412日電視台黑暗地獄史(七)——柒出演藝圈被張敬軒cap 圖

 

張敬軒有首歌叫《過客別墅》,舊年喺樂壇有幾好成績,仲喺十大中文金曲頒獎典禮上奪得「全國最佳中文歌曲獎」。我哋電視台嘅娛樂新聞當然都有報導,仲將軒仔現場演繹嘅歌聲節錄畀觀眾睇。當晚負責做頒獎禮相關新聞嘅同事都做到凌晨一點有多,追唔晒第二朝返早更嘅同事又繼續做,製作相當認真的啊。

不過新聞片段出街之後,就畀軒仔本人發現熒幕顯示唧歌名錯咗,成了《過夜別墅》,咁好笑嘅事就梗係要開心share喺ig,「#歌詞就錯得多了錯歌名都係第一次」、「#許志安入行三十年坦承未聽過過夜別墅」,唔少行家同圈中人都有留言取笑,真係柒事傳千里,on9永留存。

平日嘅娛樂新聞片段,都係由我哋嘅記者同事負責寫稿、錄VO、剪片、打字幕、打歌詞;然後由編輯校對審批,最後有PA同導演守尾門,每條片都好似過三關,雖然有時都會有甩漏,但都唔會柒到條片出咗街畀藝人發現先知道有錯。今次究竟點解會犯呢種低級錯誤?絕對唔係同事馬虎了事,只係一個人得一個腦一對手一對眼,無可能做到十個人嘅工作,所以問題嘅根源又回到那位劣質老細身上。

我所屬嘅部門向來係專責做娛樂新聞同專訪,以及娛樂相關嘅專題節目,另外有兩個部門,分別專責飲食節目同旅遊/綜藝節目(即係以前翠如bb做嗰啲),三個部門各自為政。為了籌備即將啟播嘅免費頻道,三個部門都要提升工作量。綜藝嘅繼續做綜藝,飲食嘅繼續做飲食;但係做娛樂嘅,連自己本業都未顧得掂,又要染指搞其他類型嘅節目,特意將原有人手分一批出嚟做新節目,結果呢?就搞出少女求包養事件(第一集)、惠英紅喪母大紅大紫見報(第二集)等柒事,而幾個所謂嘅新節目,真係老土到聽到個名都唔想睇,不如睇返cctvb算了。

未抽調人手去做新節目之前,每日都有三至四位編輯負責審批新聞片,分組後每日就淨返早夜更各一位編輯,每人每日要審十9幾條片,唔睇到盲都眼花啦,睇唔到錯字又有幾奇吖,如果咁唔好彩其中一個請假,咁就真係恭喜你,齊齊gg。而節目組嘅人呢,可以話係皇馬褂,每日喺皇太后身邊陪飲陪食陪笑陪開會,完全唔會理新聞組同事是否冧檔,但一有咩問題就依然係有咁大聽屌咁大聲。

至於我哋呢低級奴隸,情況亦不惶多讓。自從我同兩個同事離職後,部門還未聘請新人,「求包養少女」又遞信即日走了,老細淆底到連代通知金都唔敢要佢賠。花紅一出,馬上又有幾個同事遞信準備走。做得奴隸,除咗剪片寫稿錄音,仲要出外景做訪問。不過我地走晒之後唔夠人手,大家就要減少出外景留喺公司剪片,遞咗信嘅亦唔可以出外景,結果大部分外景訪問都係由主播去做,做到個個又攰又殘又病。

主播人數一隻手都數得晒,邊去得晒咁多單event做採訪呢?唔緊要,我哋仲有萬能嘅攝影師!Cam man 單拖去拍兼做埋訪問,個藝人就自己拎住支咪對住鏡頭答問題!我有些傳媒朋友知道後覺得非常驚訝,攝影師拍嘢架喎,點解要做埋採訪?托住部機十9幾個鐘跑n咁多單新聞,事前仲要做功課諗定問啲乜?無錯!喺呢個地獄入面,一切都係咁荒謬又彷彿合理。

其實用呢種方式拍返嘅嘅片好唔好睇、攝影師問嘅問題啱唔啱駛,已經係其次,首先個畫面構圖已經唔靚,個藝人一條友對住鏡頭拎住碌嘢答問題已經夠柒;攝影師要兼顧唔係自己工作範圍嘅嘢已經辛苦,成件事對藝人亦唔夠尊重,令好多藝人都唔鍾意做我哋台嘅訪問。唔夠人手,要搞到咁樣做採訪,真係唔做好過做。

呢一切一切,全因老細權欲昏心。喺公司現今三權分立嘅情況下,要喺大老細面前搏取表現,進一步提升權力,就要攬多啲嘢嚟做,不過唔係佢自己做,係佢下面啲契弟同奴隸去做,話知你做到死。無咁大個頭就唔好戴咁大頂帽,無咁多人手就唔好搞咁多花臣,無咁多錢就唔好咁大諗頭。做出嚟嘅製成品質素差之餘,跟手拉埋娛樂新聞組嘅同事一鑊熟,新聞質素隨之下降。照這個形勢,各式各樣嘅柒事只會越嚟越多、越嚟越密,《過夜別墅》之後,下次會係咩呢?

坐這山,望那山,一事無成,呢啲咁簡單嘅道理,細細個已經識。然而被權力矇閉雙眼嘅管理層卻不自量力,唔做好娛樂新聞/娛樂節目嘅本業,要搞其他類型節目做副業,對員工更係刻薄至極,令流失率之高成業界之冠,結果連本業都拖垮了。恐怕他日免費頻道啟播,現有嘅電視台都會覺得完全無威脅。

 

下回待續。

 

412日電視台黑暗地獄史

 

作者:無名呀!

所有作者不願透露姓名,連筆名都不願提供,而同時又令總編認為可以刊登的文章都用呢個名,要找晦氣直接搵容樂其。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 152569
Date: 2017-02-09 01:00:39
Generated at: 2020-08-15 09:56:03
Permalink: https://www.vjmedia.com.hk/articles/2017/02/09/152569/412日電視台黑暗地獄史(七)-柒出演藝圈被張