成日講英文唔通會高級D 咩?

 

(photo via cc Flickr user Francisco Osorio)

 

一直以黎英文係香港佔有舉足輕重既地位,之不過我地往往因為太重視英文而忽略自己既母語廣東話,慢慢我地既文化只會一點一滴斷送係香港人手中,面對大陸既文化入侵,仲有日韓文化浪潮壓境,我地要做既唔係輕視中文而係重振中文同埋粵語既地位,一時既事事旦旦反而令為失去繁體字同埋香港文化既病床。

香港總係有一班人以使用英語為驕傲,就算係日常既溝通都拒絕講一句完整既粵語,點都係生硬地加番一兩句英文先顯得自己地位夠高,放個屁都有美國既漢堡包味或者係英國既炸魚薯條味。當然如果係日常番工,有時候理工科或者係商科就真係好難避免。不過最難頂係普通出下街,食個飯都要滿口英文,聽落真係頂唔順,好想大叫「收嗲啦你!」。

有時我會諗呢班人到底有冇尊重自己既語言同埋文化,我地慢慢唔用,唔理,或者中英夾雜果時,反而摧毀緊粵語同埋中文。舉個例子「呢個字應該點樣講呢?我唔記得左中文係咩。」依家香港係有人去到一個地步係會因為唔識或者唔記得點樣運用粵語而驕傲,又會因為唔識用,或者用錯英文而羞恥。其實英文好就唔使成日亂用同埋死用。

到底成日亂用英文、死用英文既人係咩野心態?

首先,講到亂用英文既代表,不得不數mk仔女。呢班mk仔平時上英文堂就會訓著覺或者唔聽書,係學校考試就永遠都唔會合格,出到去考dse就拎個u仔或者係1仔。當大家都以為佢地唔會用英文既時候,點知佢地就係會經常係facebook到用英文打愛情文,可惜係錯哂文法,講到一舊舊舊,不過下面依然大把人like同埋關心。「you is me, I is you. I love you forever but you dun love me.」點解唔可以打中文呢?唔通打英文係特別有感情?我真係唔識分呢班mk係想活學活用定係覺得中文字好廢,唔夠博大精深,一定要26個字母既英文先可以將佢地憂鬱抑壓既感受表達出黎。

第二,有時我真係諗唔通點解要影張相,或者出個post都要全英文。當然佢地文法用岩又真係冇咩問題,或者佢地有唔少既外國朋友,出post者希望外國朋友都接受到佢地既內容。不過更多人係明明連用英文溝通都難,或者英文好好但冇咩外國朋友,但死都要用英文。其實點解唔可以試下用中文?唔通中文字真係好樣衰?佢地冇資格存在係大家既facebook上面?定係要用英文先顯得自己高級?我地既中文幾時變得咁一文不值?呢班人到底係咩野心態呢?或者英文真係有一種魔力,但我依團垃圾真係睇唔透。

第三種人就係英文版既正字特警,呢班人就係要不停找出或者係恥笑人地講英文果時既缺點。當你既語氣或者係發音唔夠外國既時候,換黎就只有不停被指指點點,笑你英文唔好聽,發音唔夠好。係香港學英文,學識點串點讀點用都唔夠,仲要係夠英式先至好。不過香港人從來唔會重視講粵語既時候文法錯誤或者係有懶音。當你想糾正佢地,佢地只會答你一句冇所謂啦。喂!大佬!粵語係你地既母語黎架,竟然同我講無所謂?反而英文就同我字正腔圓,要英式發音先收貨?呢個仲係唔係香港人既世界,唔講真係以為自己學識第一句說話係mum同dad。

最後我真係唔明點解細細個唔好好教自己仔女中文而係要教英文,仲要教到錯哂,唔通以前社會上既成功人士同埋尖子都係一出世要學英文先有今日既成就?自己英文又唔係好好,又唔教個仔女中文,最後只會搞到個仔女又中又英,係好難聽又勉強既jm tone,係呢個時候除左企係一邊偷笑,我都真係唔知講咩好。

其實英文好固之然係十分重要,但唔代表要忽略中文或者係過份使用英文,人因為有文化而有氣質而唔係因為識英文而有氣質。唔好拎鬼佬比,因為人地係鬼佬而你唔係,學到英美腔固然係好,但人地學唔到既,其實唔需要笑人,更加唔代表人地英文差,香港文化係要捍衛粵語同埋繁體,我地要做既就係從根本入手。

 

作者:筆知所謂

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 解構精神心理治療——輔導個案概念化(Case conceptualization) by 西多士
    如果問大家對「輔導」一詞想起甚麼?可能會聯想到精神疾病,情緒困擾,婚姻問題,家庭暴力等。其實,「輔導」並不如有些人想得這般負面的。先說說「輔導心理學(counselling_psychology)」吧。!它是「應用心理學(applied_p…
  • 「𠒇」字係咩嚟?——港姐冠軍帶出嘅哲學問題 by 散彈一號
    試想象下,喺未有電腦嘅年代,如果你見到某張手寫嘅form上面,有人寫自己個名係「陳曼𠒇」咁啦。你會唔會即刻覺得自己唔識讀呢隻字,即刻走去查字典睇下個字點讀? 應該唔會掛。你第一個反應,可能會心諗:「嘩,呢個人寫個『兒』字寫得咁樣衰嘅。」…
  • Zopiclone——傳說中的安眠藥「白瓜子」 by 小小藥罐子
    Zopiclone,可以讓人入睡大約6至8個小時,所以,一般建議連續入睡至少8個小時,避免出現「宿醉(Hangover)」的機會。所謂「宿醉」,簡單說,透過安眠藥入睡後,如果睡眠的時間不夠長的話,醒來後,仍然可能會覺得睡意未散,頭昏腦脹,影…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
歡迎讚好我們的facebook page,免費資訊源源送上。

文章資訊

ID: 152420
Date: 2017-02-06 22:44:33
Generated at: 2022-12-03 07:07:48
Permalink: https://www.vjmedia.com.hk/articles/2017/02/06/152420/成日講英文唔通會高級d-咩?