笑足大半場,個心乸住咁完場——《小男人週記3之吾家有喜》既政治含隱

 

 

 

《小男人週記3之吾家有喜》係今年賀歲片的其中一套,不少評論都有提到這部戲的表現非常令人驚喜。老一輩既人見到旦哥繼續做梁寬自然有些少共鳴,而新一代呢?有周秀娜同埋鄧月平兩個人間胸器,前者不得不否認係公認女神,後者就係viuTV後捧起既新任女神,總算係大飽眼福。當中亦有唔少黑色幽默,有鹹有唔鹹,任君選擇!夠淫唔夠淫,入去睇下!個腦轉數慢少少真係會笑慢人一拍嫁!本人認為《小男人週記3》要列入香港國民IQ test同埋新一年既中學通識測驗入邊。(嗱!Echo老師提提你:入邊有提到良景夜巿衝突/領展建華/同性戀/viuTV大鬥TVB等政治議題,仆街啲咁講呂大樂既《香港四代人》入邊既世代論都仲有機會有得執出嚟講嫁~出俾學生做功課一流啊!)話雖說回頭,就係《小男人週記3》除咗呢啲咁表面既政治事件放咗入去之外,仲有更深一層既政治味道,值得大家諗諗。

 

 

睇完trailer就save起呢篇文,打開 Hkmovie app check吓地點最近你、時間最啱你既場次,睇完再click番入嚟!

3

2

1

Fire!kero kero kero精兵真好勝!義勇義勇要出戰一拼,要操縱地球就要出擊……對唔住啊吓,high大咗。講番正題先。《小男人周記3》既關鍵字係:夢/13年前/樽鹽/4年前/鏡/痴線/唔記得

係套戲一開始既時候,阿旦就話「呢13年嚟,我都一直發一個惡夢,仲搞到每晚都失眠」而呢一個夢就係由佢老婆阿Ann(許鞍華飾)帶住個女許喜喜(鄧月平飾)離家出走開始。之後佢老友每次出外旅行都會帶「樽鹽」返嚟畀佢,而梁寬亦將自己屋企啲鏡拆曬,一塊不留。

13、13、13、13、13、13年前,呢一個數字係入邊好似magic nubmer噉不斷出現,令我印象極之深刻。去到臨完場前20-30分鐘,大銀幕上打出鄭裕玲飾演的阿Ann(亦都係《小男人周記》既1990版本》,我先如夢初醒!點解我冇諗過13年前既香港係點呢?稍為計一計,13年前就係2003年至到2004年之間:個段時間係香港既低潮期,2003年SARS、政府推廿三條、五十萬人上街﹔2004年人大第二次釋法、失落07/08雙普選、商台封咪、政府規定三個中文電視台播配有國歌既《鳩係家國》短片。而自從阿Ann走咗,佢就晚晚發惡夢。噉我地可唔可以解讀為,阿Ann係代表以前某種美好而依家失落既事物,如香港既言論自由、爭取民主既契機同埋繁榮既社會呢?但又好有趣既啊,阿Ann帶咗個女走就帶咗個女走啦,而點解阿旦會每日發惡夢呢?點解喺呢套戲入邊阿Ann一方面成為佢既惡夢根源,甚至陰魂不散,一方面又係一個好美好既回憶,成日都噉想佢返嚟呢?直至阿Ann唔係以老女人形態出現,而係喺臨尾個度以1990年《小男人2》入邊既鄭裕玲樣貌出現時,我第一件事諗起既反而係同樣係1990年《表姐,你好嘢!》入邊既鄭裕玲——「到時聯合聲明完啦!一國兩制完啦!基本法完啦!到時港幣大跌,金融大跌,股巿大跌,樓價大跌,跌跌跌跌跌跌!」

 

 

調番轉噉講鄭裕玲係美好既存在,而佢既消失就係惡夢既開始!阿Ann就係一面雙刃刀,一方面係《小男人2》入邊梁寬心愛既女人,一方面就係隱含咗《表姐,你好嘢!》入邊共產黨色彩濃,講出一句句恐怖預言既表姐。所以所謂既美好一直就暗藏咗一直對共產黨既恐懼,美好既表象一旦消失就自然係日日受詛咒噉款訓唔安食唔落啦!

