單憑搭升降機,已經可以將人性表露無遺。

 

(photo via cc Flickr user Richard Leeming)

 

其實,唔提政治,係日常,單憑搭升降機,已經可以將人性表露無遺。

如果你單獨係升降機入面,升降機度門開緊,然後出面有個你唔識既人慢慢行緊過黎。所有係都市住既人,都會面對咁既日常。佢無明確表示自己趕時間,例如無急步甚至開始跑過黎,又或者叫一聲等埋,咁請問你會點做?正常人,或者稍為好心的,當然係會主動按一下開門掣,等埋佢啦。當然仲要假設你自己亦都唔趕時間,今日係一個心情愉快既日子。但係如果我改變條件呢?

例如,你係一個絕對理性,而且唯利是圖既人。所有野都要以自己既利益為最大出發點,而不論如何,你絕對唔會浪費時間,係放係自己既第一位。而又或者你趕住開會,老細唔等人,可能會因為你遲十秒,而炒左你魷。咁合理既做法,就可以係唔按開門掣。換句話說,就睇佢運水如何,佢趕到就趕我唔干預,即係將樣野由天決定。

聽天由命,係人性之一。但當然,有更加「衰」既做法。就係調轉按閂門掣,快D閂門。

按閂門掣的話,其實係唔會有任何既反效果。一,出面果個人根本你唔識;二,其實佢根本係出面判斷唔到你有無按到閂門掣;三,就算你做乜都好,你都可以輕易將自己解說成:我見唔到出面有人。而且,佢等下一班升降機黎,好快渣嘛。換句話說,成件事所付出既成本會係零,而你就可以一下子慳到SAY十零秒既時間。而再假設佢同你唔同樓層,你就可以再慳多十零秒。唔好睇少一分鐘,有時就係咁樣,立法會都可以流左會。

但人性,同埋環境,都唔係咁簡單。如果果個係出面既人,見到你呢?如果佢知道你唔等佢,佢會周圍唱衰你呢?如果出面果個人,唔係你唔識既,而咁岩係你老細呢?你可能就因為咁,完全推翻以上既所謂理性決定。而本身果個人,係咪真係想入駛班機,你都唔知。可能佢無表態,但實質佢都好趕時間;或者其實佢根本唔想入黎,你夾硬等佢佢反而覺得尷尬,甚至係,其實佢根本唔想同你同升降機。

下,既然咁複雜,咁點算呀。點解禁個掣都會變左人生交叉點呢?然後你就會開始諗,點解要我一個人去決定架升降機係應該開門,唔郁等佢閂,定直接閂門?點解唔可以係幸運地,我身邊其實有其他唔同既人,佢地一齊係升降機入面。於是呢個決定,就唔係一定要我行使,可以係其他人行使--留意,搭升降機,係唔需要一班人一齊開會商議的。所有決定,都會由一個人決定,然後果個決定,就影響晒升降機入面所有人,而且不能夠避免。

覺得幸運,甚至僥倖將責任轉嫁,係一個不負責任既行為。但人好多時候都會因為少少野,就逃避責任。而平均可以分擔責任,甚至係罪,就更理想。我地再諗一諗平時搭舊款升降機。如果一個人,就一定要自己去按想去邊層既果粒掣,但係如果有好多人,就會有機會自己唔駛禁,有人幫你禁左,因而慳番所負出去禁掣既果個舉起手既動作。我只係講如果,如果有一個人懶到係咁,佢會唔會一直係個升降機都齋等,等到有人黎幫佢禁為止呢?

咁樣諗,當然係好瘋狂,但實際上,當好多人,而且樓層選擇唔多果陣,就可以發生。人係可以將控制權交俾其他人,然後妄圖守株待兔,得到自己想要既野,大前提係中間所付出既成本仍然合理。再返番番去岩岩果個CASE,出面係老闆,但係依家好多人同你一齊,有人可能已經幫你禁左閂門掣,你就心安理得了。而下一步,你亦都唔駛郁,因為你覺得,身邊總有一個人,會幫你禁果層。

但如果入面所有人,依家同你既想法完全一樣,無一個想做負責任果個,亦都無一個人願意踏出第一步去禁升降機。因為個個都諗:總有一個人會幫到我。咁我想問,升降機入面會發生咩野情況?

睇到呢度,你會話:痴線,升降機咁小事都講到咁複雜。咁你不如諗下如果依家唔係講緊升降機,係講緊其他野,會點。可能會有更有趣既發現。

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 152615
Date: 2017-02-10 06:05:43
Generated at: 2021-09-23 05:13:14
Permalink: https://www.vjmedia.com.hk/articles/2017/02/10/152615/單憑搭升降機,已經可以將人性表露無遺。