我對琴晚個uber 司機起咗痰

 

打開uber app,type destination,對對個pin準唔準。兩分鐘後,一位Tchaikovsky同我講「I’m coming I’m coming」。Screen上看得到,只見SH 1XXX車牌物體向我位置移動,寫就寫話要15mins後,但過咗7分鐘,已經話is arriving。呢個司機一個電話都冇打畀我,就停正我面前,開埋門畀我。白色四人座,流線車身,我當刻認得而講唔出既牌子。唔知點解嗰刻我覺得我應該坐前座,我開咗一下,開到,佢都冇對我呢個失禮既行為講啲咩,但嗰一秒,我都係心諗「坐返後座好」。但我閂返前座門後,後座既門就開唔到。

我坐喺後座,冇戴安全帶既衝動。因為今晚我就係想危險一下,佢同我講「點解開前座門唔坐前座」,我話「冇點解,點解我開前座門你唔阻止我?」佢冇出聲答我,就係噉呢架白色交通工具喺我家附近駛向我想去既地方尖沙咀地鐵站。

上咗車,過咗幾個燈位,佢一直冇出聲,一句都冇。佢架車都係一聲都冇,我望到佢隻左手戴一條透明白色水晶鏈、同埋一個黑帶白既運動手帶。佢隻手幾靚,於是我放低我怕悶而帶既科普同文學書,由得啲書跟住架車chok嚟chok去。我只顧諗講咩好。新年流流,就講新年吧!「你新年仲uber?」「新年過咗啦~」呢刻先發現佢把聲係個種冇咩聲調起伏,但又好正好好聽,簡單一句麥當勞slogan足以形容我既心情。「喺啵,講起我今年初三同初五都分別畀陌生人喺交通工具開年。」「嗯?」「有個師奶喺輕鐵度叫我歪挑鬼命唔好阻住佢屋企落車,仲有個家庭初五係我搭巴士時打我尖反倒話我小家到極,冇嚟家教……」

就係噉,呢架車慢慢上咗公路。一直我都同佢講嘢,突然我由後面見到佢個嘴向上一翹,我問佢「你喺度笑啊?」佢話「係啊,你可愛咪笑囉」「喂!我知你鍾意靜,你都冇理由噉樣笑我嘈嫁嘛?我講嘢你又唔阻止,噉你又唔畀signal我叫我收聲,唔鍾意噪音我咪唔講嘢囉。」講完我就扁扁嘴啦,唔知佢睇唔睇到,但佢就講咗句「我冇話你個啲係噪音喎,我只係唔開收音機姐,鍾意靜但唔代表我覺得你嘈。」

過咗個橋位,我忍唔住返番最一開始我留意既位。「你個條手鏈,係水晶鏈嚟嫁?」「係啊,唔係水晶係啲咩?」「我點知你會唔會戴膠嫁姐,有啲人唔信嫁嘛。白水晶係咩意思?」「我唔知喎,鍾意咪戴囉」「噉水晶鏈上面個條呢?」「計步器囉。」「你鍾意白色?」「你上車見唔到我著白色衫嫁咩?」「係啵,講起我入邊都係白色衫。(拉開我件黑色嬲同綠色頸巾,露出白色露腰小背心)」個陣咁啱停車,佢向後望一望「又睇唔出你入邊係白底啵,見你著條深藍牛仔褲又包實自己,估唔到著白色又幾好睇。」跟住另返轉頭,繼續揸車。

「係呢,你唔鍾意噪音,但鍾意白色喺咪?」「唔。」「你知唔知有樣嘢叫白色噪音?」「咩嚟?」我馬上wiki,再讀咗幾行定義,但見佢冇咩反應,就話「你有冇試過聽電台收得唔好既個種沙沙聲,呢種就係有啲似白色噪音」「嘩,咁我一定唔會鍾意!」「但係個個沙沙聲難以控制,如果有啲好聽既就係落雨既沙沙聲、海浪拍打岩石既沙沙聲」「唔,噉樣呢類我會幾鍾意。」

