屬於香港人嘅「香港製造產品清單」

 

 

大家好,我係阿豐,「香港製造產品清單」嘅發起人。

其實本身喺社交媒體上都有唔少page 有提及過香港本地製造產品,但主要都係介紹食品醬類,而且因為係page 公佈嘅關係所以形式比較單向;於是,我就想利用google doc 形式去製作清單,等大家可以更有效率地自行更新及補充資料,而且分門別類列舉清楚可以方便大家按圖索驥搜尋自己想要嘅產品。

近年嚟,唔少本地老牌老字號都敵不過貴鋪租以及進口廉價商品競爭而被逼結業,而我地香港人就好被動咁邊間要執先撲埋去搶舊貨懷念,但事情原本就唔應該係咁,應該係我地主動地去支持本地商品嘅市場,避免佢地喺不斷失去本色嘅香港中消逝,於是我就有製作呢個清單嘅念頭。

大家成日會幻想重光後嘅香港可以復興昇平,但老實講,香港產業已經被金融地產掏空,我地可以諗下當政治動盪後我地會仲剩低啲咩?可能到時只會係一片死寂,香港將無法回復昔日光輝,而之所以我會優先造「香港製造」而非「香港牌子」嘅清單,係因為我地必須要保護我地碩果僅存滄海遺珠嘅工業——工業就係經濟嘅基石,冇工業嘅話經濟就會如坐針氈咁因為缺乏實業支持而不穩定,依賴外地,不論係低技術生產製造業定係高端科技;而一直以來,中國在港殖民政府就不斷配合中國嘅陰謀,斷絕香港自立穩定嘅機會,利用發展、政策同競爭消滅香港工業,故此,我懇求各位愛惜香港之士,為左他日我地戰勝黑暗後苟延殘喘時尚有一線生機東山再起,請大家多加支持本地製造產品,擴大本地製造產品嘅市場,令佢地有充足嘅生存空間,繼而再吸引香港牌子回歸本地設廠投資,為香港帶來資金及就業,提供返正常嘅社會流動同多樣產業俾我地,亦令我地人生有更多可能。

另外,從環保角度出發我地都應該支持購買本地製品:產品若在外地製作,不但我地難以監測生產過程嘅環境保護及工人待遇,而且運輸途中嘅碳排放亦不必要地大大提高;而本地製作產品,我地唔止可以更加容易監察生產環境,排放及工人待遇,而且可以免去運輸來港嘅碳排放;再者,我地更加可以利用呢個機會幫助一啲本地手作或小型製造公司擴大市場,壯大佢地,令我地有機會擺脫一直以來面對嘅寡頭壟斷,令我地喺市場上有更多選擇。

講咁多,其實都係希望大家可以share 呢個表出去,而且記得話俾你地身邊朋友聽香港仲係有工業架!我地仲係有得買香港製造嘅產品架!大家記得要優先購買香港製造產品,並且多加留意身邊有咩香港生產嘅貨品可以補充下呢個資料庫;如果反應理想,日後可能會考慮繼續製作小販及小店清單,進一步保護香港本地經濟嘅穩定及多樣。

 

作者:亂臣賊子

亂臣賊子

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 152528
Date: 2017-02-08 12:49:43
Generated at: 2020-04-05 06:10:42
Permalink: https://www.vjmedia.com.hk/articles/2017/02/08/152528/屬於香港人嘅「香港製造產品清單」