 

 

如果噉既話Bobo(周秀娜飾)同喜喜又係以何種方式或者身位出現喺呢部劇入邊呢?周秀娜係阿Ann既「情敵」,有一幕佢係同喜喜係噉講既「你阿媽口中既梁寬就有好多缺點,而我呢?我眼中既梁寬就係咩都好既。佢睇到唔好既嘢我睇到好好。」梁寬喺阿Ann眼中係學壞曬,而Bobo就係「佢咩都好,有咩唔好啊」,仲要係上床要食偉哥都好既好男人!Bobo亦有一幕係向阿Ann宣戰「我又係噉愛佢,你又係噉愛佢,依家喺佢身邊既係我,我要同你平起平坐!」由此可見Bobo本身既存在就係與阿Ann既對立,新歡/舊愛﹔你眼中既衰/我眼中既好﹔以前係你/依家係我。但Bobo又不完全係100%對立喎,例如佢同喜喜講到「我跟咗你爸爸呢4年,佢個心最愛既都係你媽咪。佢從來唔會畀我喺佢屋企過夜,因為佢唔習慣有人訓係佢身邊(唔習慣訓隔籬嗰個唔係阿Ann)」。而Bobo係入邊似乎係美好既一切,包容、忍讓、溫柔、美麗、年輕、愛到義無反顧,可以講係無可挑剔。但同阿Ann同樣,Bobo亦係喺臨尾時出現關鍵性一幕——撞返舊愛/好友(鄭伊健 飾)。一撞返時,鄭伊健就同Bobo say hi,並且話「四年前玩得好開心」。但喺兩個人準備交換電話時,鄭伊健就話「咦,你變咗好多喎。依家陪你老豆行街!」Bobo喺佢耳邊話「佢係我男朋友嚟嫁!」鄭伊健就嚇到跑走啦,而Bobo就用「都白撞既!痴線嫁!」否定咗呢四年。噉四年前發生2012年反對新界東北衝擊立會、唐梁選舉互爆醜聞,反國教,梁振英上台,反蝗同一連串既光復行動﹔2013年私家醫院停收雙非預約產子、限奶令、丟老姆西反梁、電視發牌風波、李嘉誠撤資。

而最令人心寒既係梁寬同阿Ann以及梁寬同Bobo異曲同工既對話。梁寬問阿Ann「13年前點解你會帶走個女既?」同埋梁寬問Bobo「4年前你玩咗啲咩噉開心?」。阿Ann同Bobo答既都係「唔記得咗啦!」原來我地都忘記緊4年前既癲狂、13年前既美好以及對共產黨既恐懼。換嚟既就只有許喜喜既英文名「Hei Hui」(唏噓)。

 

而許喜喜存在既身份就係阿Ann既延續,亦好明顯地同太子爺代表喺套劇入邊係香港新生代既縮影。許喜喜唔鍾意梁寬蝦蝦霸霸,追求正義。而梁寬求喜喜原諒時,其中一個喜喜既要求喺話要「焗豬扒飯」同埋「喺屋企裝返啲鏡」。「焗豬扒飯」係香港老一輩既一個共同回憶,好好食咗一啖就唔食,俾佢老豆食,意思係叫佢老師「記返起以前既好日子」﹔「鏡」呢樣嘢,reflection就係反思既意思,呢個亦係喜喜對佢老豆既要求。而許喜喜對梁寬既所有印象都係嚟自阿Ann,佢講過「媽咪話你訓覺嗰時鼻鼾聲好大」。簡單嚟講,許喜喜好懷緬以前既歲月,即使佢冇親歷過都好,都好希望老一輩既人同佢一樣可以重拾往昔既光輝歲月,並且加以反思。

而梁寬有冇反思到呢?佢係屋企加咗塊鏡,但係佢最後將朋友買既 一樽海鹽都丟曬,佢訓覺日日起身唔再好似以前噉記掛住死鬼阿Ann,又發惡夢噉,而係每晚同Bobo同床共寢,一醒就係香艷既夢。而呢個夢係咪真係噉香艷呢?所謂既惡夢係咪消失咗就好呢?只能夠答一句「Hei Hui」……

 

彩蛋1:《小男人週記3之吾家有喜》:你你你引致我震盪MV 呢個MV真係一絕!有驚喜!

 

彩蛋2:入邊有講過一句「唔好噉TVB劇情啦!」,後來有出現過viuTV既《G-1 格鬥會》,最後一shot Bobo 開既café係《三一如三》場景。

 

作者:Echo

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 152489
Date: 2017-02-08 01:16:23
Generated at: 2020-10-31 14:16:53
Permalink: https://www.vjmedia.com.hk/articles/2017/02/08/152489/笑足大半場,個心乸住咁完場-《小男人週記3之