宅男外賣仔之情人節外賣篇

 

好耐好耐之前,唔知邊條友推行左情人節男要送花俾女仔既習慣,所以今時今日既情人節個個都熱衷於賣花送花仲有痴膠花(刪除線)。每個女士都想喺果日收到花,一黎可以話俾人地聽我好幸福個男朋友/老公幾錫佢、二黎可以有種好sweet既感覺,羨煞旁人……而我同其他無拍拖既同事/朋友以致網友呢一日都係食花生日,睇下邊個有波入(有花收)、邊個打俾個男人要求轉陣入波(急call送花)、邊個剩女上司黑面/發老脾、仲有邊個打茅波自己送俾自己。只需要文字就可以完全知道發生咩事(例如中女上司先入波,後生組即時急call),既過癮又歡樂。不過早幾年我就係送花果個……..

喂!唔好誤會,我係做花店送花俾人果個!

「Ken,喺送之前我要講解下好重要既環節俾你聽。」

「例如?唔係送到上去俾個女既簽收就得既咩?」

「情人節唔同D,你都知幾多人送花架啦!你同我都知十個女人有八個都想喺呢日威下。」

「無錯…….」

「第一你上到去要好開心唔好咁頹,Smart D!」

我心諗:「我好頹好蠢咩而家?」

「第二你上到去要講清楚俾邊位小姐,同埋要講清楚俾佢聽邊個送,仲有聲量要剛剛好要俾人聽到重點但唔好太大聲。」

「簡單d講,最緊要俾佢地威下啦即係?」

「無錯…不過…….」

「不過咩?」

「要醒目D唔好送錯俾人,死硬!陣間果兩個世界大戰之後打黎鬧爆既話,我都幫唔到你架!」

「知啦,我做野好爽手架!」

「有咩唔對路打俾我,千祈千祈千祈唔好搞錯!真係死人架!」

結果我就開始出發,維護呢個世界和平同埋拯救無送花而要跪玻璃既男士。當然我亦都會同網友們分享下所見所聞,做一個戰地記者。

「Hello,請問Cindy喺唔喺度?我送花黎既….」

「係,我喺度…」

一眼望落去佢悉心打扮化濃妝,笑到四萬咁口,相信佢係呢間公司既首名入球…

「小姐,你男朋友訂既花,麻煩你幫我簽收…」

「唔該哂你,拜~拜~~」

你睇佢咁風騷就知成功左啦?而佢既同事亦都流露出又羨慕又妒忌既表情….

「你就好啦cindy,你男朋友會送花俾你。」

「係囉,我老公都唔知有幾多年無送過花俾我…」

「哈哈哈,係咩?佢幾好架……」勝利者既笑容同黑口黑面既其他人形成好強烈既對比。

「我唔理啦!總之你自己諗辦法送花上黎,如果唔係你以後唔洗再同我講野啦!」

「一次半次你都唔肯就我?」

「你仲有一個Lunch既時間去訂花…哼!!!!!」喺lift口已經聽到最後通牒,只好默默地祝果位巴打好運。

「Hello,我送花黎架。想問下…….」

「你自己行入去問啦….」呢把聲就係頭先𨋢口聽到果個要入波既「教練」。塊面鑿住「生人勿近」四個大字,都咪話唔得人驚,一怒之下唔知會唔會將我連人帶花放入碎紙機…..

