你我都成日講嘅賭博術語

 

好多賭博術語,依家都變成日常口語流傳,但係因為博奕之術未能一代傳一代,結果反而識得齋講,但唔明原來出處點解點玩,實在係社會一大奇特現象。拋磚引玉,求其講番幾樣:

 

例如尋日有人突然祭出「拎冧六,長衫六,高腳七,仲有一隻大頭六」,並非D咩密碼,而係出自超舊廣東歌賭仔自歎既第一句歌詞。全篇以廣東口語填詞,傳神之極。

牌九有三十二隻,簡單講,以兩粒骰既組合砌成,拎冧六係(1+5=6),長衫六(3+3=6),高腳七(1+6=7),大頭六則係(2+4=6)。其中大頭六又叫大雞。同(1+2=3)細雞/么雞成對。全部細牌,打咩都無用。所以歌詞,後一句就係「輸到我服」。賭仔最後,都係貪字得個貧,就係歌詞真意。你估真係大賭變誠哥?

 

唔講歌詞,講日常,「單天保至尊」亦係天九術語。岩岩講既大雞同細雞組合就係至尊。如果有得出,則屬最大,其餘幾家必須即時墊牌結果一回合。但係如果人地出先,你至尊係不能當雜牌起孖去打,呢個就係橋妙之處,不出先,「至尊」亦變「垃圾」。所以要有最大牌「單天」,先搶到出先權,然後再打「至尊」,先會有用。依家解以一人之力,力挽狂瀾,亦屬貼切。

 

「今次真係一棟都無!」既「一棟都無」,形容人輸得一乾二淨。其實一棟(OR戙?)亦係天九玩法根本。輪流出牌,贏一次拎一棟牌,得四棟者和,空棟則輸五,而且空棟者,無法最後一ROUND出牌結,即無條件勝出一局,任你揸最大牌都無用。所以「一棟都無」係悲涼情況。至於話俾人「過一棟」,即係俾人跣一鑊,陷害,呢個我無咁肯定,但係打麻雀又過棟當CUT牌之說。其中有老千擅於暗地裡過棟,又稱「洗牌疊」,所以俾人千左,叫「過一棟」,不無道理。

 

「食夾棍」多指俾人作程咬金,中途殺出,將自己身上既肥肉搶去,或者兩邊通殺既意思。係賭檯場上,例如十三張,擺牌任何一島,如果莊閒完全一樣,則唔係計花色(!),係直接當莊贏(相反,閒有先開牌報到之權利)。至於「格食格」,就係花樣唔同,岩岩一物治一物,十三張入面同樣有此說,指自己手持牌唔太靚,但都可以完全取得勝利。例如「啤桃花」食「無頭一啤蛇」、「啤三蛇」食「無花無順,焗踩三輪」等等。

(補註:十三張中,一對,PAIR,又叫一啤,又叫一個轆,車輪也。所以三輪車,即係頭二尾只有各一啤,可憐!)

 

「磨爛蓆」同「借艇割禾」/「割禾青」岩岩相反。前者係賭極都唔願走,結果連坐緊張凳塊皮都磨到爛,後引伸人有鍥而不捨精神。後者當然係識得贏少少都趁機全身以退啦。但賭得性起,有人想割禾青,必然俾人押番低。想走,無咁易!依家係指有人識得睇風頭火勢先行獲利而退。

 

「起尾注」幾乎已經代表要人地一下子輸到一窮二白為止。等同「佈天仙局」,先引誘水魚落場,贏番少少,然後誘使對方注碼加大,至一下子露出本性,將佢既錢連本帶利一鋪過贏番晒。換句話說之前既局完全不計,最後一局先係生死局。俗語亦有云:「放長線,釣大魚」!

 

呢D話題講落去,寫之不盡!想捍衛廣東話呀,學下賭錢先啦(LOL)。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 152052
Date: 2017-02-02 20:24:54
Generated at: 2021-09-20 03:19:07
Permalink: https://www.vjmedia.com.hk/articles/2017/02/02/152052/你我都成日講嘅賭博術語