望望出邊街景,我問「係咪就到啦?」。佢話「都差唔多啦。」我又再問「係呢?你住邊頭,點解會係我嗰頭出現?」「哈,我住屯門唔俾既?」「唔係唔俾,係唔似囉,你唔似熟屯門路,我見你一直望住google map點行。」「我住紅磡既。」「咦,我咪叫救返你出巿區囉?」「小姐,到站啦。」「哈哈,有興趣就請我食餐飯當感激我對你既救命之恩啦。新年快樂,辛苦曬。」冇留意佢既反應,都冇見到佢個樣,明明佢另轉過個頭,但係我都冇睇到佢個樣。只記得關門之前佢話「多謝你做咗我第一個多嘢講又唔煩既客,你把聲幾好聽,個人都叫幾……可愛」

就係噉,我就係佢未開車走前行向一個全身黑色穿著既男人,係我第一次見面既朋友。朋友問我「嘩,你出入都有私家車接既?」我話「唔係,uber姐。只係我幾鍾意佢乾淨俐落。」講完就推開大廈門,一齊搭車立上樓食我今年第一餐既住家飯,or say上人屋企拜年。

呢架車款,我再見到佢一定會認到。呢個車牌都係。唔知幾時會再遇到呢個或者一個唔係醫院白,而係天使白既男人呢?

 

作者:Echo

閱讀後覺得好,請多多讚好及分享~:)

其他熱門文章

  • 【辦公室智慧】Learn how to not give a fuck, you will be fine. by 沒有句號
    大佬個 Sales Assistant – Ann 姐入 form claim 電話費,一次過 claim 一至八月,公司 policy 講明只可以 claim 最近兩個月嘅單,會計部都係跟 policy 做嘢啫,過咗期自然就彈㗎啦,所以 …
  • 律師真係好型咩? by 烏龍
    大律師事務律師也是男人,男人的劣根性在法律界也不能免疫。相反,正正因為很多天真嬌對律師趨之若慕,主動獻身亦大不乏人,單是律師這張名片對某些女士來説可能是一卡傍身,世界通行,所以法律界的男人們在女性市場比較吃香,把妹相對容易也是相識吧。事實上…
  • 暫停六合彩,反映馬會進退失據 by 曾慶光
    今次為六合彩四十五年歷史上,因應疫症而暫停攪珠時間最長(超過二百日)的一次,而且有很多人質疑二零零三年「沙士」時無暫停六合彩。馬會早前公佈截至今年六月,上一年度六合彩投注額僅僅過五十億,對比前一年度大跌近四成,少近三十億。…
  • 【遊戲介紹】死又有咩可怕?《Chronos: Before the Ashes》死一次強一次 by 阿九
    2019 年大賣嘅《Remnant: From the Ashes》,大家都應該印象深刻。同樣由 Gunfir […]…
  • 「作為一個女仔識做家務係一件好可恥的事」 by 瓔庭
    「作為一個女仔識做家務係一件好可恥的事,你要同我記住。」細細個便響阿媽度學識呢句說話的Pat一家很完美的實行了這個「理論」,佢係一個十指不沾陽春水的大小姐。家中清潔、煮飯什麼的都是Pat的老竇同阿哥去做。甚至學校有家政堂寧願肥佬都唔肯去做任…
  • TikTok 其實好重要 by 毛言地
    每個社交媒體都會有唔同嘅低能及危險玩意,就好似Facebook早前都有出現藍鯨遊戲,不過「危險」始終唔係Facebook嘅主流,大家上Facebook嘅主因唔會係為咗睇藍鯨遊戲比咩任務你。但TikTok當中低能嘅影片基本上係主流,咩Skul…
歡迎讚好我們的facebook page,免費資訊源源送上。

文章資訊

ID: 152141
Date: 2017-02-03 22:34:32
Generated at: 2020-09-19 17:08:08
Permalink: https://www.vjmedia.com.hk/articles/2017/02/03/152141/我對琴晚個uber-司機起咗痰