讀中史係無用既。

 

 

讀中史係無用既。因為你讀完,發現同依家發生既野好似差唔多,就證明社會似乎並無乜進步過。

例如,好多民間既戲劇小說,野史雜記,多數就會吹捧新君英明上任,怒斬讒臣,百姓守得雲開見月明,然後眉花眼笑,深嘆今次有好日子過咯,即BBQ大結局。有唔少甚至係微服出巡,因為皇帝一表人才,而且才德兼備,令不少民間女子即時拜服於旗下,甘心入宮為妃為嬪既例子。過往有黑暗歲月,唔緊要,只要有新一個皇帝,就有新既希望,就有「中興」,民主政制唔係村口屠戶或者深閨日夜針黹女紅所追求既野,只要能夠「撥亂反正」,大家又甘心前事不提。

成套封建既意識形態,君上民下,根深締固,唔係話咁易搣得甩既。傳媒當然亦都係呢方面,係應記一功啦。中央叫阿爺,待批就變御批,行政長官廚師都要叫御廚,而年年DSE公布結果,又要叫放榜,考得好既,又要叫狀元乜物物,框死左,邊有咁易甩得身。官場現形記入面,范進中左舉人,即刻失心瘋,而佢岳丈大人都要即刻一百八十度變面,要斬豬拖錢黎送大禮,其實感覺上同香港既社會,都幾夾幾岩FEEL呀。只要人人覺得開心,無人話要大轉變,政制向前呀。CHANGE你老味。好多人都話,阿爺閂東江水,香港人會即刻渴死架。等於果陣宋朝都話夏遼金唔得罪得,一樣。

所以依家689疊到咁大個台,突然黎一招高台自焚,選唔到特首,黎民百姓為之叫好,幾乎要係菜市口搶食其肉,而鬍鬚由適時化身救星身份出現,尤如神仙下凡,拯救天下蒼生,成台大戲邊個黑臉邊個白臉,前所未有地清晰。大佬,舊時六國大封相,無頭東宮戲,觀眾無份做,都一樣咬牙切齒啦。依家無票選又點喎,係咪台下戙高腳,叫下陣都唔得呀。只要天下聖平,大家最後樂意下跪,高呼萬歲。於是旁白話:政治重上軌道,百姓安居樂業,門不蔽戶,天下大治,物盛民豐,好野。咁樣寫黎答題,又滿分,BINGO。

讀中史又話要以史為鑒?我超。

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 152868
Date: 2017-02-15 03:28:01
Generated at: 2021-09-23 04:22:20
Permalink: https://www.vjmedia.com.hk/articles/2017/02/15/152868/讀中史係無用既。