次,係講緊日光日白當街當巷個陣啊!你問我點解唔報警,大佬,呢啲成為常態個陣你一個月入幾次警署咩?

當然你可以話邊個見到我真人仲會攪鳩我噉冇taste,但我話你知就係好多啲四十打上既香港男人啊最唔尊重人,只要你既衫冚唔曬你既胸型佢就當你係放蕩女人,仲要喺一副我跟你我攪你你吹漲啊既態度同語氣嫁,我可以點?有的士咪上的士,冇的士咪真係當街當巷見人就話我畀人跟可唔可以扮同我傾幾句等我甩咗人地點點點。

你地所謂收兵優勢,其實有定冇,用唔用都好。伴隨既,甩唔到既就係我出街會好小心,一定會防呢防路(我某ex送畀我既禮物就係啲防狼警報器,即係一拉就會bibibibibibi聲響到仆街噉)。而且我好多時候寧願行冇人既地方多過有人既地方,有人就有機會畀人跟有危險,冇人真係有時比較好(當然你要熟先好行啦)。

唔係要呻啲咩。女唔女權,身體自唔自主有時唔係一個重點,呢啲terms老實講我都唔完全認同……

反而就係講,依家有fb就係女神,影張相就收到兵,呢啲大家都知嫁啦。但其實性騷擾啊,真係感受到既壓逼係好少講到出嚟(都唔好講有啲女仔甚至經歷過性侵犯強姦之類啦。

你同男人講,男人一係就體諒三分覺得「女人真苦」或者心諗「噉既貨色都有人攪?!」

你同女人講,冇經歷/少經歷既女人會心諗「我係女人,我都唔會俾人跟既。你包實自己就冇事,一定係你點點點周圍姣人嗲聲嗲氣先攪成噉」

我唔知大家身邊有冇啲噉既朋友,但係好多時啲人suffer咗呢啲嘢呢…係唔會講既。得饒人處且饒人我唔信既,但凡事留一線我都仲係覺得係既。

唔好隨便用啲咩去判定人地係點既人,等於女人都唔應該label啲肥矮毒柒啊,跟住唔好覺得自己係女人就係咩都畀人蝦,或者奉旨享受優勢拎人著數。調番轉,有啲苦係男人自己受緊既,尤其華人社會更甚啦,對男人既成就、家產比較計較啲啊,所謂要比較有「承擔」,要「保護到人啊」。社會主流都仲係話男人至少要搵錢多過老婆/女朋友啊,個男人冇咩冇咩冇前途就唔好嫁唔好剩,拍拖都唔好拍噉。

大家各有各苦況,唔同性別亦然,唔同年齡亦然,唔同出身亦然。又唔係要大家包容既,呢個真係好難做到嫁。只係有啲事唔好講得太盡姐,當然啦把口生人度你控制唔到,但只係有時我覺得有啲嘢出少句聲未尚不好(包括我自己都係啦……

 

P.S. 性騷擾啊性侵犯其實唔係得女仔會suffer,男仔都會有既。只係我個case我係女人,我又講唔到男人啲咩,而且主流社會上呢啲嘢暫時嚟講真係女人會輸蝕少少,或者遇到個機會會高過男仔少少既。但定型底下男仔遇到時,又比起女生更難以啓齒,更孤立無援啦。

 

作者:Echo

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 152050
Date: 2017-02-02 19:43:04
Generated at: 2020-10-31 18:08:50
Permalink: https://www.vjmedia.com.hk/articles/2017/02/02/152050/依家有fb就係女神,影張相就收到兵,呢啲大家都知