為PGDE 學生發聲——都話唔係讀緊master！

讀緊PGDE嘅學生，尤其full time，每次同人解釋自己讀咩都好煩。PGDE，全稱Postgraduate Diploma in Education Programme，即係老師專業嘅培訓課程，香港幾間u都有開，讀完大學degree先可以讀，完咗有資格註冊做老師。

農曆新春期間，拜年之處往往係準教師們嘅實戰之地，同親戚解釋咩係PGDE，如同教極都唔明嘅學生，只要你過到呢關，第時教咩學校都唔洗驚。

親戚：「大個仔喇喎，畢業未呀？而家做緊咩呀？」

你：「我而家讀緊PGDE呀～」望到對方稍有疑惑樣，旋即補一句：「即係教育嘅證書～而家喺某某大學讀緊full time做全職PGDE學生。」

親戚：「哦～PhD～叻仔喎，年紀輕輕就讀博士～～」

你：「唔係PhD，係PGDE，屬於深造課程。PGDE 還PGDE，PhD還PhD，係兩回事嚟。」

親戚：「哦～即係讀緊master碩士啦，叻仔喎，讀多啲書好呀。你知唔知呀而家通街都係大學生一個招牌跌落嚟都砸死幾個呀讀碩士好呀學歷高啲提高爭力第時升職都易啲你知唔知而家香港社會……」

你：「er……你冷靜少少先，其實我唔係讀緊碩士，PGDE係『教育文憑』，PGDE還PGDE，master還master，係兩回事嚟。」

親戚：「吓，哦….原來係文憑，即係high dip？咁幾時可以升返上大學？」

你：「是咁的，PGDE係Postgrad來的，中文即係深造文憑，有大學學士學位先再讀，即係香港資歷架構入面嘅第六級，簡單講其實我大學已經畢咗業的……」

親戚：「哦！postgraduate，即係咩？係咪即係讀緊研究生？叻仔！」

你：「我真係唔係研究生呢……雖然PGDE 喺大學係研究院入面。我讀幾個月書就要實習咁樣，深造課程嚟，上下堂交下功課然後出去做嘢咁上下。」

親戚：「哦…讀書好呀，讀多啲書好呀。你知唔知呀而家通街都係大學生一個招牌跌落嚟都砸死幾個呀讀碩士好呀學歷高啲提高爭力第時升職都易啲……」

「係呢，咁你讀完會唔會諗住再讀埋個博士？」

「………………」

都話PGDE 還PGDE，master還master，兩回事嚟，來唔來有唔少親朋戚友仍然會：

「咦，你係咪讀緊master呀？」→「PGDE？哦原來讀緊PhD？」→「哎呀你u grad完仲咩又讀返high dip嘅？」→「咁係咪即係研究生呀？」→「咦，咪即係master囉」→「仲會唔會讀埋上去博士呀？」→……下刪一萬字……

作者：潮文社

潮文社，實錄生活百態、個人小品，以流行通俗形式表達，由社長親筆原創，亦歡迎投稿。專頁：https://www.facebook.com/9.Literature

閱讀後覺得好，請多多讚好及分享～：）