入到既時候發現無論係後生女以至中女同茶水阿姐都一樣無表情死氣沈沈,應該都唔科好野,於是我決定「扮傻」。

「早晨,我黎送花俾Janet 架,唔知佢…..」

「殊!唔好咁大聲,你將紮花放入後面茶房先,我再叫佢同你簽收。」茶水阿姐即刻捉我入茶房,之後見到佢將紮花放好搵野遮住就急急腳出去搵人簽收。

「唔好意思啊,要你走入黎茶房。不過今日如果你再送呢的單位既話打俾我/英姐先,因為阿姐發老脾,講明唔可以收花影響工作,有個同事俾佢鬧喊左架啦。」

「哦,係咪無花收所以…..」

「呢個我地就唔知,不過都似架啦。呢d年紀得工作乜都無既,好極有限啦!俾你溝你都唔會揀呢種啦,除左你既口味…….」

「咁又係,我揀都只會揀你呢type啦!」

「口花花啊你,俾你女朋友知道仲唔死?」

「你唔講我唔講邊有人知呢?」

「哈哈,唔講住啦。陣間阿姐又以為我偷懶,whatsapp再傾啦,辛苦哂你!」

「Ok,陣間再傾….」

正當我轉身走之際,佢地個阿姐唔知點解叫住我。

「你送咩上黎?」由佢既語氣我已經感覺到
佢心情差到爆。

「我速遞送件架,唔該哂,ByeBye!」我直接封佢後門唔俾佢講任何野,免麻煩。

送到咁上下就到食Lunch既時候,竟然唔少男士喺舖頭排隊……

「Ken!幫手落單,要寫清楚要邊款、幾多枝、有無特別要求,叫佢地親自寫地址同名,唔好搞錯。」

「阿哥哥,想問下可唔可以指定你去送?同埋我有少少特別要求?我識做既….」呢個西裝友拎左張500蚊連埋張單一次過俾我。

「你講啦…..」

「我其實想同佢求婚,想俾個驚喜佢,但我想你配合我…」

雖然500蚊貼士好吸引,但我當見到佢寫既地址同收花人既時候,我選擇放棄果500蚊貼士,做一個多事既人。

「如果我係你就諗清諗楚先….」

「下?」

「你呢個地址同呢個收件人我頭先先送過上去,我連單都有,張單寫住Robert送既…..除非….」

「啊!!!!」呢個西裝友好似晴天霹靂咁大叫左一下。

「我都覺得奇怪架啦!原來真係果個裙腳仔!原來我俾人呃左咁撚耐!!!!!成日話同姊妹飲野….」

我好似引爆左一個谷左唔知幾多年既火山一發不可收拾,所有人既眼光都望住我同佢…

「阿Ken,發生咩事?」

「呢層…….」我都唔知點樣講起。

「無事,其實我想退番錢所以問下你個同事….」

「哦,仲以為發生左咩事…..」

「多謝你講俾我知呢件事,呢500你唔洗俾番我,當我請你同你朋友飲杯野。」雙眼通紅既佢帶點滄桑既感覺。

「唔好再諗啦!」我多手拍一拍佢膊頭。

「ByeBye。」

佢轉眼之間消失在茫茫人海之中,但隨之而來自己有種好心up既感覺…..

「Ken,條友做咩退錢?」

「條女送左頂綠帽俾佢啫。你睇下呢兩張單,同名同姓花款公仔都一樣,係送既人唔同…….」

「張單大拿拿成千蚊架,俾我老母知道我同你都死得。」

「你都幾好賺喎,果幾枝花同果隻公仔可以賣成千蚊…..」

「一年最好搵就係過年同情人節啦,一定有人買既。」

「咁又係…..」有時候我o係度諗:「點解唔食餐好既呢?真係有必要為左果種虛榮感去大費周章?或者我唔係女人真係唔明掛?」

當我以為今日可以袋袋干安無事收工之際,我就出左事……

「阿Ken! 今日可能要你辛苦少少跑幾步去送,前面塞死晒。」

「交俾我啦,4點半前實搞得掂。」於是我呢個外賣仔就跳左落車拎住花就跑上去個office度。(每單有30bonus,越快手做完越著數)

「嗄嗄…..我送花黎架….」2個街口唔係一件易事,因為要避人避車仲要保護好呢紮花…

「送俾邊個先?唔通又係送俾我既?」Reception姐姐心情好似好靚咁。

「今次送俾Susan….」

「下?Susan? 你有冇睇錯地址同名啊?睇多次穩陣d喎…」佢既反應係好難以置信。

「無錯,真係Susan喎……張野真係咁寫架。」

「哦….咁你入去啦….」

「唔該,我送花黎俾Susan架,唔知佢o係唔o係度呢?」

唔知點解,無論男女老幼同埋魚缸裡面果條錦鯉都一樣 — 個個都O晒咀…..

「你有冇睇錯地址架哥仔?唔好搞錯啊呢d日子….」有個哥哥咁樣同我講。

「我o係度,唔知咩事呢?」

「小姐,呢紮係你訂既花,麻煩你可唔可以同我簽收…….」

我終於明白「變臉快過食杯麵」係咩意思,呢位Susan姐既面色十足十好似包大人咁黑,身邊仲有幾團鬼火,而佢既眼神係要殺死我咁樣。而我睇得出其他同事忍笑忍得好辛苦,我先意識到:「仆街!講錯野…..」而現場氣氛就好似死寂一片咁..

「你擺低啦…..」佢手快快簽完之後就砰埋房門。而我眼角見佢班同事忍笑已經忍唔住,個個走晒去pantry…..

而Reception姐姐就同我講:「你真係幾識搞笑喎…..哈哈哈….我諗無一個同事唔會唔讚你…」

「Ken!你頭先搞乜?」我呢朋友個表情有d異樣。

我心諗:「咁快知道既?」

「你知唔知頭先個女人打番去舖頭爆晒粗屌晒鬼,屌足3個字…….跟住我老母打黎屌到我反艇,你到底講左d咩?」

「我口快快講左小姐你訂既花…因為我見張野寫住個”自”字…」

「咁班人咩反應?」

「佢班同事忍笑忍到好辛苦,而佢個反應係黑面黑過鑊撈……」

「真係服左你,你陣間記得要親口同人say sorry…..」

「記住佢點屌你都當無事就得,不過你電話離你耳仔遠d會好d…..」

情人節過後垃圾筒最多既唔只係謝晒既玫瑰花,仲有眼鏡碎玻璃碎同埋….

「…………..你個仆_仔,咪_再俾我見到你送花上黎………………….」

「………..咁_多人死唔_見你去死?…………」

「……你係咪男人黎架?…………………………」

「好彩我醒將個電話放o係枱度,如果唔係遲早連耳都要換埋!」

「你又係既,口快快做乜鬼? 得罪女人你真係死得…」

「一時間諗唔到點兜嘛,不過就算我唔講其他人都知啦。咁既性格咁既樣有人要都偷笑…」

「愛情呢家野你識鬼咩?飲杯啦。」

 

Ps. 圖既花唔掂水就唔會謝架!

 

作者:陽光宅男

陽光宅男
人如其名,只係一個有陽光氣息既宅男,鐘意打機9up講笑話但懶到出汁,保證大家完全估我唔到。FB PAGE 陽光宅男Ken

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 152950
Date: 2017-02-14 19:00:24
Generated at: 2020-10-31 15:12:06
Permalink: https://www.vjmedia.com.hk/articles/2017/02/14/152950/宅男外賣仔之情人節外賣篇